Bongkling CXXIX - CXXXVI

Kaketus saking manuskrip duwén

Ida I Déwa Gdé Catra Karangasem

 

/129/

I Gusti Agung ka jaba,

pra punggawa pepek nangkil,

horthané sampun karawos,

makadi parandha sami,

sama prawatek ririh,

Prandha Wayahan Kukub,

Parandha Ganggasura,

Parandha Wayan Réwati,

sami putus,

tekaning naya upaya.

 

/130/

I Gusti Agung matura,

prandha rawosang-mangkin,

tahén tityang lintang habot,

antuk kawulané kidik,

kaakéhan harepin,

tan wénten wénten manyundul,

gelisan kahidheran,

manawi gelisan ajrih,

yadin purun,

bas kakwéhan pacang lawan.

 

/131/

Nah maman padha kenehang,

mangdé mabahan manyapih,

I Gusti Wayahan Gedot,

sareng Gusti Ketut Kenjing,

aglis dané nyahurin,

manah tityang wengi ngamuk,

mancangin bilang dangka,

manawi nyak ipun lilih,

tityang mburu,

mangraris rawuh ka Mekah.

 

/132/

Pelih to kenehang bapa,

yén twah mangamuk né jani,

sinya té mapwaran habot,

panjak tong kena hingetin,

sinya liyu ngalengit,

sing jalan-jalan manyingkrung,

kudyang ko manyalahang,

hidhep nyané tekén cahi,

déning saru,

di petengé ya makahad.

 

/133/

Yan saking pangrasan bapa,

melah gelaré kukuhin,

eda ja pati kalongsok,

sok pepekang hobat mimis,

hento anggon ngujanin,

di tekan nyané magebug,

lawut lawan mawaswas,

sinya hénak nglawut jerih,

déning luyu,

makelo mapondokan.

 

/134/

Tunggal ya ngebug kuciwa,

twara mbahan mamintulin,

apan ya mamedil témbok,

awaké mangwales medil,

tangkahné kena bedil,

kenehang bapa manundun,

tong dadi ya balikang,

yadyapin iya mabalik,

suba luyu,

kenehanga twara siddha.

 

/135/

Pareng Gusti Wayan Hambwak,

ring parandha mangrawosin,

dabdab mangwijilang rawos,

ndan Gusti Kancanasari,

raris dané nyahurin,

sareng dané Padhang Gambuh,

iwang manahang tityang,

manah tityang ngamedalin,

pacang ngamuk,

manglawan siyatjambaran. 

 

/136/

Yan mangkin mataku gelar,

manggawé i panjak sakit,

becikan i turus jabon,

punika anggén nggelarin,

yadyapin gelar becik,

kahulané lintang luyu,

naler nora gawénya,

kéwanten parimbit-rimbit,

tan paangkuh,

manawi ya mati berag.

(pacang kalanturang…)