Puisi-puisi IDK Raka Kusuma; Jalan Kamboja, Nomer 6 Warsa 1986

Gending Angin Dénpasar

:I Gusti Ngurah Jaya Negara

 

/1/

sampunang jeroné matakén

mémén tiangé sira

sampunang jeroné matakén

bapan tiangé sira

sampunang jeroné matakén

lekad tiangé ring dija

sampunang jeroné matakén

gedén tiangé ring dija

sampunang jeroné matakén

dados ngumbara tan mari

sampunang jeroné matakén

sané rereh tiang napi

sampun pakardin Widi manawi

kawéntenan tiangé sapuniki

 

/2/

sampunang jeroné nganikaang

nganggoang kita tiang ngumbara

sampunang jeroné nganikaang

sakita-kita tiang ngumbara

nuutang kita yukti tiang ngumbara

kija makita marika ngumbara

sakéng semeng kantos sanja

sakéng sandikala kantos endag suria

 

apisan biana wadih marasa

diastun tiang ngumbara

makudang-kudang warsa

nuutang kita yukti tiang ngumbara

durung naen ngangoang kita

durung naen sakita-kita

 

/3/

yéning jeroné nakénin

tatkala ngumbara sapunapi tiang

jagi aturin, yukti, jagi aturin

becikang mirengang, jero, becikang

ngumbara ring ambara

mangulayang tiang marasa

ring betén sami kanten alit

sané ngendih kanten makenyit

nempuh hyang bubu magumpluk utawi sambeh

tiang marasa tis pisan

napi malih nempuh sabeh

kadi téngkobang tan pararian

sakéwanten, ibuk manah tiangé

yén ngumbara ring tanahé

buk makupuk tan mari

awak tiangé jero, makaukud daki

 

/4/

sapunapi tatkala ngumbara nglintangin kota?

dalu siang jero, panes bara karasa

anak mabaos piragi tiang tan mari

panes jagaté, sané ngranayang napi?

piragi tiang taler

munyi gerang-gerung sliwar-sliwer

tan mari, pegat nyambung

mamanah tiang: méweh deriki ngrereh suung

duk ngumbara ngalintangin désa

wénten jero, wénten sane sebetang tiang

pakanten bangketé sayan nguredang

yén telas, pantuné tandura ring dija?

sampunang mitaenang tiang nakénang

klebehé ngumbara dumunan ngujeg tiang

/2009-2013/

 

 

Jalan Kamboja

Nomer 6 Warsa 1986

: IDG Windhu Sancaya 

 

/1/

semeng duk punika.wénten nakénin titiang

kija jero, kija paksiné deriki

pakeburbur napi ilang

napi padem sampun makasami

titiang matakén : paksi napi

dané masaur : sakancan paksi

nguci sakéng ngawit galang badangin

kantos muncuk jepuné ainé nyunarin

sang mapitakén raris mamargi

sarwi ngandika : wénten lilus deriki

empak sami carang jepuné

patut aukud ten kanten paksiné

ngrémon titiang ring ati

anaké punika punyah manawi

 

/2/

tengainé ton titiang lawat jepuné

cedang kanten ring natahé

kadi katémplékang ring tanahé

ngrémon malih titiang ring ati

sira sané matakén nuni?

dados sami nikaanga empak carang jepuné?

dados telas nikaanga paksiné?

jegjeg kanten carang jepuné

layak-layak tempuha ring anginé

akéh kantun kanten paksiné

nungkalik manawi cacingakné?

duk minggek kauh suriané

ulap-ulap daun jepuné

akéh pisan, akéh pisan rauh paksiné

 

/3/

ritatkala wengi, usan paksiné nguci

sepi jampi mangkin ring genahé puniki

piragi titiang, ring dija manawi

anak lanang sinarengan matembang

yén nguci paksiné raina wengi tan mari

bagia, bagia manahé sakayang-kayang

titiang nimbalin nanging ring ati

bagia, bagia titiang raina wengi

nyadia ngijeng kantos kawekas deriki

ngijeng ring batan jepuné magending tan mari

makenyem titiang duk makesiur anginé

miragi lanturan tembangé: yén langgeng raris endag ainé

tur setata, setata guminé galang

sapunapiang matembangé nyabran wengi, sapunapiang?

 

/2008-2012/