Puisi-puisi I Nyoman Sadwika; Belogé mapunya

Pinunas

 

Icén titiang kateguhan sakadi waja

Anggén mautsaha ring jagat sakala

Nyelehin lampah deriki

Ngremba jagat aor tanpa tepi

Icén titiang kaweruhan sajimbar akasa

Mangda sida ngicalang sarwa éwuh pakéwuh papa klésa

Tekek ngambel sila yukti

Nyungkemin punang pakérti

Icén titiang kakuuban wiwéka sakadi pertiwi

Sida sadu sidi

Malajah Diraga suluh suluhang

Wiwékane anggén nyelehin sida inang

Dumadak baktiné keaksi

Sukertane rauh mamargi

Jagaté sami manggih santhi

Belogé mapunya

Pragat nguntul ngurek tanah

Nyujuh bulan ngantos bujuh

Gedénan klebet bas pongah

Napi sané  karuruh

Pongah juari turing pangkah

Jadma puruh turmaning punyah

Ngedig tangkah ngaku ririh

Awak sinting nagih sutindih

Tong taén masuluh

 Minab yukti nista aji pangweruh

Ngulati tanpa suluh

Joh para sida kapangguh

Amertane sami tandruh

Sangkaning belogé mapunya gupuh

 

 

Eda caluh

 

Eda cening caluh

Makejang pragat aluh

Nyalanang bikas sigug

Brangti lobangkara pati ugug

Ngawé cening saranta di jalan

Nasi dinginé upin-upinin

Malajah cening majalan

Jagra cening malajah matangi

Nyelehin lampah deriki

Katindih baan galang apadang

Melahang cening pedasang

Saking caluh ngalih elah

Apang tusing care taluh

Mare tuuk lantas belah

Kujang nuduk tuak labuh

Apang tusing makaplug labuh

Ngawé sangsara kawekas

 

Guru

 

Sané ngamedalang sarwa sastra aji

Pinaka sarining tatwa sané mamargi

Mapaica sarwa kaweruhan sané utami

Tuhu guru pascat ledang sueca

Ngicén sikut becik ngawé sadya

Peteng dedet manados galang

Anggén nyunggi jagaté mogi inang

Suksma guru

Ring tengahing herdaya linggih guru

Sané sida nyupat sarwa papa klésa sané saru

Bejag bejug guru mayadnya

Nyolahang sastra aji pasaja

Sakéwala pait kenyung sang maraga guru

Idupé kakelidin jinah tanpa sangu

Joh sawat pangargané maumah

Tiosan maring bapaké madasi mauyag jinah

Yadiastun tusing mesuang lud

Bungah pongah sami kasalud