Sastra Panaweng Gering

Putu Éka Guna Yasa

Sumber Gagambaran; id.pinterest.com

Apa ané paling nyejehin yéning panglalah Covid 19 ené nyansan nglinggahang di guminé? Ngliunang jadmané mati suba pasti. Ngebekang anaké ané kélangan gegaén suba sinah. Yén suba tusing ngelah gegaén, biasané bromocorahé ané ngamaling, mégal, nyopét, masih ngliunang.

Ento panglalah ané tepuk. Sakéwala, sujatiné nu ada baya ané silib. Ulihan tusing tingalin, panglalahé ento paling nyejehin. Apa ento? Manusané kélangan rasa percaya. Ada ané kélangan rasa percaya tekén Widi ané ngadakang tur pasti nyidaang nundung geringé. Ada ané tusing percaya pemrintahé suba mautsaha anut tekén amongané. Ada masi ané tusing percaya tekén timpalné padidi, apabuin tawanga magaé di rumah sakit dadi petugas médis. Ane soléh, di nujuné ya gelem timpalné glantingina apang simalu maan ubad. Nanging, tepengan kahanan guminé buka jani, petugas médisé cara tusing maan tongos mapagubugan. Kéto masih nyamané ané mara teka uli magaé di dura Bali. Tusing tuah kélangan pangantungan isin basang, paminehné masi baat ulian katarka ngaba bibit penyakit tekén timpalné. Pakirimik pisagané suba pasti manganan tekén blakasé ané mara suud masangih yén suba nuturang jelék anak.

Yatna tur nuutin pawarah-warah pemrintahé mula patut! Sakéwala lebihan saling kadén sangkaning panawangé unduk panglalah Covid 19 ané tuna, ento tusing perlu. Kondén seken ilang uli keneh lelingsiré, ulian saling kadén, taun 1965 akudang jadma mati tan padosa di gumi ané kasengguh pulo surga ené.

Unduk gering, sasab, mrana ané nibénin guminé pamekas di Bali, sujatiné suba ada uli pidan. Tusing jani dogén. Makudang-kudang warisan sastrané terang pesan nyuratang kahanané ento. Nirguna panglingsiré masesuratan yéning tetamiané tusing dadi anggon pangancan nampénin alan guminé cara jani. Sanistané i raga mamaca, madyané i raga nganggon tetimbang, utamané i raga nglaksanayang isin tuturné ané anut.

Masangu sesuratan panglingsiré ento, i raga kaicén lawat yéning di masané ané suba liwat gering koléra taén kaangkenin pinaka penyakit ané ngranayang jagaté arohara. Geguritan Nengah Jimbaran, reriptan Ida Cokorda Denpasar nyritayang kahanan guminé katindih gering tan jangkayan. “….ada timbul penyakit kolera, pulo Bali anterone, orang susah terlalu, banyak sakit banyak mati, baik orang tua muda, baik orang agung, kebanyakan yang mudarat, sebab sakit terlalu keras nyakiti, bikin celaka orang. Kakawian ané mabasa Melayu ento nuturang gering koléra taén nglingsebin krama Baliné duk I Gusti Ngurah Jambé madeg nata di Badung. Sangkaning wisyan geringé mranén, liu anaké kasengsaran tur tusing bedik masih ané ngemasin mati. Buina, gering kolerané tusing tuah ngenén anak tua, sakéwala ané nguda masih patuh. Lénan tekén ento, geringé masih nyusup ka purian. Liu para agung teked wong kesaméné sakit keras mawastu liu anaké ngalahin yadiastun kondén gantiné mulih ka guminé wayah. Cutetné geringé tusing ngitung kawangsan. Lamun suba tusing waspada tur yatna, Ia bisa nglingsebin!

Tusing tuah di Geguritan Nengah Jimbaran, unduk wewidangan jagat Baliné katibén gering masih kacritayang di kakawian ané mamurda Kidung Ndérét. Reriptan ané mahbahang unduk perang pantaraning kadatuan Mengwi nglawan Gianyar, Badung, miwah Payangan sangkaning laksana momo I Sedahan Ndérét ento nglawatang unduk gering di Désa Sayan. Dugas bala wadwa Gianyar miwah Payangané nglurug Mengwi di Desa Sayan, dapetanga guminé ditu suba sepi. Para gustiné telah paglantes rarud. Ané masisa tuah kramané ané kageringan. Kidung Ndérét nyritayang “kawulané né mangiring, twara onya, masih enu liu, manahanang sakit, mati twara ia makutang, déning désane grubug, kawula payangan, manundung anaké sakit, magedi iba ngawanang, gustin nani suba rarud”. Warga Sayan katibén soroh gering ané madan kabayan miwah gudug. Cecirén anaké ané kena gering kabayan awakné berag, basangné bédog, kulitné semug. Gering gudug ceciréné ngomong padidi. Yén anutang tekén aab jagaté jani, gering kabayan patuh tekén lepra muah gering gudug tusing melénan tekén anak buduh. Krana suba tusing ada gunané, wadwa Payangané nundung anaké sakit ento ngauhang nuju ka Mengwi mapan para gustiné suba ngamalunin kemu.      

Lénan tekén Kidung Nderet, pustaka Rogha Sanghara Gumi masi nartayang unduk gering cukil daki. Pustaka Widi sastrané ento mabesen tekéning para raja Baliné, yéning pét pradé ada anak kalaran cukil daki ané tusing nyidaang ngubadin, ia tusing kalugra macelep ka kadatuan rajané. Apa tetujone? Pasti apanga sakité ento tusing énggal malalah. Apabuin anaké sakit tusing nyidaang ngwatesin pagubugané (social distancing). Suba sinah lakar ngliunang dogén anaké ané kena panglalah. Yén kanti gering cukil dakiné nibénin tur nyengsarain kramané, Ida Batara ngungseng pacang mawali ka kahyangan Idané sangkaning jagaté letuh kageringan. Yén adungang tekén putusan pemrintahé jani, pamutus pustaka lontar Rogha Sanghara Guminé patuh tekén karantina wilayah.

Pustaka Rogha Sanghara Gumi sujatinné maosang pét prade jagat Baliné katibén sasab miwah mrana sangkaning panalikan Kaliyuga miwah sasihé, sapatutnyané Sang Aji Bali miwah para panditané ané pinaka pangarep nundung sakancan geringé. Pustaka lontar warisan Majapahit nguni ento nlatarang unduk kahanan guminé yéning sayan sayah, gering mrana tan pegat, manusané telah ngebus dingin, mati nadak tan sida katulungin, Sang Aji Bali patut ngaturang guru piduka ring Hyanging Basukih, Hyanging Sagara, miwah Panghulun Danu. Lénan tekén ento, Sang Aji Bali masi patut ngaturin para panditané apanga Ida nguncarang wéda-wéda panundung sarwa mrana makadi Akasastawa, Bayustawa, Téjastawa muah upacara ané lénan. Pacaruan nyabran sasih anut panekan geringé masih patut kalaksanayang olih Ida Sang Aji Bali tur panditané sami.

Kéto sastrané ngicén pawarah-warah nepasin gering malarapan puja mantra stuti muah stawa kadulurin upacara. I raga sapatutné tusing dadi ampah tekéning pamarginé ento krana suba madasar baan sastra. Mula suba sapatutné Sang Aji Bali utawi para pemimpin Baliné stata ngradana ngrahayuang jagat. Pustaka Usana Baliné masih maosang, sadurung Ida  Sri Aji Jaya Kasunu madeg nata di Bali sasab, mrana, gering tan jangkayan nibénin gumi Baliné. Sakancan rajané ané ngasta karaton cendek yusa. Pinaka raja Bali, Ida Sri Aji Jaya Kasunu ngelarang tapa brata di sétrané salami abulan pitung dina. Sangkaning kapagehan bratan Idané, Bhatari Durga lédang mapica pasuécan malarapan ngamargiang pakéling rahinan jagat Galungan miwah Kuningan, nambakin wisayan I Bhuta Galungan. Di tanah muah natah Baliné kelir sakala niskalané tipis, ento makrana warisan pustaka Bali purwané ané katami jani liunan maosang panundung gering, sasab, mranané malarapan upacara. Sakéwala, anut ring panglimbak jagat sastra ané nlatarang pamunah gering tusing madasar baan upacara masih ada. Geguritan Keséhatan sané karipta olih Dr. Ida Bagus Rai nlatarang unduk tata cara ngamengin makudang-kudang gering malarapan antuk pangwruh modérn.

Dr. Ida Bagus Rai malarapan antuk Geguritan Keséhatan katah maosang gering ané taén nibénin jagat Baliné sakadi Malaria, Lépra, TBC, muah ané lénan. Nambakin geringé inucap, Ida mapatitip apanga i raga stata nyaga kaasrian pekarangan kantos angga sarirané. Ida maosang “pakarangané sampatang, makedas-kedas sai, luluné tambun-tambunang, ancungin api enjutin, umahé pang tetep bersih, pang tan ada sebun buyung, wiadin gaénang bangbang, sakakedik urugin, eda mayus, twara tuyuh amunapa. Unduk nyaga kabersihan angga sarira, Dr. Ida Bagus Rai mikélingin krama Baliné “mabaseh lima biasayang, satondén madaar nasi, sawiréh sing kena baan, apa kadén ané ngotorin, data-data bakat ambil, magenep bakat usud, dini-ditu majemakan, mawinan limané daki, antuk sabun umbah apang kedas”.

Ané pinih utama, kakawian Dr. Ida Bagus Rai duk warsa 1956 inucap ngicén panepas sakit TBC ané masaih tekén Covid 19. TBC muah Covid 19 ngranayang pinyungkan ring paru-paru, nuunang kateguhan angga (imunitas), lan nglalahin. Yadiastun pastika Covid 19 ganasan tekén TBC patitip Dr. Ida Bagus Rainé nambakin gering TBC patut kaanggén tetimbang. Ida nlatarang “Santukan TBC banget nglalahin, mangda yatna pisan, sasida kelidin, apang tuara katularan. Punapiké santukan patut yatnain, da marep-marepan, sareng sang sakit malinggih, ri kala ipun makohkohan. Samalihnyané sang sakit patut ajahin, mangundukang raga, mangda tan keni lahlahin, timpalé sapakurenan. Yén masaré patut ipun padidian, matilesang awak, anggén genahé asiki, da mailehan. Ri kala makohkohan angkebin gelis, antuk sapu tangan, lambéné mangda tan polih, bebesé makritisan. Piring-piring makamiwah gelas cangkir, pakakas madaar punduhang dadiang besik, genahé apang manéhan. Galeng kasur klambi anduk kamben cerik, miwah ané lénan pesuang jemuh-jemuhin, sajawanin ya kaumbah. Yén karasa sungkané ngawitin, wiadin katarka, ka dokter gelisiang mangkin, mangda tan sayan nyangetang.

Punika pawarah-warah Dr. Ida Bagus Rai pangawi Geguritan Keséhatan anut adung tekén utsaha nawengin panglimbak Covid 19 aab jagaté jani. Patitip sastra saking panglingsiré nguni, di Bali gering sasab mranané kapunahang majalaran pamargi sakala niskala. Nampénin Covid 19 sakalané i raga patut ngwatesin pagubugan utawi social distancing, rajin ngumbah lima, olahraga, ngajeng ajengan ané ngamertanin, muah ane lenan. Niskalané, i raga patut tan surud-surud nunas ica ring Ida Déwi Durga mapan ida panangkan wisya saha mertané sami! Ong Durga Déwi ya namah. 

Putu Éka Guna Yasa
embas ring Banjar Selat Tengah, Bangli, 6 Januari 1990. Mangkin dados dosén ring Jurusan Bahasa Bali Unud. Nerjemahang makudang-kudang lontar, pemenang Pemuda Pegiat Literasi widang jasa saking Paguyuban Duta Bahasa Provinsi Bali 2018. Kakawiannyané kawedar ring makudang-kudang média masa, wiadin ring cakepan luiré Bali Post, Pos Bali, Prabhajnana (I, II, III), Angripta Rum.