Dot Dadi PNS

Olih: I Wayan Kuntara

Sumber Gagambaran: Internet

“Aduh nrugtug tangkah gelahé Dé. Énggalan naé buka wébsété Dé! Sing sabaran gelah.”

“Adéng-adéng Tut, né sinyalé lélét sajan, mapan tuah nganggo sinyal hotspot hapé, lén misi kartuné émtri. Nah negak gén ditu Tut! Gelah macang pengumumané yén suba bakat gelah berkasné.”

“Jeg kadi rasa cara ipidan dugasé gelah lakar nyatuang isin keneh gelahé kapining Luh Déwi. Kéné san ba, tangkahé nrugtug, batisé ngejer, dikenehé jeg tuah nagih numbrag apang énggal nyidang nyambatang isin kenehé.”

“Bih... Kanti kéto né rasang jani Tut? Bayuné cara lakar nyambatang tresna tekén anak luh? Mémih... Men pidan éngkén, payu dugasé to kawales isin kenehé Tut?”

“Héhéhé. Sing Dé”

Jeg bengis sebengné Ketut Lélut disubané Madé Subakti matakon buka kéto. Lian ring ento, Madé Subakti tuah nyidang kedék ngengkel ditengahing atiné, mapan ia tusing bani kedék seken di arep Ketut Léluté, apa buin né maosang indik isin ati pastika ngaé brangti, anak suba tawanga Ketut Lélut basangné bawak.

***

Madé Subakti lan Ketut Lélut uli cenik suba dadi timpal rumaket. Uli SD ngantos SMA masuk di sekolah ané patuh, tongos negakné tusing taén maaniang. Keto masih nglanturang kuliah masih patuh ditu di Universitas Negeri Sakti, tuah jurusané dogén ané mabinayan. Madé Subakti nglanturang kuliah di jurusan Basa Bali, mabinayan tekén Ketut Lélut nglanturang kuliah di jurusan Bahasa Indonésia. Yén alih paplajahan Basa Bali lan Bahasa Indonésia anak tusing joh mabinayan. Kéto mawinan dikénkéné Ketut Lélut ngidih tulung tekén Madé Subakti ri kala ia tusing bisa ngaé tugas kuliah. Diageté bisa patuh tugasné, Ketut Lélut tuah tuyuh nyalin tugasé ento ka Bahasa Indonésia. Duh, mula liunan agetné I Ketut Lélut, apa buin uli cenik suba aget ngelah timpal dueg polos cara Madé Subakti ané tusing taén marérén maan juara kelas di sekolah.

Nanging ané jani lakar nyatuang agetné makadua. Disubané lulus kuliah aget pesan Madé Subakti lan Ketut Lélut saget suba nepuk ané madan Pembukaan Tés CPNS. Suba lumrah truna-truniné jani liu ané ngelah pangapti apang dadi PNS. Yén dadi PNS gajihné liu, maan pénsiunan, disubané tua idupé masih terjamin. Ento masih ané ngaé guminé jani suba baat mateteh baan liuné pengangguran. Makejang magarang, saling seluk, saling tusuk, saling ancuk apang nyidang dadi PNS. Tusing ada buin ané nyak madaki-dakian magaé ka cariké. Kéto masih ané ngaénang saka besik cariké ka tanjung, ilang, mentik dadi beton. Ulian liu ané nguber tahta, nguber ané madan kalegan ati akijapan mata, lan tusing rungu tekén tetamian panglingsir.

Nah, kéto masih Madé Subakti ajaka Ketut Lélut, patuh cara anaké lianan, ngelah keneh apang dadi PNS. Sasukaté nawang ada pakéling buka kéto, makadua nabdabin raga apang ngelah bekel nuju dinané matés. Lian Madé Subakti lian masih Ketut Lélut. I Madé Subakti anak suba lumrah di désa tawanga polos, jemet, dueg, tusing sombong. Duh, buka padiné misi nguntul. Biin kéto subakti ring sasuunan, subakti ring rerama, jeg patuh buka adané. Malianan pesan tekén Ketut Lélut anak suba liu krama désané nawang geginané sai mamunyah, malajah tusing taén, apa buin mabakti, méh tuah nuju dirainan utawi dinuju ada ditagihné mara ia nyakupang tangan ka sanggah. Nanging, uli dija kadén tekan agetné Ketut Lélut kanti nyidang lulus masekolah lan lulus kuliah?. Sekadi ujan anginé matampiasan ka baléné, minab ulian kretes-kretesan kaduegan Madé Subaktiné ngranayang Ketut Lélut nyidang lulus. Madé Subakti anak kamulan ngelah pangrasa sané olas-asih, ia tusing taén milih-milih matimpal. Apa buin ngelah timpal buka Ketut Lélut, uli cenik suba sesai ajaka, ia lascarya nerima kakirangan timpalné ento, dikenehné tuah mautsaha apang nyidang dadi timpal ané maguna. Aduh, Madé Subakti kamulan timpal sané sujati.

Nah, ané jani lakar nyritayang unduk dugasé Madé Subakti lan Ketut Lélut nadbadin raga satondéné milu tés CPNS. Sampun kacaritayang wau ring ajeng, Madé Subakti lan Ketut Lélut anak malianan pesan solahné. Kéto masi jani satondéné nuju dina matés, Madé Subakti sabilang dina geginané tuah malajah dogén, lemah peteng setata nyemak buku. Sawusan malajah ia setata nangkil ka sanggah nyakupang tangan, pangaptiné tuah besik, apang sida mamargi antar ri kala nyawab pitakén ring tésé. Dikénkéné wusan ngaturang bakti nglanturang ia malajah buin kanti ngedas lemah. Tuah keto dogén sabilang wai, mapan ia mara lulus, ajanian tusing ngelah pakaryan, dadiné nyidang nyekenang malajah. Lian ring Ketut Lélut, aduh, geginané sabilang wai tuah mamunyah ajak timpal-timpalné. Tuah ja ia anak ngelah paguyuban minum adané Sing Punyah Sing Mulih, mih, jeg suba cara parpol paguyubané, misi ngelah slogan masih, Tusing Ada Arak Ane Nyidang Ngae Ajik Punyah. Hahaha... Éngkenang mulih yén sing punyah-punyah? Yén alih uli adan paguyubané ajak slogané, ané dadi anggota ring paguyubané suba pasti ané kereng-kereng minum lan ané tusing demen ngoyong jumah. Wékawékawéka. Nah engsapang ento malu, jani nglanturang nyaritayang I Ketut Lélut. Sawiréh geginané tuah mamunyah sabilang peteng, ia tusing taén inget nyemak buku. Taén masih Made Subakti ngliwatin tongos Ketut Lélute Mamunyah. Dugasé ento ia tundéna meli goréngan ajaka méméné, mapan di tongos mamunyahné Ketut Lélut paak ajak sénggol désane. Ditu Madé Subakti ngaukin Ketut Lélut sada matakon.

“Tut, adi dini? Sing malajah? Mapan suba paak lakar dinané tés!”

“Nah Dé, binjepan lakar malajah De. Ngalih inspirasi malu dini. Mai bareng dini negak Dé!”

“Nah manian dogén Tut, gelah tundéna meli goréngan ajak mémé. Suba jantosanga di jumahan.”

Kéto pasautné Madé Subakti ri kala Ketut Lélut ngajakin negak bareng sinambi minum, nanging Madé Subakti nulak. Dikenehné Madé Subakti tusing ada kanti ngelah keneh ané tidong-tidong, ia tuah makenyem lan percaya tekén munyiné Ketut Lélut. Maosang indik Ketut Lélut demen mamunyah, ento tusing ngranayang Madé Subakti kimud matimpal, ento tuah ja pilihané Ketut Lélut nyalanang demené. Malianan ring kenehné Ketut Lélut, “Kanggoang kayang h-1 gén malajah, apang tusing énggal engsap paplajahané.” Aduh, kéto isin kenehné Ketut Lélut dugase Madé Subakti nyambat apang malajah. Ketut Lelut anak tusing taén malajah. Makejang bukuné ané ada di jumahan kapupul kagenahin di duur pasaréané. Sabilang wai ngidih tulung tekén méméné apang gaénanga banten, dinuju sanjané satondén pesu mamunyah, ia ngaturang bantené ento sinambi ngacep, “Duh, Ratu Sang Hyang Aji Saraswati, puniki sampun aturang titiang sesembahan. Dumogi Iratu nerima sesembahan titiang lan kanggeang kawéntenanyané. Pinunas titiang wantah asiki, gaénang ja titiang apang lulus Tés CPNS.” Sawusan ngacep buka kéto lantas buin ia pesu mamunyah. Keto dogen sabilang wai, bukuné tuah dadianga Bhatara, kabantenin dogén, tusing taén kawacén. Lén suba sing taén malajah, Ketut Lélut masih tusing taén nyakupang tangan ka sanggah. Aduh, Lelut... Lelut... Sing taén malajah, sing taén mabakti, nanging ngelah pangapti apang dadi pegawé negri

***

Kacarita mangkin mawali ka dina dugasé pengumuman hasil tés CPNS. Disubané ilang sebeng bengisné Ketut Lélut, kéto masi ilang sinyalé ané tunian lélét sagét dadi kenceng. I Madé Subakti lantas ngamalunin ngunduh berkas pengumumané Ketut Lélut. Aduh, jeg bagia pesan yén ngelah timpal buka Madé Subakti. Ningalin pengumumané dogén timpalné ucukanga maluan. Disubané bakata berkas pengumumané Ketut Lélut, katingalin misi adané Ketut Lélut di undagan kaping tiga. “Tut, cai lulus Tut. Di undagan telu adan cainé Tut.” Kéto munyiné Madé Subakti. Suba lumrah di tongosé ngalamar yén tuah ngalih asiki CPNS, pastika wenten tigang diri ané nilainé paling gedé lakar nglanturang ka tés salanturnyané. Dadosnyane I Ketut Lelut kasambat lulus tes SKD (Seleksi Kompetensi Dasar), lan lakar nglanturang ka tés SKB (Seleksi Kompetensi Bidang). Aduh gargita pesan manah Ketut Léluté tan kadi-kadi, kéto masih Madé Subakti liang manahné nyalamin liman Ketut Léluté sada ngorahang, “Rahajeng Tut.”   

Sawusan ningalin berkas pengumumané Ketut Lélut, Madé Subakti lantas ngunduh berkas pengumuman déwékné. Kadi rasa katibén baan samsak tangkahné, uli nrugtug laut cara pegat angkihané Madé Subakti ningalin berkasné. Yén tuturang dugasé ento, kadi rasa meli liang tusing lakaran maan, tuah sebet sungsut ané ada dikenehné. Di berkasé ia kasambat tusing lulus tés. Mih, tan karasa pesu yéh paningalan Madé Subakti, yén inget-inget utsahané lemah peteng malajah lan nunas ica tusing nekang apa-apa. Buin ia makeneh ngadungang nasibné ajak Ketut Lélut ané tusing taén malajah nanging nyidang lulus. Ring tengahing atiné Madé Subakti mautsaha apang tusing sebet, apa buin kanti ngenah sebet di arep Ketut Lélut. Ia ngedénang bayuné lan makeneh, “Minab tusing dini suecan Widhine bakat, sinah ada di tongosé ané lianan.” Ia lantas ngusapin yéh paningalané ané kondén kanti maan ngetél ka tanahé laut ngomong tekén I Ketut Lelut.

“Tut, gelah sing lulus.”

“Seken to Dé? Adi bisa? Monto téh dueg cainé, adi bisa sing lulus?”

Kéto patakoné Ketut Lélut tekén I Madé Subakti. Madé Subakti nak suba kadung belus baan sebetné, ia tusing ngarunguang munyiné Ketut Lélut apa buin lakar nyautin patakoné, ia lantas malaib ngamulihan. Ketut Lélut sada bingung, tusing percaya dikenehné yén Madé Subakti tusing lulus. Laut ia negak di arep komputeré. Dugasé ia negak di arep komputeré mara ia percaya ningalin adan Madé Subakti tuah ada di undagan kaping patpat. Tuah kalah selisih poin buin abesik ajak anak ané ada di undagan kaping tiga. Ningalin buka kéto laut Ketut Lélut ngomong dikenehné, “Hahahaha... Madak suba. Kéto suba upah anaké sok dueg. Sok ngorah-ngorahin. Sing lulus ndas cainé. Ané jani gelah né menang. Gelah ané lakar maluan dadi PNS.”

I Wayan Kuntara
Magenah ring Désa Bedulu, Kecamatan Blahbatuh, Kabupatén Gianyar. Alumnus Himasaba Undiksha warsa 2011. Sané mangkin makarya dados Penyuluh Bahasa Bali.