Makunyit di Alas

Olih: Ni Wayan Sudiartini

Liang sebeté dadi mahasisya anyar tusing nyidang ngelidin, kénkén pengengé ritatkala nyalanin ospék, nanging ento sampun kaliwatin antuk rasa bagia dadi mahasisya anyar. Tusing karasa sampun nem sasih mahasisyané nyalanang ané madan kuliah, 1 seméster sampun kalintang, nanging yadiastun suba pengeng kuliah, rasané ada kuangan, tusing jangkep rasané yéning tusing nyarengin organisasi ring kampus. Nyarengin organisasi ngaénang iraga sayan kréatif , sayan akéh polih wawasan.

Kacarita di kampusné Gék Tini akéh wénten organisasi sané dados kapilih, nanging Gék Tini tertarik tekén sinalih tunggil organisasi sané nyambung tekén jurusanné. Gelisang carita, Gék Tini sampun madaftar ring organisasi ento, ia jani wantah nyantos pengumuman lakar lulus utawi ten lulus. Gék Tini takut yéning ten lulus ring organisasi ento sawiréh ia wantah nyarengin organisasi ento dogén, yéning ia ten lulus, ia ten nyidang nyarengin organisasi ané lianan krana suba matutup pendaftaranné.

Rahinané mangkin rahina Purnama, suba patut yéning mabanten di sanggah lan di pura, pateh tekéning Gék Tini, ia sampun suud mabanten di sanggahné, jani ia lakar nyiapin banten anggo ia ka pura, sawiréh umahné Gék Tini paek tekéning pura, Gék Tini ka pura majalan, tusing ngaba motor. Ia majalan sambil gending-gending sambil malianan hp, tusing karasa ia suba neked di pura, nanging ia nepukin notifikasi di hpné, liang pesan manahné Gék Tini nyingak notifikasi ento, krana notifikasi ento isinné ia lulus di organisasi ané suba ia daftar ento.

Tusing karasa rahinané puniki sampun rahina Sukra, ento mawasta buin maniné rahina Saniscara punika mawinan Gék Tini suba libur, nyidang Gék Tini marérén akejep kuliah, maan malali anggo ngilangang sakit sirahé kuliah uling ranina Soma nyantos rahina Sukrané ené. Nanging pamuputné ia tusing nyidang libur ulian ia maca di grup yéning ia ada acara rapat organisasi bénjang ring kampus. Sujatiné Gék Tini tusing sebet pesan ulian tusing maan libur, nanging ia takut milu rapat ento ulian takut tusing bisa ngudyang, nanging ia lakar stata berusaha malajah sareng-sareng apang ia bisa.

Genah rapat ring rahinané mangkin ring kampus, ditu Gék Tini liu pesan maan timpal anyar, timpal-timpal Gék Tini punika ngawit saking timpal se angkatan nyantos timpal kakak kelas. Gék Tini ngorta ngajak timpal anyarné sambil kedék-kedék kanti tusing marasa yéning bapak pelatih ring organisasi punika sampun rauh. Makejang takut yéning wélanga ngajak bapak pelatih, nanging bapak pelatih milu masih kedék-kedék lan ia ngomong, “Semeton ngiring mulai rapat puniki.”

Masaut makejang mahasisyané, “Inggih, Bapak.”

Rapat puniki kakawitin antuk nyihnayang déwék soang-soang, Gék Tini mirengang makejang timpalné, ia makeneh yéning makejang timpal-timpalné ento umahné joh-joh pesan, nanging ia mireng ada anak ané umahné paek ngajak umahné Gék Tini, anak ento punika anak lanang, yéning tolih-tolih ia bagus, dueg, lan ia menarik manut Gék Tini. Terus tolih-toliha anak lanang ento ngajak Gék Tini jeg stata bagus dogen tepukna. Yadiastun suba jatuh tresna ring patemon sané kapertama, Gék Tini tusing juari matakon ngajak anak lanang ento, nanging ia jeg penasaran tekéning anak lanang ento. Rapat ring kampus sampun suud, Gék Tini sareng timpal-timpalné makejang ngorahang lakar mulih krana galah sampun soré.

Kacarita Gék Tini suba di marginé lakar mulih, nanging di marginé ramé pesan motoré ané ngeranayang macet di marginé, nanging di macet punika Gék Tini nepuk anak ané rasané ia tawang, seka bedik ia maekin anak ento, sayan nampek…sayan nampek, makesiab manahné Gék Tini, anaké ento anak lanang kakak kelasné Gék Tini di kampus, enyak tusing enyak ia harus nyapatin kakak kelasné ento, ulian ia suba kadung di sampingné marérén.

“Éhhhh Bli”, sebenehné suba lek pesan manahné Gék Tini nanging ia suba tusing nyidang ngudyang-ngudyang buin.

Nanging Bli ento masaut, “Lakar mulih, Gék?”

Masaut lantas Gék Tini, “Inggih Bli, yang malunan nggih, Bli.” Kondén bli ento masaut, Gék Tini suba ngebut krana ia suba elek pesan.

Sukat matepuk di marginé, Gék Tini sabilang luas ka kampus stata nyeh-nyeh atiné yéning lakar matepuk buin di marginé ngajak bliné ento. Jani Gék Tini suba di kampus lakar nyarengin rapat sané kaping kalih, ia luas uling jumahné selid pesan ulian takut matepuk ngajak bliné ento di marginé. Gék Tini langsung menék ka lantai 3 tongos ané lakar anggéna tongos rapatné, ia sibuk ngalihin tongos sané sampun katentuang olih ketua organisasiné nanging pamuputné ia nepukin tongos ento, lantas ia macelep kemu sambil ngorahang “Om Swastyastu” nanging ada ané nyautin “Swastyastu”, munyin anaké ané nyautin ento munyin anak muani, Gék Tini makeneh mirib suba ada ané teka malunan tekéning Gék Tini, disubané ia macelep ia makesiab ulian anak ané suba teka malunan ento bli ané ia kelidin di marginé, nanging lacur ia matepuk di kampus kalud wantah ajak dadua pesan ditu. Ditu ajak kadadua tusing ada bani ngorta, kanti suba ramé anaké teka mara luungan kenehné Gék Tini.

Tusing karasa rapaté sampun puput, nanging Gék Tini tusing konséntrasi ulian ia kondén nawang nyén adané bliné ento lan ia seken ja umahné paek ngajak umahné Gék Tini, Gék Tini nyobak matakon tekén kakak kelasné ané madan mbok Luh, “Mbok Luh, bliné to nyén adané ajak uling dija Mbok?”

Mbok Luh kedék-kedék sambil masaut, “Amen dot nawang, pedidi naé nakonin, Gék.”

Masaut biin Gék Tini, “Aduh lek tiang, Mbok.” Mbok Luh wantah kedék-kedék dogén nepukin muané Gék Tini suba barak ulian elek atiné.

Nanging Gék Tini enu penasaran tekéning bliné ento, krana suba tusing nyidang nahanang penasaranné ia mekin bliné ento lan matakén, “Bli, dados Tiang matakén?”

“Nggih dados, Gék,” bliné ento masaut cara anak bingung ulian tumbén Gék Tini enyak ngorta ngajak ia.

“Sira wastanné, Bli?” Gék Tini matakén ngulehin apang ngenah biasa-biasa dogén, nanging sujatiné suba dag dig dug serrr.

“Tiang Gedé Gék,” kéto Bli Gedé masaut. Buin lantas Gék Tini matakén, “Bli saking napi?”

Masaut bli Gedé, “Umah Tiang paek ngajak umah Gék nika.” Ditu Gék Tini suba lega krana suba suud penasaran, ia tusing nyautin buin munyiné bli Gedé, ia tuah kenyem-kenyem dogén cara anak buduh.

Ngancan wai, ngancan paek tekéning acara ring organisasiné Gék Tini, makejang panitiané suba ngancan sibuk ulian liu ané lakar sayagayang, pateh tekén Gék Tini sareng bli Gedé ané stata ngacan wai ngancan paek tur sai-sai ngorta wantah ajak dadua di kampus. Krana makejang umahné panitia ento pada-pada joh, makejang ngaé keputusan lakar nginep di kampus apang tusing kenyel ulah-alih mulih. Kacarita suba makejang geginanné suba pragat, Gék Tini ngajak Bli Gedé majanji lakar malali pesu, ajak kadadua ento mablanja meli nasi, mebalih konsér, lan makedékan bareng, kanti tusing inget yéning suba jam 12 peteng, jeg tusing masih emed-emed malali. Santukan sampun marasa suba peteng sajan, Gék Tini ngajak Bli Gedé lakar mawali ka kampus, disubané neked di kampus, tusing buungan timpal-timpalné nyuryakin ajak kadadua ento ané ngeranayang ajak kadadua ento muané barak.

Gelisang carita, geginanné di kampus suba suud, makejang lakar mulih ka umahné soang-soang pateh tekén Gék Tini sareng Bli Gedé. Santukan galah sampun sanja, Gék Tini jejeh yéning mulih padidian, nanging Bli Gedé koné lakar ngatehin Gék Tini mulih. Liang manahné Gék Tini ulian Bli Gedé enyak ngatehin mulih. Disubané neked jumah, Gék Tini tusing engsap ngorahang suksma tekéning Bli Gedé krana suba atehna mulih.

Rahinané mangkin mawasta malam minggu, Gék Tini sareng Bli Gedé suba majanji lakar malali ka Bedugul lakar ngalap strobéri, ajak lakar malali ka pasih ané paek ditu. Liang sajan manahné ajak kadadua ento, ditu di pasih saling makedékan sambil mabalih suryané sané ngancan engseb. Disubané suba emed maplalian di pasih, ajak kadadua ento lakar majalan mulih, nanging disubané suba paek ngajak umahné Gék Tini, jeg makesiab sajan ajak kadadua ento krana ada bapak Polisi ané sedeng patroli, Gék Tini takut pesan apabuin galah sampun peteng pisan, misi hpné Gék Tini mati, ia makeneh pasti reramané paling ngalihin. Nanging makelo sajan pemeriksaanné ento ngaé Gék Tini sayan jejeh. Disubané suud pemeriksaan, Gék Tini énggal-énggal lakar majalan mulih apang tusing wélanga neked jumah. Nanging lacur Gék Tini mara sajan ngematiang motor jeg sagét suba baanga munyi ngajak méméné, nanging Gék Tini tusing nyangetan krana ia nmarasa yéning ia suba pelih.

Gék Tini ento anakné gaul pesan, ia masih demen cara anak bajang lianan ané demen maplalianan sosmed, kacarita ia jani kari mukak ané madan Instagram ia ditu lakar nga-posting foto ané ibi dugas malali ngajak Bli Gedé ento, yadiastun ia ngajak Bli Gedé kondén madan madamar di carik, nanging ia suba yakin yéning Bli Gedé ento anakné tusing ngéndah-ngéndah, nanging ia nyingak ada notifikasi, ada anak luh ané nge chat Gék Tini di Instagram, anak luh ento mawasta mbok Kadék, mbok Kadék ia matakon tekén Gék Tini, “Om Swastyastu, ampura Tiang jagi matakén, ajan kéh Gék kenal ngajak Bli Gedé?”

Gék Tini sebenehné bingung tekén pitakén Mbok Kadék ento nanging ia nyautin dogén, “Swastyastu, Mbok, inggih tiang kenal ngajak Bli Gedé.”

Buin matakén lantas mbok Kadék, “Kenal dogén, napi mademenan, Gék?”

Gék Tini masaut buin, “Ten mbok, tiang wantah matimpal.” Lantas Mbok Kadék ngorahang gatra ané ngaé Gék Tini bengong akejep ulian makesiab.

“Inggih Gék, ampura dumun nggih, tiang tunanganné Bli Gedé, tiang ibi nepukin Gék, sareng Bli Gedé malali ka Bedugul.”

Gék Tini masaut, “Ampura nggih, Mbok, tiang ten nawang yéning Bli Gedé suba ngelah tunangan, jani tiang lakar ngejohin Bli Gedé.”

Uling sekat ento, sabilang nepuk Bli Gedé di kampus Gék Tini makelid. Bli Gedé terus nga-chat Gék Tini ngorahang ia ngidih pelih ulian suba nguluk-nguluk Gék Tini, Bli Gedé masih ngorahang yéning ia suba suud ngajak tunanganné. Bli Gedé ngajakin Gék Tini matunangan, nanging Gék Tini tusing nawang lakar enyak utawi tusing. Ia marasa suba nyakit ati ulian Bli Gedé nguluk-nguluk, nanging ia demen masih tekéning Bli Gedé.