Majalah lan Malajah

Olih : IDG Trinandita

Sumber Gagambaran: https://pixabay.com

Sané kawacén puniki wantah reriptan saderana pisan. Akéh nyengguhang artikel utawi ésai taler wénten sané maosang opini. Napi ja punika sinah sampun wénten sané niténin lan tan perlu bligbagang malih. Artikel puniki mabasa Bali. Kakardi olih nak Bali. Embas ring Bali tur seneng mabasa Bali. Kasurat mabasa Bali sangkaning seneng lan rumasa bangga ring basa Bali. Yadiastun basa Indonésia taler patut plajahin. Napi malih uning akéh basa panegara tiosan. Sinah akéh sané jagi kauningin pastika becik pisan. Mapan basa punika penting kaanggé melajahin kebudayaan panegara tiosan. Wénten nak maosang yéning mikayun uning adat lan budaya satunggil panegara rarisang plajahin basa panegara inucap. Yéning uning ring basa Bali kémanten minabang sané kauningin wantah parikrama wargané ring Bali kémanten. Minab kadi asapunika kawéntenan pangripta artikel puniki. Yéning wénten toris saking dura negara minabang napi sané kasambat pastika jagi nénten kauningin. Punika kawiaktiané basa punika.

Ngeraris ngelantur indik reriptan puniki. Minabta wénten pikenohnyané utawi nénten wénten pikenohnyané punika mewali ring sang sané ngwacén ngicéninin paweweh. Pangripta wantah ngawi kémanten madasar napi sané wénten ring manah utawi kayun sang penulis. Minab malarapan ring napi sane polih kawacén tur kaaksi ring pakibeh jagaté. Katulis sangkaning seneng nulis yadiastun risapu napiné naénin pengawi nénten uning napi sané katulis punika. Saantukan medal sakadi toya ring pancoran. Tan prasida katekepin. Yéning pancoran baosang pastika wénten lan tan wénten ngereh toya pancoran tetep ngecorang toya. Minab sekadi punika taler daging pikayun utawi pamineh i manusa tan naening enyat tur satata madaging yadiastun sampun kamedalang sakémawon tetep wénten sané jagi kamedalang. Dumogi sané kamedalang punika prasida mapidabdab becik. Yadiastun wantah akidik. Nak wikan maosang sekadi damuh yadiastun akidik sakémawon prasida mapikenoh. Yéning para jana baosang minabta sami pikayun lan pidabdab nyané prasida ngawinang kabecikang jagaté.

Raris yéning maosang nguwacén reriptan sinah matiosan. Yadiastu ngeripta lan ngwacén tan dados pasahang. Sangkaning ngwacén raris medal pikayun jagu ngeripta kekawian. Minabta ngaripta sakadi napi sané kawacén. Kasengguh polih inspirasi. Boya nyiplak utawi nyalin.  Ngwacén punika wantah parikrama sané nyenengin utamin ipun ring sang sané seneng ngwacén. Yéning nénten seneng pastika jagi doh jagi ngwacén reriptan sané wénten. Napi malih reriptan sané katulis antuk penulis sané nénten terkenal. Minabta rumasuk reriptan puniki. Pastika jagi kaliwatin utawi nénten kawacén. Yéning baosang nénten seneng pastika diwéntené nak ngemaang ngidih buku utawi cakepan gratis pastika jagi nénten kawacén. Sakémawon yéning sampun seneng ngwacén minabta numbas jagi kabélanin. Punika wantah pidabdab warginé sané sampun lumrah ring jagaté. Ngwacén punika wantah akéh pisan. Wénten seneng nguwacén orti. Orti taler akéh wénten orti ngenénin politik, sosial, budaya, kaamanan, olahraga lan sané tiosan. Wénten taler orti parikrama kahuripan sekadi tindak pidana, penganiayaan, penipuan, orti kecelakaan lan orti tiosan. Orti sekadi punika kawastanin informasi utawi berita. Berita punika taler becik kauningin sumangdané dados kaanggé ngelimbakan pengetahuan sosial pastika mawiguna ring kahuripan puniki.

Reriptan sané kabaos sastra modérn sakadi satua cutet, puisi mabasa Bali taler modérn, gegonjakan, artikel muah sané tiosan wantah parikrama nagingin galah istirahat utawi mangaso risampuné ngambil pakaryan serahina. Sané mangkin ngwacen sami punika dados kamargiang ring “Hapé Pintar”. Irika majanten wénten sané mawasta Majalah Suara Saking Bali. Majalah puniki sayuwakti ngulangunin sangkaning majalah puniki prasida ka-download gratis. Kawacén ring piranti hapé. Yéning kayun dados cétak. Pangremba majalah puniki sayuwakti teleb tur sayuwakti waged ngaryanang majalah puniki. Pastika sangkaning rasa angob lan sutindih ring kawéntenan basa Bali lan sastra Bali modérn sané patut katiténin tur kalimbakang puniki. Taler kadasarin antuk pikayun jengah ngalestariang basa Bali druwén iraga sareng sami. Yéning saking medal ka pertama utwi édisi kaping siki baosang pastika majalah puniki sampun sayan ngalimbak kawéntenané. Majalah mabasa Bali pastika kawacén lan karesepang olih sané uning mabasa Bali. Pastika pemilet nyané nénten sakadi yéning majalah punika mabasa Indonésia, napi malih yéning mabasa Inggris pastika sané ngwacén pacang ngalimbakang malih. Sakémawon kawéntenan Majalah Suara Saking Bali puniki patut polih aprésiasi utawi penghargaan saking warginé sami taler ring sang sané nguwasa nguwasi jagaté ring Bali.

Majalah Suara Saking Bali sané mangkin sampun embas utawi majanten ring édisi kaping 36.  Sampun dados kasengguh makéh.  Majanten patut sampun nyansan akéh pamilet lan panyanggra sané nyarengin nagingin sakancan reriptan mabasa Bali irika. Taler sampun nyansan becik pakantenané sangkaning sampun menék bajang. Sinah sampun uning mapayas. Punika yéning inargamayang. Sami sangkaning Sang Pangrémba sampun waged indik majalah punika. Niki sané patut kasuksmayang. Majalah puniki prasida dados genah malajah. Malajahang raga, ngiasayang raga tur ngalimbakang sastra lan budaya Bali. Antuk ngawerdiang pakibeh basa Bali ring warginé sami ring jagat Bali puniki. Minabta ngantos dura Bali pastika taler sayan ngalimbak. Minab becik pisan karasa yéning sami prasida mikukuhin kahanan basa lan sastra Bali puniki. Yadiastun wantah basa Bali latin kémawon. Napi malih yéning prasida nelebin sastra lan aksara Bali minabang akéh pangaweruh sané jagi kapolihang. Pastika akéh pangaweruh sané wénten ring lontar sané durung kauningin riantuk katambetan ring ajah-ajah ngenénin aksara Bali punika. Sakémaon ngarajegang sastra Bali modérn lan sastra Bali tiosan antuk basa Bali latin minabang sampun dados pidabdab sané becik lan utama. Ngiring malajah ring Majalah Suara Saking Bali puniki. Majalah puniki dados genah ngalimbakang sastra Bali druwén iraga sami. Pinaka dados genah malajah. Puniki sané patut kasuksemayang. Cutetné Malajah saking Majalah. Dumogi.

Saniscara, 8 Juni 2019

I Déwa Gedé Trinandita
urati lan seneng ring parikrama Bali.