Patapan Ai

Olih: Putu Éka Guna Yasa

Sumber Gagambaran; https://pixabay.com

Manawi wantah ring Bali wénten tatagama sané nyaratang mangda kramané ngaturang bakti nyabran rahina ring Ida Sang Hyang Surya. Yadiastun nénten sami, para panditané tatkala prabhata satata nyurya séwana nyeledihi kramané sané kantun leplep sirep ring tila puspané.

Napi ngawinang para panditané sami ngamargiang puja ring Ida Batara Surya? Sami kramané uning, sangkaning surya wénten kauripan ring jagaté. Yadiastun kénten, napiké surya ngranjing ring pawilangan sarwa maurip? Sami taler pawikan, ring jagaté sané ketah kabaos sarwa tumuwuh sané maurip kepah dados tiga inggih punika punyan-punyanan, baburon, miwah  manusa. Nungkalik. Surya sané kabaos nénten maurip ngicen kauripan. Napi kawiaktiané surya punika?  

Sané sampun ketah, surya wantah paragayan galang. Sané sida kapanggih, endag ida saking kangin tur surup ring sisi kauh. Sangkaning surya miwah pinceran jagaté wénten peteng lemah, rahina ratri, masan ujan, panes, miwah sané tiosan.

 Yéning selehin malih, wénten sujana sané maosang surya punika wantah pupulan api ageng rikala Ida Sang Hyang Parama Kawi ngaréka sadaging jagaté. Kocap, jagat, wulan, tranggana utawi bintang kareka antuk panca maha buta: pratiwi, apah, teja, bayu akasa. Panca maha buta sami wénten ring bhuwana agung, taler ring bhuwana alit. Punika ngawinang, ri kala ida Sang Jiwatma lepas saking angga sarira, panca maha buta inucap mawali budal ka pomahannyané: jagat. Pratiwi mawali ka tanah. Apah mawali masikian ring toya. Bayu mawali mur manados angin. Sané mawit saking akasa, tunggil malih ring langit. Téja agni, mawali ka Siwa Raditya.

Akéh pisan yasan Ida Sang Hyang Surya ring jagat miwah sadaging jagaté. Ring sang sané pacang nangun tapa, Ida Mahaguru. Yukti Ida taler paragayan Batara Guru, duaning wantah Ida sané polih gelar Siwa Raditya. Siwa taler kabaos Batara Guru, ri kanjekan Ida ngicénin pangajah-ajah ring para déwatané sami, pamekas ring rabin Ida: Déwi Parwati tatkala ngincepang Tantrané. Ida taler Mahatapa, doning tan kahanan obah.

Maosang indik tapa, ketah kauningin sadurung Sang Panca Pandawa maperang tanding ring wadwa korawané, Ida Sang Prabhu Kresna nganikain mangda sami ngelarang tapa. Yudhistira katitahang nuju telenging wana kasarengin rabin Idané Déwi Drupadi. Sang Bima tangkil ring Ratuning Wanara Hanoman. Sang Nakula-Sadéwa ngelarang tapa ring tengah telagané mangda molihang waranugraha saking  Batara Aswin. Asapunika taler Sang Arjuna ngelarang tapa ring Gunung Kailasa mangda polih kasaktian saking Batara Siwa. Saking pratiwimba punika, akéhan jadmané ngelarang tapa sangkaning perih, sangkaning wénten sané kaulati, wénten sané kaarepang, pamekas wénten pinunas.

Doh pisan, ring kahanan Ida Sang Hyang Surya. Ida paragayan sunar, agni tanpa wates. Matapa tan paprih tan papabuat. Yadyastun ri kala Ida masunar, petaniné ngrenggengang ujan. Jadmané ring kota, ngortaang panes. Jadmané ring kantor ngarémon opek. Sopiré ring mobil kebus, osek, sesek. Kéwanten Ida tan obah, ida langgeng ngamargiang darma miwah tapa. 

Sané mangkin yéning wénten anggota déwan lekig tan naenin rapet napi malih masusupan ring désa-pradésa nyelehin kahanan masyarakat, sakéwanten tatkala pacang pemilihan satata nganken angga paling sutindih, paling satia, paling merakyat, miwah paling-paling sané lianan. Manawi, ipun patut nuléngék menék, nakénang suksman tapa miwah yasa, ring sang mahatapa!   

Putu Éka Guna Yasa
embas ring Banjar Selat Tengah, Bangli, 6 Januari 1990. Mangkin dados dosén ring Jurusan Bahasa Bali Unud. Nerjemahang makudang-kudang lontar, pemenang Pemuda Pegiat Literasi widang jasa saking Paguyuban Duta Bahasa Provinsi Bali 2018. Kakawiannyané kawedar ring makudang-kudang média masa, wiadin ring cakepan luiré Bali Post, Pos Bali, Prabhajnana (I, II, III), Angripta Rum.