PKB, ‘Klingkang-klingkung Jalan Mula’; Bayu Pramana Nincepang Wirasa, Wirama lan Wiraga ring Awak

Olih: I Gedé Sarjana Putra

Potrekan Panitia PKB warsa 2019

Napi sané kasurat iriki, nénten ja mamanah éwér saking pamargin Pésta Kesenian Bali (PKB). Napi malih PKB sampun mamargi petang dasa siki warsa lintang. Niki wantah nyuratang akedik pikobet saking wargi sané rauh saking seniman, budayawan, akademisi miwah wargi sané tiyosan sané wénten uratian ring PKB.

Ritatkala titiang nyurat opini PKB niki, madasar antuk ‘Bayu Pramana,’ titiang mireng gending Dék Ulik ‘Bangkung Ngamah Gula.’ Titiang sakadi polih idé, antuk pamargin PKB sakadi ‘bangkung ngamah gula,’ sekadi ‘klingkang klingkung jalan mula.’ Sakéwanten, napiké patut sekadi punika, utawi sampun mamargi antar lan becik? Wénten malih indik pamarginnyané napi sampun mamargi nagingin dasar pemargi antuk Bayu Pramana.

Saking pemerintah saking wit PKB, sampun mamanah becik, ngaturang sané utama antuk warga Bali, tamiu doméstik lan tamiu saking dura negara. Napi malih jinah ngalaksanayang PKB sampun katingkatang nyabran warsa. Para seniman, budayawan, sampun polih genah utama lan polih penghargaan, miwah seniman saking tanah Jawi lan dura negara polih masolah. Tiosan punika, pembinaan kesenian lan budaya sampun mamargi ring sajebag désa.

Wiadin asapunika pemargin PKB nyabran warsa, ten surut-surut wénten pikobet saking wargi sané sampun aturang titiang wawu. Pikobetnyané ngawit genah parkir, peken utawi warung sané wénten ring sisi kauh Art Cénter muah sasolahan sané kasengguh amontoan, utawi bangkung ngamah gula, klingkang klingkung jalan mula, sakadi gending Dék Ulik.

Yéning ten iwang, dasa warsa sané sampun lintang, titiang polih matakén saking budayawan lan penulis Aryantha Soetama. Pitakén titiang, “Napi mawinan PKB mamargi amontoan dogén?’ Aryantha Soetama lantas nyaurin égar, “Yéning pamargin PKB wantah amontoan dogén, minabang budaya lan seni Bali sampun sami kakeduk saking sémér seni budaya Bali. Ngalantur ten wénten napi malih ring sémér. Diastun asapunika, angga seniman sané kaloktah sampun lesu ngrereh kautaman seni lan budaya Bali.”

Dumun, titiang satinut napi sané kawedar olih Aryantha Soetama, sami sampun telas makeduk ring dasar sémér budaya Bali. Sakéwanten wénten pikobet titiang, napiké sané kakeduk punika sampun jangkep, Wirasa (Idep), Wirama (Sabda) lan Wiraga (Bayu). Napi sané makeduk wantah Wirama lan Wiraga, sakéwanten idepnyané (Wirasa) durung kapanggih! Utawi wénten malih sémér sané tiosan, sané durung makeduk.

Wénten manah titiang, sapunapi yéning pemargin PKB kelaksanayang sekadi pemargin piodalan pura, sekadi piodalan ring Pura Puseh, umpaminnyané. Pemargin PKB ring nyabran warsa wantah PKB sané alit, ring nyabran limang tiban kamargiang PKB madya, muah nyabran selaé tiban mamargi PKB agung. Saking nyabran warsa, seniman, budayawan, pedagang kari polih kalangan masolah.

Tiosan nika, pemerintah sampun kasengguh ngamargiang lestari seni lan budaya. Nyabran limang warsa, kalaksanayang PKB Madya. Ring iriki, sané kasengguh seni lan budaya utama ring PKB sedurungné jagi kajudi malih. Ring PKB Ageng, sinamian sané luwih mautama ring PKB sané sampun lintang lan sané anyar lan mautama kasolahang. Ring iriki nemuang sasolahan sané sampun lintang, lan sasohalahan modérn. Tiosan punika, ngerauhang seniman saking Jawi lan Dura Negara antuk nandingin pemargin seni lan budaya Bali.

Wirasa, Wirama lan Wiraga

Wargi Bali sané mawit Bali, sakadi petani sané nandur pangan, nelayan, pedagang, miwah pakaryan tiyosan sampun sarahina ngamargiang daging tatujon sané wénten ring PKB. Tiosan ngamargiang pangupa jiwa, wargi Bali sampun nyarengin mapakardi seni lan budaya Bali. Wusan ngamargiang pangupa jiwa ritatkala semeng, ring soré wénten sané nandurin karang awak antuk ngalengkara aksara, mawirama, ngarawit gong utawi rerindikan, lan sané istri wénten sané masolah utawi nyangkepang antuk daging upakara sarahina utawi nyabran sasih.

Nika mawinan, wargi Bali ten wénten sané palas saking Wirama, Wiraga lan Wirasa. Napi malih ring piodalan ring pura, kebisaan sané wénten ring awak, katur ring Sanghyang Widhi. Wiadin mangkin PKB madasar antuk Bayu Pramana, mawinan wargi Bali sampun jangkep gagelaran Wirama, Wiraga lan Wirasa, sujatinnyané sami ten wénten palas. Bayu Pramana jagi ngawetuang manah égar, liang selanturnyané polih galah malih antuk merarian, mangda Bayu Pramana ten osah ring awak. Tiosan punika, Bayu Pramana nénten jagi malasang antuk Wirama, Wiraga lan Wirasa.

Catetan: Artikel puniki polih jayanti I ring lomba menulis artikel PKB warsa 2019

I Gede Sarjana Putra
embas ring Desa Titab, Busungbiu, Buléléng, 8 Séptember 1970, ring Désa Titab, Busungbiu, Buléléng. Masekolah SD, SMP, SMA ring Buléléng. Mangkin makarya dados Wartawan Koran Harian Fajar Bali. Taler sampun ngamedalang cakepan sané mamurda ‘Cetik Taluh,’. Makekawian nganggen basa Indonesia wiadin Bali. Puisinnyané taler sareng ring ‘Antologi Puisi Klungkung Tanah Tua Tanah Cinta.’ Naanin dados Juri Monolog PKB warsa 2006, partisipan PKB 2005 ring ‘Pesta Baca Puisi dan Keroncong.’ Mangkin meneng ring Perum Wira Kumala Asri, E1, Banjarangkan, Klungkung, Bali. Email: sarjana.fajar@gmail.com