Koesno: Bapak Proklamator rikala Kantun Alit

Soekarno rikala masekolah ring HBS

Idadané uning sira sané ngwacén téks proklamasi daweg 17 Agustus 1945? Pastika sampun uning. Ipun wantah Koesno Sosrodihardjo. Koesno Sosrodihardjo? Sira nika?

Dumun daweg kantun masekolah, rikala polih pelajaran sejarah ngenénin indik proklamasi, pastika idadané arang pisan utawi nénten naanin mireng aran Koesno Sosrodihardjo. Sané uningin idadané, sang sané ngwacén téks proklamasi punika wantah Soekarno utawi Sukarno. Raris sira sebenehné sané ngwacén téks proklamasi punika? Koesno Sosrodihardjo napi Sukarno?

Koesno wantah “nama kecil” utawi aran Sukarno rikala kantun alit. Manut biografi Sukarno sané kasurat antuk Cindy Adams sané mamurda “Penyambung Lidah Rakyat”, Koesno utawi Sukarno embas tanggal 6 Juni 1901. Dane embas ring Surabaya dina Wraspati Pon oka saking Radén Soekemi Sosrodiharjo sareng Ida Ayu Nyoman Rai Srimben, saking Banjar Baléagung, Kelurahan Pakét Agung-Buléléng. Sukarno maduwé mbok sané mawasta Sukarmini.

Rikala embas, Soekarno mawasta Koesno, utawi jangkepnyané Koesno Sosrodihardjo. Sosrodihardjo punika kaambil saking aran bapannyané. Nanging, sangkaning sakit-sakitan, wastannyané kagentosin manados Soekarno. Aran punika kaambil saking aran ring wiracarita Mahabharata inggih punika Karna. Dané magentos aran manados Soekarno ring Désa Pojok, Kecamatan Wates, Kabupaten Kediri.

Daweg kantun alit Sukarno masekolah ring Tulung Agung, raris pindah ka Mojokerto inggih punika ring Eerste Inlandse School ring genah bapannyané makarya dados guru. Juni 1911 Soekarno pindah ring Europeesche Lagere School (ELS) sané maduwé tetujon mangda danganan katerima ring Hogere Burger School (HBS). Sausan masekolah ring ELS dané nglanturang ka HBS. Irika dané kacunduk sareng H.O.S Tjokroaminoto pamucuk ring organisasi Sarékat Islam lan guru Sukarno. Sangkaning didikan H.O.S Tjokroaminoto sané keras, Sukarno polih akéh paplajahan, jemet lan dané ngwacén akeh literatur. Tamat saking HBS, Juli 1921, Sukarno kuliah ring Technische Hoogeschool te Bandoeng (mangkin ITB) ngambil jurusan téknik sipil lan polih gelar insinyur warsa 1926.

Sané mangkin, dané kakenal dados Bapak Proklamator miwah présidén Indonésia sané kapertama sareng Moh. Hatta. (Reriptan puniki kabasabaliang saking makudang-kudang sumber antuk Supartika)