I Labu

Olih: Luh Suci Armini Putri

Ada anak balu madan Manik Maya. Ia idup padidiana. Kurenané suba makelo ngalain. Ia masi tusing ngelah pianak. Manik Maya ngoyong di désa, di tongos ané sepi pesan.

Gaginané tuah ngurus abian ané misi papulaan, cara tabia, sawi, lan waluh. Asilné adepa di peken. Sedek dina anu, Manik Maya nyiamin pula-pulaan di abiané. Lantas ia nepuk ada panak cicing berag, buluné putih kedas. Ulian pedalema lantas ajaka mulih tekén Manik Maya.

Kuluké ento lantas ubuhina tekén Manik Maya. Adanina I Labu. Sabilang wai I Labu baanga ngamah, kayehanga, lan setata ajaka maplalianan. I Labu sangkola, usu-usuina tekén Manik Maya.

Sayan makelo I Labu sayan ngedéang. I Labu dadi kuluk ané satya tekén Manik Maya. Kija Manik Maya luas I Labu setata nugtug. Yén Manik Maya madagang ka peken, I Labu pragat nugtug lan ngantiang Manik Maya di warungné. Yén Manik Maya mulih mara ia milu mulih.

Kéwala jani suba duang wai Manik Maya tusing madagang ulian gelem. Mara dadian abedik, ia maksaang madagang. Yén tusing madagang, ia lakar tusing madaar.

Di kalané Manik Maya lakar majalan ka peken, ia ngalih-alihin I Labu.

"Mih dija lakuna I Labu nah? Méh mirib I Labu enu ngumbang."

Kéto ia makeneh.  Kalaina lantas tekén Manik Maya.

"Tepuka sing ada jumah dong aliha ka peken," kéto nglantur ia ngrenggeng.

Disubané neked di peken sagét jeléanga kenehné. Manik Maya tusing ngasén iban. Ia lantas abana ka rumah sakit. Ulian suba sanget gelemné ia kanti rawat inap.

I Labu tusing nepuk Manik Maya jumah. Aliha ka peken kéwala tusing masi tepuka. I Labu ngoyong di warungné Manik Maya ané suba matutup.

Peteng lemah I Labu satya ngoyong ngantiang Manik Maya. Ujan, kebus, dingin tusing ngaé ia magedi. I Labu tuah ngidaang ngalih amah uling anaké madagang di peken. Di kénkéné lacur ia tusing maan amah-amahan.

Suba awuku I Labu tusing maan ngamah. Awakné jani berag.  Buluné ané kamula putih kedas suba sayan selem ulian daki. Disubané I Labu berag tusing madaya, ia tuah ngidaang medem.

Sedeng itep I Labu medem dingeha munyin nak luh teka. Limané naké luh ento ngusuhin awakné I Labu ané daki.

"Mirib ené majikan awaké ané teka," kéto ia makeneh.

Awakné makaukud sakit. I Labu ngangsehang bangun.

"Kong...kong...kong...," I Labu kendel. Sambilanga nguis-nguis ikutné nglitis ningalin Manik Maya ané setata antianga.

Manik Maya pedih ningalin kulukné berag.

"Mih pedalem I Labu kanti berag ngantiang déwéké mulih".

I Labu baanga ngamah lan kayehanga kanti kedas buluné. Bagia Manik Maya ningalin kulukné suba kedas. Kéto masi I Labu kendel ningalin Manik Maya suba seger.