I Wayan Gobiah

I Wayan Gobiah embas ring Désa Panjer, Kecamatan Kesiman (mangkin Kecamatan Dénpasar Selatan), Kabupaten Badung (mangkin Kota Dénpasar), kirang langkung warsa 1898 saking kulawarga tiwas. Reramanipuné maduwé pondok ring Panjer sané kawangun ring tanah duwén Puri Kanginan Kesiman. Pondokipuné punika nénten kapiara duaning pepesan katinggalin. Reramanipuné dados parekan ring Puri Denpasar antuk raja Tjokorda Dénpasar. Raja puniki sané dados pamucuk rikalaning jagat Badung nyiatin Belanda sané mawasta Puputan Badung 1906. Rikala Puputan Badung, Gobiah kantun alit. Kaajak ka Lombok olih reramanipuné ngiringang Ida Tjokorda Alit Ngurah, putra saking Raja Dénpasar ngungsi irika. Panadosné, rikala alit ipun naanin meneng ring Lombok.

Warsa 1907 antuk titah Ida Tjokorda Alit Ngurah, Gobiah kasekolahang ring sekolah Kelas Dua ring Lombok. Sekolah puniki wantah kantos kelas tiga. Warsa 1910 Gobiah tamat kelas tiga. Minab sangkaning waged, ipun kakirim ka Singaraja ngalanturang masekolah ring Normal Cursus. Iriki ipun kadidik dados guru, tur polih sangu 5 ringgit. Sinalih tunggil sané dados gurunipuné irika wantah Mas Nitisastra, guru sané akéh ngamedalang buku-buku pelajaran lan ring buku punika wénten sané madaging cerpén modern mabasa Bali.

Warsa 1912, Gobiah kaangkat dados guru ring sekolah Kelas Dua ring Dénpasar, inggih punika sekolah sané magenah ring sisi kelod alun-alun Puputan Badung. Yéning indiké puniki sayuwakti patut sakadi sané kasusun antuk Wayan Simpen, dadosné Gobiah sampun dados guru rikala mayusa 14 tiban, lan dados kanikaang anom pisan sampun prasida dados pendidik. Minab indiké punika patut, sangkaning daweg punika nénten akéh wénten anak sané terdidik tur siap dados guru.

Rikala makarya dados guru ring Dénpasar, Gobiah nénten maduwé genah madunungan sané netep, duaning ipun nénten maduwé pondok sané pasti. Panyumu ipun naanin meneng ring pondok reramanipuné ring Panjer sané nénten wénten miara, raris pindah ka Kesiman, selanturipun meneng ring genahné I Wayan Reta, sisianipuné sané salanturipun dados pendiri miwah pengelola Yayasan Dwijéndra. Maduwé pakaryan pinaka guru, Gobiah taler maduwé bakat ring widang seni rupa minakadi makarya sampiyan, seni suara, miwah seni pertunjukan lan makarya sekaa ‘Arja Roras’. Yéning selehin saking kawagedanipuné ring widang seni, pastika sampun Gobiah punika wantah guru sané akéh maduwé kabisan.

Warsa 1919 ipun kaangkat dados kepala sekolah utawi menteri guru ring sekolah Kelas Dua ring Mengwi, Kabupatén Badung. Warsa 1921, ipun taler malajahin ilmu kebatinan ”Susila Dharma” sareng sawitrannyane tur maguru saking R. Atmodjo Koesoemo. Manut Simpen AB, ilmu kebatinan punika wantah ilmu dasar indik kaluwihan. Belandané ngelarang aliran punika krana kaangep bahaya tur R. Atmodjo Koesoemo kaantukang ka Jawa.

Rikala makarya ring Mengwi, Gobiah matemu sareng anak istri tur masakapan sareng Si Luh Rupek saking Banjar Lebah, Désa Gulingan. Maduwé pianak adiri, kurenanipuné sungkan raat ngamasin mati. Gobiah sedih pisan ring indike punika tur ipun néwék ngupapira pianaknyané. Nénten doh saking galahe punika, pianakipuné taler sungkan kantos ngalahin. Matimpi-timpi sedih ipuné, tur Gobiah idup néwék sakadi daweg kantun truna. 

Pinaka guru, Gobiah rajin malajah tur ngwacén. Ipun malangganan majalah Seri Pustaka miwah Pandji Pustaka sané kamedalang Balai Pustaka. Manut I Gusti Ngurah Bagus lan Nyoman Ginarsa, roman-roman sané kamedalang Balai Pustaka puniki ngawinang Gobiah mapikayunan makekawian duk warsa 1922. Lianan ring makekawian, ipun taler nyalin sastra miwah tutur tradisional sané biasané kagubah antuk tembang. Sastra sané kasalin inggih punika Hindu Tatua, Sundarigama, Panca Sembah miwah sané lianan. Warsa 1926, Gobiah nadosang carita Raré Angon tembang-tembang macapat mabasa Bali antuk aksara Bali. Kakawian punika kakirim ka Balai Pustaka, lan saking irika ipun polih honor. Lianan ring tembang macapat, Gobiah taler makarya sekar alit. Sané penting, warsa 1931 Gobiah makarya roman mamurda Nemoe Karma sané kamedalang antuk Balai Pustaka. Niki wantah roman mabasa Bali kapertama sané kamedalang antuk Balai Pustaka. Roman puniki kakawi antuk Gobiah risampuné ipun mamadik anak istri sané kaping kalih.

Wayan Simpen nganikaang yéning Gobiah naanin ngamedalang carita marupa gaguritan mamurda Satua Lutung Mungil, nganggén aksara Bali, sané katerbitang Balai Pustaka warsa 1923 (séri nomor 601, tebel buku 91 halaman) madaging ilustrasi. Rikala cakepan puniki medal, warsa 1924, wenten polemik ring surat kabar Bali Adnjana sané nganikaang yéning kakawianipuné punika wantah jiplakan. Manut Gangga ring surat kabar punika, kakawiané punika wantah gubahan Dwidja Wreda Gangga utawi Pedanda Wajahan Sindoe, saking Geriya Daja Prapatan, Tjakranegara, Lombok Barat.

Sangkaning kanikaang nyiplak kakawian anak lianan, Gobiah ngwales antuk sasuratan mamurda ”Soerat Kiriman: Kepada Toean Ganggadja” (Bali Adnjana, 20 Januari 1925, hlm. 3) yadiapin Gobiah nénten mersidayang makelid. Irika ipun ngaku yéning kakawian punika duwén anak lianan, nanging Gobiah sampun mecikang daging kakawian punika kantos layak terbit. Indiké punika nénten ngawinang Gobiah kélangan semangat makekawian. Kabuktiang antuk embasnyané roman Nemoe Karma.

 

Catetan: Kaanggit, kacutetang, tur kabasabaliang saking cakepan Tonggak Baru Sastra Bali Modern kakawian I Nyoman Darma Putra kaca kaping 19.

No comments