Puisi-puisi Made Suar Timuhun; Tukang Sampat

Bikul rusuh

 

Bikul-bikul rusuh

bibihné ngancan bujuh

rakyaté suba nganggon musuh

sing suud-suud kaborosin lan kapisuh

Kaja kelod kangin kauh

slasah-slisih cara anak bincuh

nyegut ngupinin nyaru-nyaru tuyuh

pipis rakyaté kaintip saka bedik kajujuh

Kénkénang idup rakyaté bisa landuh?

yén bikul-bikul rusuh ento nu kaubuh

makelo-kelo bikulé ngancan tumbuh

ngancan liu ngancan terus mimbuh

Bikul rusuh kaejuk kaborosin laib labuh

apang tusing buin ngrusuh ulah aluh

payu ia di bui makurung mapunduh

nampi karma paturu bikul ané patuh

 

Timuhun, 23 Juli 2014

 

 

Jinah

 

Saking embas kantos pejah

i manusa ngmerluang jinah

jinah ngawinang jadmané punyah

sakadi raja jinahé setata kasembah

Tan akidik jadmané ngadol tanah

ngaptiang gelis polih jinah maliah

tan wangdé tetamiané dados pakantah

élah ngmolihang rupiah kauripané bungah

Ngrereh jinah patut saking pakaryan melah

dasarin antuk kaweruhan lan éling malajah

sampunang ngrereh jinah antuk laksana corah

jinahé tan kabakta budal ka karang wayah

 

Timuhun, 22 Juli 2014

 

 

Tukang Sampat

 

Yén seken nyak nyambat

belogé mula bas kaliwat

nasib magaé dadi rakyat

tuah dadi tukang sampat

Kénkénang nagih dadi pejabat?

masekolah SD dogén sing tamat

Kénkénang nagih menék pangkat?

pagaené sing taén seken pragat

Meled ngelah gaé aluh clapat-clapat

luas ka kantor tuah ngédéngan lawat

gajih gedé misi korupsi sing pegat-pegat

sinah énggal sugih ngelah umah matingkat

Nanging sugih ulian magaé corah pasti jelék kasambat

karma pala di guminé majalan becat

jelé pagaéné pasti lakar jelé masih ané kabakat

kanggoang dadi tukang sampat mayadnya ngresikin jagat

 

Timuhun, 15 Juli 2014

 

 

Magaé

 

Magaé ngalih pipis kanti peluh pidit

Ada magaé di carik dadi tukang arit

Dadi pegawé bank ané nudukin kredit

Eda pesan magaé bas kaliwat mripit

Sekenang magaé tusing dadi lengit

Ulian alih-alihané jani ngancan gerit

Ajin barangé negehang nyujuh langit

Rupiahé ulung maglebug tuun nyririt

Tusing perlu nuutang ya i pejabat elit

Ané korupsi pipis rakyaté liu kalamit

Nanging idupné pasti lakar nyumprit

Ada pipis, di penjara naenang sakit

 

Timuhun, 1 Juli 2014