Silunglung ‘Maambu’ Sastra Bali Klasik

Bedah buku Silunglung kakawian I Nengah Jati ring Jatijagat Kampung Puisi Bali

Buda (28/11) wengi magenah ring Jatijagat Kampung Puisi Bali, Jalan Puputan Renon, Dénpasar kalaksanayang peluncuran lan bedah buku kakawian I Nengah Jati. Cakepan puniki wantah pupulan puisi Bali modéren kapertama saking I Nengah Jati sané mamurda Silunglung. Dados narawakia ring bedah buku punika wantah sastrawan Bali modéren I Gedé Putra Ariawan sareng Déwa Ayu Carma Citrawati.

Putra Ariawan nguningayang, Jati rikala nyurat puisi puniki telaten pisan munduhang kruna-kruna saka siki kantos manados puisi. Lianan ring punika rima akhir taler dados uratian Jati rikala nyurat puisi. “Saking puisi-puisi ring cakepané puniki, Jati sanget nguratiang rima akhir miwah akéh lengkara ring soang-soang bait puisi,” baos Putra Ariawan.

Dané taler ngawewehin yéning Jati akéh nganggén kruna saking Jawa Kuna lan pastika warginé sané nénten malajah basa Jawa Kuna pacang méweh ngaresepang. “Nanging embasnyané cakepan puniki nyihnayang yéning Jati wanén lan sampun siap ngarepin tantangan sané wénten ring sastra Bali modéren mangkin, napimalih pangwacéné kantun arang,” Putra ngawewehin. Taler, manut Putra, Jati rikala ngamedalang cakepan puniki pastika sampun nénten ngitung untung wiadin rugi, lan kapilihnyané puisi pinaka ‘ungkapan jiwa’ puniki kaanggep unik.

Narawakia kaping kalih, Carma Citrawati nlatarang yéning puisi ring cakepan punika sanget kentel maambu sastra klasik luiré kakawin wiadin geguritan. Punika taler rikala ngarereh artos kruna Silunglung dané polih ring kamus Jawa Kuna sané maartos bekel ka guminé wayah. “Minab indiké puniki sangkaning Jati sadurungné sampun teleb mlajahin sastra Bali purwa,” baos Citra.

Pangawi cakepan puniki, Nengah Jati mapengapti sumangdané cakepan sané madaging 74 puisi puniki prasida sareng ngawinang sastra Bali modérené sayan ngalimbak tur ramia. “Cakepan puniki embas sangkaning tiang bingung ngarereh sira déwék tiangé, ngarereh jati diri. Rikala tiang ngaruruh merika meriki, jati diri punika panggihin ring déwék tiangé,” baos Jati.

Rikala usan nyurat puisi-puisi puniki dané ngaku yéning nénten ngaresep antuk napi sané sampun kakaryanin punika. “Napiké rikala nyurat puisi puniki wénten tiang sané lianan ring déwék tiangé? Tiang taler nénten uning,” ucapnyané.