Amati Internét
Olih: I Gusti Lanang
Sutéja Naréndra
 |
| Sumber Potrekan; thewesternvolunteer.com |
“Kirimin icang pakétan
internét ané aji karobelah, nah! Gé pé él!” kéto raosné I Luh di télpun
tekén dagang pulsa dajan umahné. Batisné menék matinggah di kursiné
sada misi gejir gejir.
“Aiiisss...mampu jani
bosé. Ji karobelah meli pakétan,” dagang pulsané nyautin.
“Sing ja mampu,
icang mutang malu. Kayang ngembak nyepi bayah. Ngebon malu!”
“Mbééé...sing ya icang
balik modal. Nak tipis bati pulsané Luh!”
“Nah ké, eda demit
demit. Pipisé kadung anggo meli kebaya jak béha.”
“Araah, Nyai
mekejang anggehin. Mén Saplir anggehin Nyai busung, Mén Gabrug
anggehin Nyai biu. Mén Bunter anggehin Nyai jaja. Kuting siap Nyai
nganggeh. Betarané aturin Nyai kitir anggehan? Jani pakétan internét buin
nganggeh.”
“Mbééé... Dadi ber uyut
Nyai Yan? Lamun sing dadi anggehin, eda naké makejang utang timpalé ubat
abit. Sik Yan Kapléré icang lakar meli pakétan. Kénkén? Kadén
icang sing taén liwat mabayahan?!”
Sepi. Sing ada
saut uli di kadituan.
“Nah. Baang icang
suba. Ingetang mayah nah! Bé té wé... Nak ngujang Nyai meli pakét internét
liu sajan?” mara ada saut uli dagang pulsané. Béh, mirib kablet
dagangé. Apang payu dogén dagangané.
“Kal anggo Nyepi!”
“Aiiih... Soléh
Nyai. Pakétan internét bekelang Nyepi. Ketipat lebihin ngaé, tum
liunang ngaé, apang ada bekel Nyepi. Nak amati geni, sing dadi
nyakan. Apa lakar dahar? Dagang makejang matutup!”
“Badah, Nyai sing
gahul Yan. Nak icang lakar ngapelud potrékan! Apang kakinian... Hihihi”
“Potrékan apa?”
“Icang suba mejanji ajak
timpal timpalé Kru Bajang Uyang, lakar mapotrék di pempatan désané pas Nyepi.
Asyik ento, pokokné gereget. Pidan buin maan selfi di margané gedé lénan
tekén Nyepi? Yén dina biasa, bisa lilig montor ndas bané! Icang
lakar mapotrék lantas lakar siaran langsung. Apang gereget. Mawanan
liunang meli pakétan internét, apang sing lélét!”
“Badaaaaah... Nyai
katrok né. Nak saluran internété lakar masetop kayangé Nyepi. Lakar
kujang Nyai ngapelud? Pelud Nyiné anggo?”
I Luh ngatébtab, teeb
pesaja buka mireng orta reramané mati!
“Masak? Serius
looh?” bibihné munju.
“Saja. Suba ada
surat édaran uli Pé Ha Dé I. Apang luung koné kramané ngelaksanayang catur
brata panyepian!”
“Aiiih.... Uli pidan ada
brata nyepi Amati Internét nah? Gagal faham icang!”
“Sing ja amati internét
Luh. Ento tuah nyaganin anaké buka Nyai tekén Kru Bajang Uyang apang
tusing malaksana boya boya sedek nyepi. Misi selfi di rurungé! Sing
ada gaé lénan jemak?”
Sepi. Sing ada
masaut. Apakpakan basé buin I Luh ngeraos.
“Nah, sing kénkén.
Pokokné rencana jalan terus. Selfi harus jadi. Pokokné kayang nyepi harus
selfi di setiap sudut jalan! Dengan berbagai posé dan gaya. Maniné kayangé
ngembak geni, mara lakar apelud. Kayangé ento madan dina ngémbak
internét!”
“Men, pakétan
internété payu?”
Sepi.
“Payu?”
Sepi. Laut
mamunyi.... Nuuuut.... Nuuut.... Nuuuut....
(Macang Rumah Cinta Seribu Jendela)
No comments