Puisi-puisi I Made Edy Juniawan; Donat Empet

Sumber Gagambaran; id.pinterest.com

Purwani Sasih Kasa

 

Bulane endag uli selagan ambune

Mekenyem kadi dewi ratih nyalantara

Serase dayuh dikeneh tanpa mala

Putih mesawang barak

Purwani sasih kasa

 

Nyikiang rasa

Ngapti kerahayuan jagat

Mangda brebeh gelis matilar

Bulan jegeg dong pirengang

Yan dados tityang gisiang

 

Lakar ajak meliang liang

Dini di pabinan mesayang sayang

Anggen ngelimuran manah

Kadi rasa sampun jengah

Ngastiti gering mangda kesah

 

Duh.. tityang nyerah

Ooo bulan

Ajak tyang melali ke bulan

Apang tawang

 

Sina nepuk ane aptiang

Ngiring meyoga

Benjang purnama

Suksma

 

 

Purnama

 

Tolih je di langit

Tuara ade kenyit

Ne biase duur bukit

Mesunar galang uli kangin

 

Ooo bulan purnama ngilang

I gulem nangkebin galang

Ngelantur sabeh ngalintang

I bulan sayan keengkebang

 

Ngiring lanturang carita

Peteng jani pinaka cihna

Toya embas saking ambara

Miab paica Sanghyang Indra

 

Purnama

Sasih kasa

Lanturang muspa

Ngelunsur wara nugraha

 

 

Kajeng Kliwon

 

Peteng Dedet Jagate

Ling pagelur pajerit..

Suare manusane kraik kraik ....

Uyut menbyayuan di bucun bucun desa...

 

Cicing nyalung auuuuuuuuuuung.... Auuuuuungggg... Koooong...kuiiing...auuuuuuuuuung

Meong pakebek ngasmare...meooooong eooooong..... Meeeng...meeeeeeoeoeoeng

Munyin cecek pakretes uli kauh.... Cek cek.cek.ceeeekkkk....kecek

 

Tuke pakrebak... Saling sautin.... tuk ke tuk ke tuukk keee

Katak dongkang ... Saling kaukin... kungkek kukng kek kek kung ke ke kung....

Tatit grudug mekalukan...tan pareren..

 

Ratuuuuuuu adi kene tenget gumine mangkin....

Dija jani lakar mesayuban....

Dija ade tongos....

Mih to to to tolih...pasliwer apine dilangite... Ape ye to...

 

 

Aduuuhh aduuuuuh ......

Adi kene jani gumine...

Jemak sesabukanne...

Meyuda sampun.....!!

 

Ngiring ngiring pebalih!

 

 

Sirep

 

Ngidem ngidem keneh kedat

Keneh kedat sirah baat

Sampun wengi liwat

Durung sida kiap

 

Dije ade memedi mentas

Ngae tityang gadak

Di bale Kijap kijap

Nandes tamis kruyuk siap

 

Tengah lemeng di sisi

Ade munyi krisik krisik

Minab gamang sedeng ngesik

Misi munyin kedis kiik kiik

 

Sire sane wikan aji sirep

Tulung gae tyang leplep

Apang engal semeng

Jani tyang suba kenyel

 

Sirep

Sube peteng

Apang enggal semeng

 

 

Donat Empet

 

Saget ade donat jak lilin

Ulang tahun kone adane dibi

Donat bunter dase besik

Lilin ngendih duang katih

 

Timpal timpal pade megending

Ngendingan tyang sayan lingsir

Cobain je alih alihin

Tuuh suba ngancan bedik

 

Kulit suba sayan kakah

Mua ngenah suba wayah

Nangin keneh tuara nyak tua

Nu care nak truna

 

Keneh gede bayu enduk

Napi wenten anggen susuluh

Sampunang rengka ulian tuwuh

Ngiring mekarya seenu irage idup

 

Suksma

Timpal lega Tyang bagia

Rahajeng sayan wayah

Donat empet pinaka cihna

Trensna dados nyama