Ada Anak Lingsir ané Tusing Suud-Suud Meli Carik
Olih: Komang Adnyana
 |
| Gagambaran Manik Sudra |
Di subané suud nanem sungga-sunggané ané
baah, di pundukan paek pengalapané di munggu, Pan Kobar ngumbahin limané ané
daki di jlingjingé cenik tongos yéh cariké membah. Di kenehné majlawatan kénkén
sunggané ané lanying ento, ané macelekang saru ajak padang gajahé muda-muda,
madérék di pundukané, lakar nebek batisné Déwa Aji.
Krieeekkk! Sunggané lakar nembus sepatu
olahragané ané mawarna putih kedas, lan matatakan karét totonan. Getihné lakar
ngecir, lan buin kesepné sépanan suba baah sunggané nyusup, kulitné lakar
sebuh, pelung, getihné lakar madetang, lan racun di sunggané lakar ngaénang
angkihané enyat.
Krieeekk! Giginé Pan Kobar tusing karasa
gining-gining magiet dugas majlawatan rerambangané ento di sirahné. Satondén
sunggané seken nebek batisné Déwa Aji, ia lakar ulap-ulap uli tengah carikné.
Apang Déwa Aji nyak tuun uli sepéda gayungné ané mael totonan, ané cétné enu
leh manglélam, lan makecos ngecosin jlingjingan cariké ané cenik, nuju pundukan
carikné.
Krieeekk! Pan Kobar buin giet-giet
ngrambangang unduké ento. Ditu ia lakar mapi-mapi nyagjag, mapitulung, lan
mapi-mapi tusing nawang apa ané ngranayang Déwa Aji bah, saha getih ngecir uli
telapakan batisné.
***
Déwa Aji ngasisiang sepéda gayungné,
lantas negakin sepédané ané cétné enu nglélam ento pesu uli rurungné, ngulah
jalané nuju ka carik. Ia nyaluk baju kaos mawarna putih, macelana bawak selem,
masepatu olahraga warna putih, seken cara rerambangané Pan Kobar.
Adéng-adéng ia nulakang sepédané,
ngeliwatin jalan désané, ngasanin angin semengé ané enu tis lan maabah dingin
kesir-kesir. Besik dua kramané nyapatin, ia ajér nyautin. Suba kudang tiban
kadén jalané ené entasina, tetep ia marasa enu ada ané sénglad di kenehné. Enu
karasa ada ané tondén jangkep. Nyasan maekang ka jalan nuju cariké, nyasan
tusing jangkep karasa kenehné. Tuah buin duang méter sajan, lakar tepuk
jembatané ané ngregah menékang ngliwatin tukadé. Di subané liwat jembatané, di
durin punyan tigaroné, tuah jalan nuju cariké linggah maglanaran.
Déwa Aji ngrérénang sepédané. Ia ngabagin
tangkahné, dugas sepédané kajongkrakang, disisin jalané. Ia nolih embahan yéh
tukadé ané puek mawarna coklat, lan cubangan-cubangan tangkid parasé ané suba
telah mapongpong. Akejep sajan ia ditu, buin ia negakin sepédané, ngangsehang
sajan nulakang ngliwatin jembatané ané ngregah menék.
Di punyan tigaroné ia marérén. Bunga-bunga
tigaroné maulungan seka katih, kaampehang angin. Uli tongosné bengong, kanti
kauh kanti kelod kanti kaja tuah carik linggah, ané liunan sedeng misi padi
gadang-gadang. Kudang sikut kadén cariké totonan ia tusing seken meték.
Déwa Aji ngulehang paliatné joh bedauh, ka
punyan bengkelé ané ngenah tuah macucul cenik gadang wayah. Rasa tusing
jangkepé buin madugdug-dugdug di kenehné. Tuah buin duang sikut, buin duang
sikut sajan, tusing karasa bibihné makemikan. Ia nulakang pedal sepédané saha
énggal.
***
Pan Kobar negak di kubuné, marep ka
munggun carikné duang sikut, ka munduk subaké ané biasa kaentasin olih kramané
nuju ka carik. Uli kubuné ngalih munggun carikné ada sawatara johné séket
méter. Paliatné suba ngémang ngiwasin, ngantiang sapetekan Déwa Aji.
Tusing pegat-pegat rasa rerambangan di
sirahné majlawatan. Satondén negakin sepédané nuluh munduk subaké ngauhang,
pastika ia lakar marérén di samping punyan bengkelé. Ditu ia lakar bengong,
ngusapin tangkahné nyang pang telu, matolihan kangin kauh, nyemak botol yéh uli
sepédané.
Satondén teked di punyan bengkelé, ia
pastika suba maan marérén di punyan tigaroné bedangin. Satondéné pastika ia
masi maan marérén di tanggun jembatané, lantas adéng-adéng nulakang sepédané
menék ngliwatin jembatané, ngenah angkihané ngangsur. Satondéné buin pastika ia
lakar bengong akejep nolih cubang-cubangan parasé ané suba tusing ada ngrunguang
di tukadé, di subané telah kadérés-dérés aji mesin sénsor.
Tusing Pan Kobar dogén ané nawang abahné
Déwa Aji buka kéto, sabilang ia mulih uli kota nyang pang telu abulané. Ajaka
makedésa suba nawang. Pan Kobar masé nawang, Déwa Aji tuah ngisinin jengahné
ané madugdug di kenehné. Jengahné ané kondén masé jangkep, ulian cariké buin
duang sikut kondén bakat baana ngelahang.
Krieeekk! Pan Kobar giet-giet padidiana.
Jengahné Déwa Aji masé lakar walesa aji jengah. Suba tusing nyidaang ia
nanggehang grudugan basangné uledan. Buin kesep, buin kesep dogén lakar ada
orta unduk makelar tanah sugih maliah ané lakar nylempah kléjat-kléjat.
***
Déwa Aji bengong di samping punyan bengkelé, sambilanga
ngusap-ngusap tangkahné. Di subané ada nyang pang telu, ia kipak kipek kangin
kauh, lantas nyemak botol yéh mawarna pelung ané masangkétang di buluh
sepédané. Ia nyérét yéhe ento kanti munyi cerét-cerét.
Dugas nepuk cariké buin duang sikut ento,
ané enu joh badauh, ia inget tekén undukné pidan, dugas enu dadi penyakap di carik
bapané Pan Kobar. Dugas ento bapanné Pan Kobar mula kasub dadi anak sugih, dini
ditu ngelah tanah lan carik. Ia enu inget, kénkén ia kena pisuna, kasengguh
mirat asil carik, laut kasumpahin kéné kéto. Ia masé inget, sekat ento ia
marasa ada ané tusing jangkep, ané sénglad, dija kadén, tusing di tangkahné,
tusing di utekné, ia tusing seken nawang.
Déwa Aji nugtugang pajalané, negakin
sepédané, nuluh ngauhang, ngliwatin punyan bengkelé. Jlingjing cariké
ngembahang yéh ngricik, ulian suba madum-dumang ka sabilang pengalapan
carik-carik kramané. Sayan ngauhang sayan nyenikang embahan yéhé, kanti ngenah
batu-batuné selem lumutan, pici-pici, lan tanah-tanah jlingjingan masawang
bias.
Ada aminggu suba liwat, ia maan nitipang
bebesen tekén I Kobar, apang tekedanga tekén Pan Kobar, unduk kenehné lakar
meli tanah carikné. Mapan dingeh orta, Pan Kobar lakar ngadep carikné, lakar
ngetohin pianakné, I Kobar mukak utsaha rumah makan. Jani suba dinané masubaya
lakar katemu.
Dugas ento I Kobar masé nyambatang, “Nggih
dumunan sampun Déwa Aji kayang nika ka carik tiangé. Bapan tiangé ngantosang
drika. Titiang nugtug durinan. Titiang ja nganduh-nganduh bapan tiangé apang
nyak seken-seken ngadep cariké.”
***
Pan Kobar suba kasisi uli kubuné, ané
maiter aji pagehan bunga pucuk, sadia lakar ulap-ulap di subané tepukina
majlawatan Déwa Aji uli kangin negakin sepéda. Tangkahné mangrudug. Jani suba.
Jani suba. Buin bedik dogén. Jengahné Déwa Aji lakar tileh madugdug-dugdug,
lakar anggona sekel keneh kanti mati, ia ngrenggeng giet-giet di kenehné.
Mula saja ia dot ngadep tanahné, di subané
matelah-telahan sajan ulian madum-duman ajak penyamaané, kéto masé sekamedik
adepa ajak pianak-pianakné, kéwala tusing ja lakar nyak ia ngadep tekéning Déwa
Aji, diapin amongkén ja kedeh pianakné, I Kobar nundénang. Tusing nyak ia lakar
dadi pengempahan jengahné Déwa Aji, diapin makedua suba pada-pada lingsir jani.
Depang, depang ia buduh padidi ngisinin jengahné aidupan. Ia tusing ja lakar
ngisinin. Mula saja idupné Déwa Aji cara mabading di subané makatang juuk
linglang di tanggun sétrané dugas pidan, kanti nyidaang dadi makelar tanah,
dadi sugih maliah cara jani, kéwala makejang masé anaké nawang, idupné tusing
ja jangkep. Aidupan Déwa Aji tusing ja lakar nyidaang ngisinin jengahné.
Pan Kobar enu marasa menang, patuh cara
dugasné pidan, dugas ia nyidaang misunaang Déwa Aji kanti suud dadi penyakap
carikné lan dadi tutur-tuturan kramané makejang. Né jani jlawatan sunggané
nebek batisné Déwa Aji nyasan-nyasan maekang. Krieeekkk! Sunggané lakar leb di
telapakan batisné, nembus sepatuné, ia lakar bah, kléjat-kléjat. Matanceb ka
jlingjingé.
Pan Kobar laut ngulap-ngulapang limané,
saha kauk-kauk, égar sajan kenyemné sayaga lakar nyanggra Déwa Aji.
***
Déwa Aji nyongkrakang sepédané di sisin
munduké linggah, ané kaapit jlingjing cenik. Madingehan munyin yéhé ngricik,
saha macelep ka pengalapan carikné Pan Kobar, macelep ka tengah cariké ané misi
padi gadang-gadang. Di badauh, ada maselat séket méter ia nepuk Pan Kobar suba
ngulap-ngulapang lima, saha ngaukin déwékné.
Ia marérén akejep, milu ngulapang limané.
Tangkahné ngrudug. Enu inget ia tekén undukné pidan. Dugas enu tuah dadi
penyakap carik, lan kena pisuna. Ia ngrasayang sirahné masé ngrudug. Kéwala
tusing seken masé dija kadén tongos ngrudugé ané sujati. Ia masé nawang,
pastika tusing ja ulah aluh Pan Kobar lakar nglébang carikné, apabuin ka
déwékné, ané suba uli i pidan gedegina. Kéwala kenehné suba cutet, kénkén ja
apang cariké nénénan dadi gelahné, lan grudugan di déwékné, ané suba aidupan
ngaénang rasa sénglad nénénan nyidaang makaad lan ilang.
Paliatné Déwa Aji ngulah tuun ka munduk
cenik carikné Pan Kobar, di paek pengalapané, ané masé ngenah gadang misi panak
padang gajah nguda-nguda. Ia ngénggalang ngalih angsel lakar makecos.
***
Pan Kobar nadaksara suud ulap-ulap,
kenyemné ilang, bibihné caket, né jani karasa seken-seken makriek! Dugas Déwa
Aji ngalih angsel lakar makecos, uli dija kadén Pan Kobar tusing ajin, sagét
pianakné, I Kobar suba nengok durinné Déwa Aji. I Kobar ngenah némbét limané
Déwa Aji, sahasa makenyem girang mangorta.
Pan Kobar ngénggalang malaib, nuluh
pengalapané di munggun carikné, sahasa gelur gelur. Dugas tindakané gagégosan
ento, dugas ia nyemunin gelur-gelur, I Kobar suba ngalih angsel lakar makecos,
ka pundukan cenik ané suba katancebin sungga, ngemalunin Déwa Aji.
Kriieeeeeekkkk!
Banyuning, Bukit Padangkeling, 2020
Lekad di Gunaksa, Klungkung. Kedaut tekéning carita, lan di kénkéné makarya cerpén mabasa Bali wiadin Indonesia. Pupulan cerpénnyané kapertama, Meték Bintang, ngamolihang hadiah Sastera Rancage 2012.
No comments