Puisi IG Mardi Yasa; Wana Pinaka Urip

Sumber Gagambaran; www.pinterest.com

Silib

 

Silib kenehé mangantosang adi

Adi ané tresna,

Ngoraang satia,

Nangin tekén nyén adi satia?

Tekén nyén adi tresna?

Dini bli ngantungan tresna di selagan batuné

Batu réjéng masepakan

Bli tuah nyilibang keneh tresnané tekén adi

Silibang bli di tengah atin bliné

Bli tuah sida nyingak paras adiné uli di selagan batu réjéngé

 

Bukit Tunggal, 2021

 

 

 

Kabut

 

Kabuté ngaliputin manah

Manahé kasaputin baan baa api tresnané

Api tresnané makaput baan angga

Angané kaliput baan peteng pitu

Peteng pituné ngawinag lara,

Sangsara!!!

Duka!!!

Nangin ento sida lémpas,

Yéning kabuté mauwah dadi tresna

Tresna ané tumbuh uli dasar ati

Pang sida nembus peteng pitu

Sida nguakang rasa lara, sangsara, duka,

Sida kalémpasang

Ané ada tuah rasa tresna sane sida nembus kabut kalawan peteng pitu.

 

Bukit tunggal, 2021

 

 

 

Bulan Bintang

 

Adi maparas ayu,

Carman adiné sakadi salak klumadin,

Muan adiné marawat-rawat di selagan bulan kalawan bintangé

Bulan kalawan bintang ngiasin jagat,

Muané kalawan tresnané sida nerangin pejalan bliné

Adi maparas ayu,

Sadiaké adi nimpalin déwék bli dini?

Dini di duur batu kaangé,

Bli ané tuah truna pongah,

Sadiaké adi?

 

Bukit Tunggal, 2021

 

 

 

Bulan Purnama

 

Bulan Purnamané masunar galang

Nerangin pamargin bli,

Ané lakar ngalih paukudan adi

Ané ngongos di pasisi sastrané

Bli, tuah sida ngaturang sembah bakti,

Bli tuah nagcep kapining hyang parama kawi,

Pang sida nepukin paukudan adi ané ngongos di sisi satrané

 

Bukit Tunggal, 2021

 

 

 

Wana Pinaka Urip

 

Taru wayah, taru nguda,

Taru alit, taru ageng,

Idup di wana gimbar, wana cupit

Taru wana, wana taru

Taru praman usadhalita

Wanané asri

Saluiring kayu maurip

Kayuné ngelog buka igelan i tamulilingan

Kesiran anginé sakadi munyin kedis Bacica ujanan

Élogan kayuné kaja, kelod, kangin, kauh

Liang ring manah

Manahé kadahut nyingak keasrian kayuné

Nanging.....

Nangin né jani..

Dija iwana gimabr to?

Dija kayuné ané ngélog ento?

Dija?

Né jani sami sampun tios

Di alasé tuah ada lalahu

Dini ditu tuah lelahu mabrarakan

Sané makedus sing sida baan ngadek

Buka bon bangkén buyung

Né jani

Dija wana ne asri ngelangunin manah ento?

Dija?

Saja tuah wana

Nanging wana ento liu wigunanyané

Wana pinaka penyambung urip

Diolas engsebang manahé madaya corah

Ané kal ngerusak wana

Diolas!!!!

 

Bukit Tunggal, 1941


IG Mardi Yasa
embas lan jenek ring Désa Kedisan lan kantun dados mahasiswa UHN IGBS ring jurusan Pendidikan Bahasa lan Sastra Agama

No comments