Gerubug

Olih: I Gusti Lanang Sutéja Naréndra

Sumber Gagambaran; pixabay.com

“Dugasé malu, gumin Nininé kena gerubug agung,” I Nini ngawitin tuturné. Buka biasa satondén masaré, tiang tuturina satua. Magenepan satuané: Siap Selem, Kuluk Gadang, I Sampi Wadak, I Belog, Radén Galuh, Mén Blénjo, Kambing tekén Bojog.... piiih ber liu pesaja! Bilang wai malénan satuané. Dija kadén I Nini nuduk satua, bisa begeh kéto nyidang béna ngarambang.

Petengé ento, tumbén tuturan satuané malénan. Tusing unduk baburon, tusing satua rarikrikan. Sakéwala tutur pesaja. Saja saja taén tepukina tekén I Nini.

“Mara pesan suud yuda puputan Badungé. Dugasé ento Nini mirib matuuh pitung tiban. Suba inget tekén awak. Suba nawang munyin keplagan bedil lan meriam. Guminé kena gerubug agung. Anaké mati pacégcég. Tuni semeng negen anak ka sema, sanjané ia ané tegena ka sema.” I Nini nyatua, panyingakané nerawang, mirib ngingetang dugasé malu.

Tiang nuléngék ngantiang satuané...

“Anaké tepén gering. Ngutah mising, awai sagét mati. Kanti tusing ada anak bani pesuan umah. Angkul-angkulé maisinin uékan béékan...”

“Pang kénkén, Ni?” tiang matakon.

“Anggo sawén. Yén sekalané cihna anaké di karangé ento sedeng nyingid. Sing dadi delokin, sing nerima tamiu. Yén niskalané, apang buta kala ané ngeranaang gerubug sing bani nekain.”

“Ooo....” tiang ma o dogénan.

“Sirahé mabedbed uékan béékan masi.”

“Pang kénkén Ni?”

“Sawén awak. Anaké apang tusing ngusud, iraga masé tusing ngusud anak.”

“Ooo...” buin tiang ma o.

“Takut Nininé tan sipi. Cicingé nyalung sing papegatan. Mémén Nininé nundén mengkeb di longan.”

Tiang gaok pesaja, mireng unduk mengkeb di longan.

“Di longan Ni?”

“Ae, di longan! Mengkeb ditu wai wainan. Dedarané bekelang ka longan. Ngenceh, meju, mara pesuan. Kéto Nini bulan bulanan kanti suud gerubugé. Ulian ento Nini nutugang tuuh buka jani. Anaké ngorahang, Nini sisan gerubug, mawat kawat matulang besi magetih kantawali!”

Piiih... nerawang keneh tiangé dugasé ento. Bakat sikutang ka awak, ambat jelék asané masekep di longan bulan bulanan. Sing maan melali, sing maan maplalianan.

Jani tiang suba tua. I Nini suba malinggih di rong tiga. Gering coronané nibénin buka jani, pemeréntahé nitahang: sing dadi pesuan umah, jaga jarak sing dadi maramén-ramén. Apang tusing sayan banteh gerubugé. Inget tiang tekén tuturné I Nini. Dong kéto ya pidan tatujoné masang sawén tur mengkeb di longan?

***Tutur tetamian saking Nini Simpreg. Dané embas ring Sibang. Duk Puputan Badung, dané ngangken mayusa sawetara pitung tiban.

(Macang Rumah Cinta Seribu Jendela)