Paguyuban Sameton PMI Désa Adat Kubu-Bangli, Kawentuk: Paica Risajeroning Pandemi Covid-19

Olih: I Komang Alit Juliartha

Gumanti nedeng anget pisan yéning maosang indik Pekerja Migran Indonesia utawi PMI. Waluya kadi maratengan, wawu pisan rateng tur sayaga jagi katurang. Sapunika minab kawéntenan PMI ritepengané mangkin. Dados sorotan ring masyarakat. Inggihan sorotan sané negatif taler sané positif. 

Sané negatif utawi nénten becik minapta idadané sampun sahuninga sané kawedar ring média cetak, éléktronik taler ring média sosial. PMI kasengguh sang sané makta gering agung virus corona. Sapunika taler kanikayang nakal, bandel, belog ajum muah sane lianan. Punika jakti-jakti nenten patut karaosang. Sakit ati? Pastika PMI ngarasayang indik sakité punika. Sakémaon patut élingang akéh PMI sane saking Bali, tur tanah palekadan PMI sané saking Bali wantah ring Bali. Sampun sapatutnyané budal mawali ke Bali.

Sakéwanten punika nénten banget dados pikobet jroning kayun. Riantukan akéh sameton PMI ring sajebag jagat Bali sané sampun ngamargiang sorah-arih pamargi saking guru wisésa (pamerintah) minakadi rapid test, test swab, taler karantina. Siosan ring punika akéh sametoné ngawentuk paguyuban-paguyuban ring soang-soang kabupatén tur ngamargiang parikrama sané becik. Sinalih tunggil paguyuban punika mawasta Paguyuban Sameton PMI Désa Adat Kubu, Bangli.

Kawéntenan gering agung covid -19 punika sayuakti abot pisan jroning pamargi kauripan pamekas ring ekonomi. Akéh sametoné sané nénten makarya sangkaning gering agung puniki. Nanging satios ring punika, wénten taler paica katur ring PMI Désa Adat Kubu, inggih punika sameton PMI akéh sané sampun ring dunungan soang-soang, kapupulang tur ngrincikang jagi ngawentuk paguyuban. Sami sumanggem tur ngicén aran paguyugan inggih punika Paguyuban Sameton PMI Désa Adat Kubu-Bangli.

Sujatiné saking warsa 1994 sampun wénten sinalih tunggil krama Désa Adat Kubu sané makarya ring kapal pesiar. Nyabran warsa nyansan ngakéhang sané makarya irika pamekas ring warsa 2000-an. Ngantos mangkin warsa 2020 akéh wargi ring Désa Adat Kubu, Bangli puniki sané makarya ring dura negari akéhnyané 102 diri. Niki nyihnayang kawéntenan aab jagat sané setata mauwah. Dumun akéhan sané dados pangrajin taler ngarereh pegawé. Mangkin makarya ring luar negeri pamekas ring kapal pesiar gumanti kadi primadona, akéh sané ngarereh.

Kakawitin saking ngorta-ngorta biasa, I Nengah Sutarta Adi Putra (Nengah Godogan) sareng Putu Arya Budiastika, metu pikayun jagi ngrincikang ngawentuk paguyuban. Indiké puniki kasobyahang ring sameton PMI sané lianan, tur sami sumanggem. Pinaka penasehat I Nengah Satwika(Kekog) taler INengah Suastika gumanti semangat pisan tur mensupport sahananing parikrama paguyuban. Punika taler ring pagurus siosan minakadi Wahyu Adisena, Hendra Santosa, Putu Andi, Gede Swidnyana Putra, Komang Suka Arsa, Made Kharisma miwah Alit Juliartha. Korlap ring soang-soang bucuan taler anggota siosan pateh semangat pisan.

Program sané kapertama sampun kamargiang ring rahina Redite, 7 Juni 2020 inggih punika ngamargiang bantuan sosial marupa sembako ring masyarakat Désa Adat Kubu sané sampun lingsir tur ten wénten ngerobang, utawi wénten sané ngerobang nanging kawéntenan ékonominyané kirang pisan, taler panyandang disabilitas. Sami maakéh 67 KK. Ring dinané inucap taler kasukserahang wantuan ring Satgas Penanggulangan Covid-19 ring Désa Adat Kubu. 

Sadurungnyané sampun kamargiang-kamargiang program-program lianan minakadi ngaturin dana duka tur mensupport sameton paguyuban miwah kulawarga sané wénten keni kaduhkitaan inggih punika kalayonsekaran. Puniki mabuat pisan risajeroning pamargi paguyuban kabenjangan. Pamargi puniki pinaka cihna paguyuban punika wénten tur urati ring samian sameton paguyuban. 

Nengah Sutarta Adi Putra pinaka Ketua Umum ring paguyuban maosang,” kabenjangan jagi makarya program jangka péndék, menengah taler jangka panjang. Program sané jagi kainggilang inggih punika makarya koperasi PMI taler makarya utsaha-utsaha micro itawi macro taler PMI Kubu pinaka pemegang saham. Mapaiketan ring krama Désa Adat Kubu, paguyuban jagi ngalanturang indik pamargi bantuan sosial taler jagi ngamargiang kursus gratis bahasa inggris ring alit-alité. Janten pacang mamargi indiké puniki yéning sampun jagaté normal, mawali becik kadi jatimula.”

Indik paguyuban puniki sampun kauningin olih Bendésa Adat Kubu,  Kepala Lingkungan Kubu taler Bapak Lurah Kubu. Kabénjangan pastika jagi konsultasi ring manggalaning adat miwah dinas mapaiketan ring pamargi-pamargi sosial kemasyarakatan. Sangkaning sih swécan Ida Sang Hyang Widhi Wasa, Ida Sesuhanan ring wewidangan jagat Kubu, Bangli, dumogi napi sane karincikang madasar antuk manah tulus prasida mamargi antar tur labda karya. Dumogi.