Bongkling XCVII-CII

Sumber Gagambaran; id.pinterest.com

Kaketus saking manuskrip duén Ida I Déwa Gdé Catra, Karangasem

/97/

 Becik hadokang masiyat,

tityang manglawan Pan Bongkling,

mangda kénakan manonton,

madadagan silih sabit,

Pan Bongkling manyahurin,

nguda kéto guru dukuh,

ngorahang bisa ngasahang,

né panas tekén né hetis,

twah ya buduh,

haworin ban jajotongan. 

/98/

Dadi kedéké mabriyag,

dé dukuh jengah makebris,

bangun mamalikang golok,

serét panyambléhan sampi,

padha kagyat né nangkil,

urahan mabriyuk bangun,

musungan ngunus kadga,

ngrempegin linggih I Gusti,

mérang bangun,

Pan Bongkling ngunus kadutan. 

/99/

Mabyoyongan di bancingah,

mahusungan mukur keris,

selamé nggetor mangokok,

padha mangungseng Pan Bongkling,

para ménak né manangkil,

nanggenin twara da kéngguh,

makadi para putra,

punggawa Ian para gusti,

padha laju,

ngarepin i soroh selam. 

/100/

Pan Bongkling masangang daya,

mapetuk kén Pan Dhurahim,

manyumbarang sambil ngokok,

né iba selam Dhurahim,

mati iba ban kahi,

da ndén iba pati laju,

né keris pangempokan,

raja Mekah uli nguni,

mula kasub,

pajenengan Umarmaya.

/101/

Kocap iya kasandayang,

krana nyané teked mahi,

tur suba mategar pindo,

sing kena twara mindowin,

madan I Baru Halis,

apang tanggar iba dukuh,

né mula atman selam,

gombét dowang iba mati,

dadi gelu,

dé dukuh pedas ningehang. 

/102/

Pan Bongkling nyesed ndesekang,

sambil nguyeng krisé alit,

dé dukuh jejeh tur hangob,

ndingeh sasumbar Pan Bongkling,

gidaté peluh pidit,

nggetor bayu tur nggadubug,

malahib ngajabayang,

saselamé milu lilih,

Gusti Agung,

makrak dané mangandika.

(pacang kalanturang....)