Puisi Yudha Panik; Bali

Olih: Ngurah Yudha Panik

Sumber Gagambaran; lukisanku.id

Tabuh solah lan wirama driki masikian

Idup kaidupang antuk daging manah suci

Suaran bajra Ida Pedanda malarapan Wéda-wéda

Juru kidung matimpuh ngidungang wargasari

Sakadi maayunan ring muncuk-muncuk pénjoré

Magejeran ring oncér canang sari

Lebur masikian dahating ngulangunin

Sajeroning manah

(Buin pidan tiang liang apang liang dini

di tengah-tengah olég tamulilingan)

Ngiring mangkin sikiang ragané

Nyegjegang warisan leluhur sami

Mabalik sumpah ring manah soang-soang

Anggén sanjata dahating sakti

Pacang warisang oka putuné ungkuran

Seni budaya kasucian leluhur wantah katuju

(Buin pidan tiang sebet apang sebet dini

katembangin pupuh Semarandana)

Wéntenké?
Becikan ring idup pasukan dukan

Salunglung sabayantaka

Ngulangunin suaran suling pangangon

Bajang-bajang nembang ngalih saang

Semar pegulingan di jaba pura

Wéntenké?

(Buin pidan tiang mati apang mati dini

kaéterang kakawin prihantemen)