Bongkling (XXXI-XXXVI)

Sumber Gagambaran; commons.wikimedia.org

Kaketus saking manuskrip duwén

Ida I Déwa Gdé Catra Karangasem

/31/

Heda cahi péka-péka, 

bas nuhukin demen hati, 

hento ya manggawé bocok, 

punggel-punggelin pilihin, 

pilih ya dadi pelih, 

jeléné hanang atepung, 

kéto ya nyama braya,

twara dadi ya nulungin, 

hala hayu, 

padha ngalih pagawénya. 

/32/

Sawwang désané tresna, 

teked di sema nututin, 

bawu suwud nyané morbor, 

lawut ya mbudalin mulih, 

to né pageh mangirim, 

pagawéné hala hayu, 

manututin manandhan, 

manujuwin panes etis, 

lamun kebus, 

hebon nyané ké hemanang. 

/33/

Pan Bongkling sampun ngenehang, 

mangdé pasahuté becik, 

lawut kenyem munyi halon, 

huning tityang kapo mangkin, 

ring madan kawuh kangin, 

kaja kelod menék tuhun, 

anghing kalintang gawok, 

bawu tityang mamiragi, 

hala hayu, 

swargga kalawan naraka. 

/34/

Jujut ko tityang nunasang, 

mangkin ring Jro Senggu Pangi, 

antuk tityang belog nyoknyok, 

mabuddhi manggihin lewih, 

wénten ké marggi malih, 

lénan ring margginé bawu, 

né madan margga sangha, 

yadyan ya likadan gigis, 

malih sunut,

yan sampun nyolong ka swarggan. 

/35/

Punika tujuwin tityang, 

mangdén siddha manggih becik,

Dé Senggu masahur halon, 

nah yén kéto hidhep cahi, 

tong dadi bapa jani, 

ngorahang tan pasasantun, 

apa karana kéto, 

cahi salah bapa lempir, 

murug tutur, 

anak naraka phalannya. 

/36/

Sok bapa ngancengang dowang,

mangorahang tekén cai, 

kadén gampang liwat habot, 

tatelu karana polih, 

séwatah bapa tuwi, 

lén sakéng warah sang guru, 

saking ucapan sastra, 

binderang cahi mbasanin, 

yén katepuk,

né ngimpasin margga sangha. 

(pacang kalanturang.....)