Kamacétan ring Margi Agung

Olih : IDG Trinandita

Sumber Gagambaran; https://pixabay.com

Kamacetan ring margi agung ring wawidangan kota mageng sering pisan kajantenang.  Kamacetan ring margi sampun sarahina kawéntenannyané. Macet punika utamanyané semeng rikala para sisia, pegawé lan krama tiosan lunga ngaranjing utawi ngawitin ngaruruh pangupajiwa. Rikala punika ring margi akéh pisan sepéda motor punika talér mobil lan sané tiosan. Marginé sané wénten tan prasida nampung  akéh sepéda motor lan mobilé sané setata nincap kawéntenannyané. Punika taler ritepengan galah budal saking kantor, sekolah lan genah makarya para warginé majanten sampun kamacetan ring margi pastika pisan kajantenang.

Yéning baosang sané mangkin ring sakancan wawidangan Bali sinah indiké punika majanten taler sekadi asapunika. Minaban punika cihna kamajuan warginé ring widang ékonomi sampun nincap lan majanten sampun ngalimbak nginutin kamajuan jaman. Yéning uratiang ring parikrama warginé sekadi mangkin. Rauhang sampun ring sawewengkon désa, sami pidadab kamajuan indik kawéntenan sané sampun kawedar punika taler pateh pakantenannyané. Ring kota majanten pisan kaaksi akéh pisan kramané ngawigunayang sepéda motor ring pidabdab kahuripan. Saking para sisia SMP, SMA, Mahasiswa, pegawai kantor, buruh tukang lan krama tiosan pastika nganggé serana punika.

Indiké punika pastika taler kajantenang ring wawidangan désa ring Bali. Yéning aksi sané mangkin petani ring désa yéning nuju utawi lunga nyujur carik nyané jagi ngarit utawi ngaryanang pola-pali ring carik utawi tegalé sinah sampun lumrah jagi negakin sepéda motor. Punika taler yéning jagi matumbasan ka warung, lunga ka balé banjar, masiram ka tlabahé, ka tukadé lan separi-polah tiosan. Kramané mangkin tan lémpas ring ngawigunayang sepéda motor punika. Dadosné yéning selehin ring kulewarga sami anggén conto. yéning wénten kulewarga ring satunggil paumahan i biang utawi i mémé, i aji utawi i bapa lan i pianak utawi putrané kalih diri sané sampun manut yusa negakin motor pastika jagi maduwé pinih kidik tiga sepéda motor.  Ring kulewarga sané ekonomi nyané sampun raharja minabang maduwé mobil pinih kidik siki ngantos kalih mobil. Minabang nénten iwang yéning dados nikaang soang-soang diri madué sepéda motor.

Ring wawidangan sekolah baosang majanten wénten genah parkir sepéda motor utawi mobil. Pastika pisan genahé punika jagi kosek sangkaning akéhnyané sepéda motor, wawilangan nyané minabta pateh sekadi akéh sisiané sami. Kawéntenan puniki majanten patut  dados uratian. Sekolah sané sampun maduwé angkutan sisia wantah becik pisan. Utamin ipun sisia sané ngaranjing ring wawidangan Sekolah Dasar (SD), lan Sekolah Menengah Pertama (SMP). Mapan sisia punika durung kapatutang ngawigunayang sepéda motor duaning durung maduwé SIM. Yadiastun akéh sané durung antes menékin sepéda motor sampun ngawigunayang sepéda motor. Indiké puniki patut kadabdabin becik saking para penglingsir mangdané kemacetang ring margi agung nénten ngawetuang pikobet tur prasida ngirangin kebyahparan ring margi utaminé sangkanin nenten ngawigunayang helm. Utamané patut kelaksanayang saking soang-soang angga mangdané sutindih ngelaksanayang tata-titi ring margi sané kacumawis saking kapolisian raris side nemu karahayuan ritatkala warginé sami ngawigunayang margi agung ngaruruh pangupa jiwa nagingin pidadab kahuripané serahina.

I Déwa Gedé Trinandita
urati lan seneng ring parikrama Bali.