Puisi Putu Sedana; Mati Nguda

Gagambaran Dewa Gde Purwita; Sumber: dewagdepurwita.wordpress.com

Mati Nguda

Olih: Putu Sedana

madiané magantung senjata lanang

sirahé matekes bendéra, gelah

barak-barak karsané maules kenyung

putih-putih karsané tulus-mulus.

tegal parigkung katerebak tan sawetara

matatah mirah parangan

ngrobok duin urip

mirib mapinunas jelap lekad apang maan buka kéto

sambilanga sing nawamg nyén nundén muah ngajinin

inget sukuné pancer gumi

sukané aketi mabakti kén pertiwi

takut suarané sing katimpalan

masuriak nyerit belanda musuh kai

suara barak suria barak laksana barak.

anggené tidong gelah

kentelan serbuk tanah

idupé tungkulang suling tawah

atmané sing dadi puun

ngawewehin suarané tandicadik

musuhé katon kelepon

lantas nerumbag pagelaran yuda

masuriak nyerit belanda musuh kai

kanti nepukin unduk buka jani.

madiané magantung sanjata lanang

sirahné matekes bendéra gelah

marengin kenyitan apiné kuning bering

nyohsoh maserah angga marep pertiwi

magrebiug

tangkahé bolong.

barak-barak lambéné maules kenyung

putih-putih karsané tulus mulus

ambuné sumirit ngebekin jagat.