Geguritan Legaprana (1)

Olih: Potraka Damuh

Pinterest.com

pupuh i: ginada

/1/

peteng ramya macedaran, 

kembang api nulis langit, 

titiang nyuung ring paturwan, 

corak-corék uyuk-uyuk, 

bas kameled ngiket tembang, 

nyumu mangkin, 

jugulé adokang nyurat.

/2/

titiang damuh lintang alpa, 

dina sogata ngawitin, 

brahma lulut maring indra, 

aryang lintang ulam agung, 

sasih ipun maghamasa, 

laba alih, 

ingkel punyan aja punggal.

/3/

wantah titiang tan pajiwa, 

pindekan ya tan paangin, 

tluktak tan kadongsok toya, 

tur prapén kécalan ubub, 

tuara wénten kawigunan, 

makasami, 

pateh pisan tekén titiang.

/4/

sinampura titiang pangkah, 

buka jangkrik titiang mangkin,

mangedotang kampid emas, 

patigrapé patigrudug, 

engsap tekén déwék kipa, 

kerak-kerik, 

tong ada nglilayang arsa.

/5/

inggih bantang satwa titiang, 

mangda ngranjing atma kérti, 

wénten ringkes bebaosan, 

pamargané nyujur suung, 

pamalunan padorinan, 

suba pasti, 

tusing bisa ento tulak.

/6/

raris ada nak kélangan, 

kakutang ramané ngalin, 

nanging ipun tusing lasya, 

ping satus ya ngulang bangun, 

ka dinané ibi kocap, 

tan masalin, 

ramané tileh makalah. 

/7/

sang né munggah maring tembang, 

gedé karma anak lekig, 

mumah di banjar koripan, 

yusan ipun pitu likur, 

suba pragat makuliah, 

nanging mangkin, 

tuah masekeb jumahan.

/8/

nyemak gaé tusing genah, 

tuara nolih samping-samping, 

panak pisaga ba telah,  

bangun semeng saling rebut, 

nguber merta masambehan, 

né ring margi, 

kéto kocap odah-odah.

masambung...