Pidan Mekejang Berjuang Jani Liunan Nyuang

Olih: I Nyoman Manda


Gagambaran Hendra Gunawan, sumber; lukisanku.id

Niki puisin titiang metu ritatkala titiang miragi/nulis tutur para pejuangé rihin utamané ring banjar Ubung Penebel Tabanan. 

Sinamian sampun uning daerah Tabanan basis perjuangan rakyat Bali nglawan penjajah. Krama banjar Ubung puniki sané 75 KK cenik kelih lan para penuané ri pinanggal 5 April 1946 ketog semprog ngungsi ke carik lan tegalan ngantos ka gunung Batukaru lan alas Munduk Klesih. Para yowanané magabung pacang nyerang pos Nika ring Penebel tanggal 15 April 1946. Indik penyerangan puniki mangku desa Ubung I Gede Djagra nuturang punapi sregep lan kobaran semangat pemuda-pemuda Penebel lan laskar gerlia Tabanan tiosan mawinan prasida mademang telung dasa diri Nica ring posnyané lan ngrebut senjatané.

Penyerangan heroik pemuda Penebel puniki taler kacaritayang ring buku Bali berjuang pakaryan Nyoman S.Pendit. Indik penderitaan lan perjuangan krama banjar Ubung puniki kacaritayang olih I Gede Ketut Gunarta(mantas guru SMPN), I Gede Nyoman Gunawan, I Nyoman Mando(direktur BPR Penebel), mangku I Gede Nyoman Djagra, duk punika kantun alit lan ngranjing ring SR I Penebel, nuturang krama banjar Ubung sané kompak nganutin perarem banjar pacang salunglung sabayantaka nglawan Belanda . Guru-guru SR I Penebel sekadi Bapak Wayan Gelgel,(Kepsek), Bapak Wayan Radin, bapak I Gede Sukarna, Ibu Ni Wayan Rugeg, Ibu Anak Agung Rai sinamian berjuang nglawan Belanda mawinan sekolahnyané libur atiban.

Murid-murid SR I Penebel sangkan ongsokan guru-gurunnyané naaning keliling desa Penebel, Kopang makta sepanduk mangda kramané nglawan Belanda mawinan sinamian mabriuk égar nglawan penjajah. Dumun makejang berjuang sekadi krama banjar Ubung Penebel Tabanan. Menawi akéh banjar-banjar ring Tabanan lan daerah Bali tiosan berjuang salunglung sabayantaka nglawan Belanda mangda prasida guminé merdeka.

Perjuangan tulus iklas gigih perkasa perjuangan semeton-semetoné puniki sané kewarisang mangkin mawinan prasida bebas hidup merdeka, nglanturang hidup makarya, masekolah, ten wénten anak nindes. Niki sangkaning perjuangan mereka sekadi ring ajeng. Mangkin sesampuné merdeka--jani liunan nyuang--indiké puniki akéh kawacén ring surat kabar lan siaran TV. Akéh oknum pejabat korupsi, pipis bantuan sané pacang katiba ring rakyat plikesanga, akéh pis gumi garanga. Jani liunan girang nyuang, sing ja ngurus rakyat nanging ngurus déwékné padidi , plesir ka luar negeri.

Sesai surat kabaré nulis unduk anak nyuang pis gumi , unduk anak ngedum, unduk anak nglampahang sandiwara hukum, indik pembangunan ané bikaksana bijaksini, ajin-ajin kebutuhan pokok setata menékang, bensin menék, masuk jani liu ngonyang pipis, maubad maal, rakyaté pragat kena pajek kén setata mayah, pidan nyerahang jiwa raga apang guminé merdeka, jani girang magending ngalih liang, I panjak tuah maan janji-janji duén.

Dumogi para pejuang sané sampun iklas ngorbankan jiwa demi kemerdekaan mangda tatas uning asapuniki kasujatian jagaté mangkin. Dumogi dané saking linggih sané sampun tenang mangda ngastitiang jagaté mangda rahayu lan karma palané mangda nyejer sira ugi ja sané madaya usak ring gumi Indonesia puniki mangda tan memanggihang rahayu lan sengsara hidupnyané.

Patapan i lidi (nyanggra Pesamuan Krama Bali).

Alikan gumi sekadi mangkin maan demokrasiné sedeng maonjér enjuran, saking rihin sampun akéh kapanggih igel-igelan pragina guminé bakal ngadegang ratu, akéh sampun lelampahan sané kapanggih samian pada nguncarang sauhan munyi pacang mecikang jagat, nanging kantos mangkin durung kapanggih napi sané mawasta gemah ripah loh jinawi murah sandang murah pangan makejang ngancan maalang, makejang pada magarang menékang kanti tusing prasida baan nyujuh.

Nanging ané mamunyi lan masemaya apang nyidayang ia ngénterang jagat nandan I panjak apang nepukin bagia tuah tuturé duén kayang jani sing ada apa dé enu duén I panjak tuah maan makeengan duén. Makejang pada magrimingan kénkénang bakal ngalih pemimpin ané nawang keneh ulun hatin I panjak, ané mrasidayang nawang kleteg guminé, nyet Baliné, liu pada makeengan ané ngurusang guminé kayang jani kondén sanggup nandan panjaké buka semayané pidan.

Mawinan mangkin mlejit pakrimik ngudiang sing iraga krama Bali ané nyejerang prejuru ané bakal anggo ngurusang gumi Baliné. Uling pidan suba kudang montor bakat tumpangin nanging tuah amonto duén, sopirné ané bek kantongné, ané ngelahang montoré kelem-kelem nrima setoran. I panjak tuah mayah duén , tuah kena ongkos duén sing suba taén I sopir jawat ané ngelah montoré bakal mapitulung bakal mudahang ongkos apabuin kratis. Di keperluané duén manis kemikané. Sangkaning unduké kakéné ada mlejit pagrimingan Pesamuan Krama Bali(Kongres Rakyat Bali), ané bakal edot ngelah pemimpin ané nawang kletegan bayun anak Bali, ané nawang asta brata, ané nawang trikaya parisuda, né nawang masima karama, nawang tri hita karana,bisa nengokin anak lacur, bisa mapitulung tekén anak sing ngelah, bisa ngenjuang baas tekén anak sing nyidaang nyakan, bisa nengokin murid ané mlajah di balé banjaré, bisa ngundukang upacara, adat lan agama Bali, bisa ningehang munyin kulkul, bisa ngrasaang pakeengan wong tani di pasubakan, bisa merasa jengah lan lek yan guminé kameranan sekala niskala. Menawi tan méweh ngrereh anak Bali ané bisa ,,maBali” yan salunglung sabayantaka sabriuk panggul ring pakraman sawengkon Bali pada égar ngujegang mandara giri Baliné bakal mijilang pemimpin Bali sané kasungkemin sareng sami.

Menawi yan niri méweh yang sampun sareng sami krama Bali maikétan ngrereh 41 ribu langkung dukungan nganutin 10-13 persen persyaratan calon independen, sekadi patapan lidiné, krama Bali saking Gilimanuk ngantos Padangbay, Pabean Buleleng ngantos Benoa Badung rasané ten méweh maiketan masikian yén pacang sujati kayuné nindihin gumi Bali. Aduk gejerang krama Baliné sareng sami napi ten prasida pacang metu sang natha sané wikan wicaksana makampuh lan madestar Bali Indayang pikayunin sareng sami, anak wikan akéh ring Bali, para yowana, para pandita, para ksatria, para pemodak, budayawan, seniman, ikrama tani, bendega, gébrasang kayuné apang prasida Baliné kadandan olih anak ka balian.

Sekadi petapan I lidi yén ia tuah akatih padidiné anggo ngotékang luhu sing nyidaang nanging yén ia suba maiketan dadi sampat bakal aluh ngotékang luhu nyampatang natah, bakal tepuk ja bersih galang lan asriné. Indayang pikayunan lan dabdaban mangkin gejerang langséné tengkungang gending uling rangki Baliné bakal ngendingang Bali di kalangan Baliné apang prasida panggihin semita lelangunan Baliné. Dumogi.



avatarNyoman Manda
embas ring Banjar Pasdalem, Gianyar pinanggal 14 April 1938, sareng pangawi lianan sekadi Djelantik Santha, Madé Suarsa, Samar Gantang, Madé Sanggra (almarhum) miwah sané lianan dados redaktur majalah Canang Sari lan Satua. Kakawian dané kawedar ring Simponi, Bali Post, Harian Nusa Tenggara, Media Muda Balai Pustaka, Mingguan Merdeka Zaman, Suluh Marhaen, Pos Bali, Majalah Satua, Canang Sari, lan Suara Karya. Ngamolihang makudang-kudang penghargaan miwah hadiah, lan ngamolihang Hadiah Sastera Rancagé ping tiga.

1 comment:

  1. BOLAVITASPORTS PREDIKSI SKOR TERPERCAYA DAN TERAKURAT
    Pusat Permainan Live Casino Online Terpercaya Indonesia!

    Bonus 10% New Member Hanya Di Bandar Bolavita

    Dapatkan Bonus Casino Live Komisi Rollingan 0.5% + 0.7% Setiap Minggu Hingga Ratusan Juta.

    Bonus Diberikan Pada Pemain Casino Baik Menang ataupun Kalah.

    DAFTAR >>> DEPOSIT >>> WITHDRAW

    INFO Kontak Kami (24 jam Online):
    .
    • BBM: BOLAVITA
    • WeChat: BOLAVITA
    • WA: +62812-2222-995
    • Line : cs_bolavita

    ReplyDelete