Urip tan Maurip

Olih: I Putu Supartika

"Innocence" Gagambaran Chusin Setiadikara

Yéning ka Taman Kota, pastika tiang pacang manggihin anak sané masesanjan sareng kaluwargané, sareng gegélané utawi sareng sawitrané, lan wénten taler sané olahraga ring genahé punika. Yadiastun akéh sané nganggep samian anaké sané masesanjan irika bagia krana irika ipun pakedék pakenyung macanda, nanging tiang nénten ja bes rungu ring unduké punika. Sakéwanten tiang pacang lebih rungu rikala wénten gegéndong utawi anak sané ngidih-idih rauh ka Taman Kota. Krana gegéndong punika silih sinunggil anak sané rauh ka Taman Kota sané sepatutnyané taler sareng ngrasayang bagia. Boya ja tiang pacang ngenjuhin jinah ring gegéndongé punika lan ipun ngambil jinahé punika saha kenyem, nanging tiang maduwé tetujon lianan. Tetujon tiangé wantah dot uning, napi sané makada anaké punika dados gegéndong ring genah anaké sané kaangep sedek ngrasayang bagia.

Dugas niki, rikala tiang masesanjan ka Taman Kota tiang manggihin gegéndong punika. Gegéndong sané pepes panggihin tiang rikala masesanjan irika. Anak isitri tengah umur sareng pianaknyané kakalih sané kantun alit sambil nyuun krésék selem sané nénten uningin tiang madaging napi. Pianakné asiki kantun masangkil lan malih asiki minab yéning masekolah kantun kelas 1 utawi kelas 2 Sekolah Dasar. Ipun data maakin anaké sané masesanjan irika, ngruruh anak olas pacang ngenjuhin ipun jinah, yadiastun nénten samian sané ngenjuhin jinah punika “ iklas” nyerahang gelahné.

Tiang nyingakin ipun sakadi nénten maduwé kenyem, kadi kélangan semita. Pajalanipuné kambang, sakadi nénten marasa ngentegin tanah. Punika taler paliatipuné puyung, sakadi nerawang suwung. Ipun urip sakéwanten nénten maurip. Wénten anak sané olas tur ngenjuhin jinah. Wénten sané nyaru-nyaru miwah sinis, lan wénten taler sané ngambrés nundung ipun. Napiké ipun nénten marasa sakit ati rikala punika? Yéning ipun sebet, ring dija ipun pacang ngadu? Napiké ipun pacang ngadu tekén langité, utawi bulané rikala peteng sinambi yéh peningalanipuné nyrékcék kadi sabeh lan membah melusin pipinipuné?

Dot sujatiné tiang negak sareng gegéndongé punika masambilan ngorta ring sisin taman kotané katimpalin yéh putih sumangdané tiang uning rasan idup sané nénten marasa utawi kopi pait sumangdané tiang taler uning pait pajalanipuné. Tiang dot uning ngenénin indik déwékipuné. Uning napi sané makada ipun dados gegéndong, nénten marasa sedihké yéning wénten anak lianan sané nyelék-nyelékang ipun utawi nyaru-nyaru rikala ipun maakin anaké punika, lan sapunapi rasané yéning wénten penertiban saking petugasé risedek ipun ngidih-idih. Lan wénten taler keneh tiangé sané lebihan tekéning punika: ngorta sareng anak alit sané kaajak ngidih-idih. Tiang dot nawang napiké ipun masekolah, utawi napiké ipun bisa mamaca, nulis utawi ngitung. Napiké ipun ngrasayang napi sané karasanin olih anak alit saumuranipuné. Maduwé cita-cita dados polisi, maplalian sareng kanténané, makedékan, mecik HP, utawi mabalih kartun sané kasenengin, lan maplalian layangan rikala masan layangan ring sisin marginé. Lan tiang taler jejeh, yéning anaké alit punika rikala kelih nénten ja dados polisi utawi guru utawi pegawé bank, nanging ipun dados anak ngidih-idih. Dumadak ja nénten.

Dados gegéndong wantah jalan idup, sakéwanten prasida kalémpasin yéning maduwé utsaha jagi ngalémpasin. Nénten wénten anak sané numadi ka mercapada puniki maduwé papineh dados gegéndong utawi dot dados gegéndong. Pastika samian dot dados manusa sané sukses lan maguna. Nanging yéning wénten anak sané dados gegéndong sangkaning wénten sané makada lan harus kajalanin, napiké i raga pacang nganggep punika jelék?

Dumadak anaké alit sané ngidih-idih sareng méménipuné punika dados sujana maguna.

Singaraja, 16 Januari 2016