Banyu Pinaruh

Olih: Cok Sawitri
http://1.bp.blogspot.com/-apQGVKwmJ0U/UfAocb6UmSI/AAAAAAAAByw/gfagDBFlKIY/s1600/
Sumber Gagambaran


cacingakan luru
clapat clapat angin-né nutug miik
dija unduk i tulang yuyu
makanti bulun siap
dija indik gula barak panyamaang
kakribisan menyan majagau
kailihin andusé dakep
ngaruruh derman minab sapunika
sané perah tan kaperahang
patut ambil raris lébang
bungayang tan pacunduk
bijayang tan pa galih
anggén kenyung mangde kenying
pakenyitnyit ring kayun
duh, ngaras-aras semarané
bilang bucu marawat rawat
bilang buku ngetor ngijik
bilang dangké bengong ngarab
ané uber ngantiang di manah
malah kaukin bakat jeritin
nang malinggih sekenang
luru cacingakan lidahé puyung
pakeritis inguhé pesu
ditu bani ngantiang di metén
ané kaajap lakar mulih
ngumkum miik masigsigan tangis
pandusang apang derman.

2016


NB: Puisi kakawian Cok Sawitri sané mamurda “Banyu Pinaruh” puniki kaambil saking facebook dané Cok Sawitri.


No comments