Bangli Sastra Komala

Logo BASKOM

BASKOM utawi Bangli Sastra Komala wantah komunitas sastra sané wénten ring Bangli. Komunitas puniki embas pinanggal 13 Maret 2015, sané kadasaran antuk kirangnyané pangawi, utaminnyané pangawi sastra Bali modéren ring Bangli. Sangkaning indiké punika, ngawinang Alit Juliartha sareng sawitrannyané ring Bangli sané seneng nyurat nglaksanayang paparuman ring Pasraman Bakti Udiana Sastra-Taman Bali duwén Wayan Supertama. Saking paparumané punika raris wénten “ide” makarya genah “gradag-grudug” nyastra sané kawastanin Bangli Sastra Komala.

Program kapertama saking komunitas sastra BASKOM puniki wantah ngamedalang cakepan mabasa Bali marupa pupulan satua cutet. Risampuné ngentasin makudang-kudang pakéweh sakadi janji-janji tanpa bukti rikala anggota komunitasé puniki ngajuang proposal wantuan prabeya anggén nyétak buku, cakepan punika raris prasida kamedalang baan murdané “Pasamudaya Rasaning Bangli.” Ring cakepané punika madaging 15 satua cutet saking 10 pangawi Bangli. Risampuné prasida ngamedalang cakepan “Pasamudaya Rasaning Bangli,” rarincikan salanturné saking komunitas puniki wantah makarya pupulan puisi mabasa Bali pangawi Bangli.

Saking komunitasé puniki, akéh embas pangawi Bangli sané aktif makekawian. Pangawi punika sakadi Alit Juliartha, Agus Darma Putra, Nengah Jati, Lilis Prismayanti, Angga Para Darma, Rai Asmara Dipta (pangawi mabasa Indonésia), Ketut Renes, Wayan Supertama sané ngarangkap dados pembina BASKOM, lan Gusti Ngurah Agung. Kakawian-kakawian saking pangawi punika sampun kawedar ring koran utawi majalah sakadi ring Bali Orti (Bali Pos), Médiaswari (Pos Bali), Majalah Satua, Canang Sari, miwah sané lianan. Sangkaning komunitasé puniki, ngawinang sastra Bali modéren nyansan semarak, lan nyansan akéh embas pangawi sané pacang dados pewaris lan penerus sastra Bali modéren. (*)