Lebian Seniman, Engsap Tata Kelola

Olih: Dewa Gde Purwita-Sukahet

Cara omongan calon pemimpine ane sedeng ngalih suara ke desa-desa, nganggo pendekatan kebudayaan lantas ngomongang unduk niskala, di lontar ne mungguh kene, di pustakane ento mungguh keto, mekeplug sajaan raosne, ngortang unduk, ngortang budaya. Kewala engsap ane harus tatas pelajahine teken calon pemimpine, hukum tata kelola negara, niti sastra, raja sasana. Tusing je pelih iya ngomongang keto kewala ane ngae lucu seolah-olah masalah kebudayaan pragat baan baang dana kewala tusing paham tata kelola, yen lakar dadi pemimpin, ilmu tata kelola negara, ilmu politik kebudayaan ento sandang pelajahin lan ngertiang unduk-unduk ne. Sebab iya lakar memimpin negara, mimpin daerah, memimpin ento tata kelola lan sesana, dasarne tetap kebudayaan. Kewala apang seken.

Patuh cara ekosistem seni ne di Bali, dunia berkesenian di Bali bek sajaan ada seniman kewala ngengsap teken harus ada ane nyongkokin bidang tata kelola. Uli dija sumber susut ne? Jelas lembaga akademik seni, uling pendidikan dasar neked kampus perguruan tinggi, rasane sing sajaan ada pelajahan ane serius teken tata kelola. Yen di Jawa, kampus-kampus e suba uli pidan ngae jurusan tata kelola seni, khusus ngajahin tentang kengken mengelola seni apang ekosistem ne nyidang hidup.

Ekosistem seni ento ada seniman, lembaga seni akademik atau swasta, penulis, kurator, manajemen seni, tukang handle karya (art handling), artshop, galeri, media komunikasi seni, museum, kolektor, pengamat lan kritkus seni. Yen jaman jani, media komunikasi seni ento suba beragam lan bek ada misalne facebook, instagram, tiktok, website, yen koran jak majalah suba bedik. Di Bali de je ngalih anake ane nyak nggelola seni, ngalih penulis seni suba keweh, bedik ane muda-muda nyak nyemak gae nulis, padahal dadi seniman ajak dadi penulis anak luung salingan ke dadi tata kelola. Istilah tata kelola ne patuh ajak manajemen seni, kengken baan memanajerial seni ne apang lantang tuuh, hidup terus ajak berkembang.

Di kampus-kampus seni di Bali, tata kelola mare ada abesik jurusane di kampus seni, dan ento mare ada. Yen cara anak ngorang, luungan terlambat daripada tusing sajaan ada. Nah dong suba je, yen dadi baan balikang, uling pidan ngudiang gen? Naah ne suba pentingne pemangku kebijakan alias pemimpine di pemerintahan lan di kampus paham teken kebudayaan, yen ngerti dogen konyangan anake ngerti jak nawang, kewala yen paham tonden karuan. Kita harus memulai jengah, kengken je carane ane strategis apang tata kelola seni ne dadi minat di kalangan anak muda ane lakar masekolah ke seni. Seni ane jani suba melenan teken ane pidan, seni pidan nganggap seniman ento anak jenius, satmaka cara tangan kanan bhatara, seni ento agung, yen cara jani, seni ento suba madan kontemporer, bebas lan apa gen dadi orang seni, nyen gen bisa dadi seniman.

Sebab seni suba cara produk industri sekaligus yen di negara-negara maju ento seni suba dadi salah satu senjata anggon ngempur kebudayaan negara tetangga. Yen sing uling jani ada anak serius melajahin tata kelola seni, mani puan prade ada anak luar nyemak gae manajemen seni, anak Bali ngerengkeng suba. Apang tusing keto, perlu jani pelajahan tata kelola seni masuk mata kuliah wajib lan seriusang ngaenang bahan ajar ne disamping mula ada jurusan khusus tata kelola seni. Apang tusing cara calon pejabate ento, melepuk ngortang kebudayaan kewala tusing ngerti tata kelola, di seni anak patuh dogen, seniman bek ada kewala engsap teken tata kelola seni. Inget nyilem, de angsap teken ngelangi.

Pohmanis, 16 November 2024