Ada Satua Pantaraning I Bendéga lan Kurenané

Olih: Komang Adnyana

Sumber Gagambaran: id.pinterest.com

Dugas jukung i béndéga mara ngliwatin ombaké di pasisi, mara nyemunin ngungsi tengah pasihé, nglangkungin lancuté ngléncok kerug kerug, kracak krécék, di betén bulané galang nérdér, kurenané masé mara sajan mungkah lawangan, ngalélésang kamen, nyerahang awak, nyerahang susu, nyerahang pupu, pasaréané pakréot, munyin bibihé paling mapalu cara kricikan ombak.

Jukung i béndéga sakamedik majalan, ngatengahang di tengah pasihé, lancuté karasa malomba-lomba, ngléncok dini ditu, sayan ka tengah, sayan nyenikang lancuté, pasihé degdeg, sunaran bulané tusing ada ngempetin, pasihé galang cara kolam kasundarin sénter ageng, lawatan i béndéga lan jukungné, uli baduur, cara lawatan i wayang di keliré.

I kurenan suba maserah awak, matédoh, majujuk, ngeleser, kabudang bading, kaseluk, kateteh, kagutgut, angkihané daas doos, pasaréané pakréot, limané patigrapé, saling gabagin, saling kaplakin, saling impek, cekceké dengang baduur, sada macepol ulung, belas di betén plangkané, pacroét cak cak cek cek kema mai, tusing ada lampu ngendih, tuah sundaran bulan ané nyusup uling bolong-bolong loster témboké, ngaénang jejelegé dadua, tuah ngenah masawang-sawang.

I bendéga suba neked di tengah paling tengah uli pasihé linggah, yéh pasihé degdeg, lancuté adéng makélok-kélokan cara ririg-ririgan sirah anak cerik dengak dengok kaampehang angin ngesir, lantas i bendéga majujuk, ngasisiang pencar, laut mulang pencaré ané adéng-adéng kelem ka betén yéh pasihé, i bendéga sayaga ngisiang bongkolné, lan menain batisné ané napak kayu jukungé, apang tusing limuh lan ulung macebur.

I kurenan enu itep, angkihané sayan daret cara koosan angin di sisin umahé, paek pasihé, cara kerugan ombaké, gablér-gablér namplak bias, nepén batu, i kurenan magimeh, pasaréané nyasan kréat-kréot, kliudané gagésonan, mangéncolang, magiseh daah duuh, satondén bah maglebug, nyadédég, tuah jejelegé dadua ngenah masawang-sawang, sundaran bulané tusing nyidaang ngédéngang makejang, cara bareng milu-milu nekepin.

I bendéga ngedeng pencarné, sagét suba karasayang ada ané nglawan, ada klejat klejat di tengah pencarné, ngadéngang ia ngedeng, apang tusing déwékné ané ulung macebur, jukungé enu marérén, di yéh pasihé degdeg, munyin mesiné adéng madingehan, dugas ia nolih isin pencarné, aget soroh dasa ukud ada bé ané nyangkét ditu, klijak klijuk satondén kaclempungang ka wadahé gedé.

I kurenan nungkayak, apa mirib katungkayakang, laut buin kateteh, pang keti, bon peluhé malimpug, macampuh ajak bon pakeh uyahé, uli sisin umahé, kakesirang baan angin petengé, ané besik dua macelep masé uli loster umahé, malomba ajak sunaran bulané, lan milu masé namplak kulit i kurenan ané sedeng magimeh maadu tempuh ajak kulit ané lénan.

I bendéga marérén akejep, paliatné joh karep, nepukin endihan sundih bendéga-bendégané ané lénan, ané majohan uli tongosné mencar, ané patuh masé paturu mencar cara déwékné, di betén bulané ané enu galang maglanaran, cara sundih blanclong di durin keliré, lan déwékné tuah wayang ané kaigelang olih i dalang, diastun tusing seken ia nawang, dija dalangné nongos?

I kurenan nyedédég buin.

I bendéga mulang pencarné.

I kurenan adéng-adéng mungkah jelanané, gagésonan buin ngunebang.

I bendéga negak di badan jukungé, limané anéh nisi bongkol pencaré, ané anéh nyapit roko.

***

I bendéga maid jukungné ka pasisi, menahin pencarné, lan ngasisiang wadah-wadah kotak ané suba bek misi bé, ané enu klijak klijuk klépat-klépat, tondén makejang bé-béné mati, enu ada ané angkih-angih, katibén matan ai semengan, matané kelam kelém, ada ané nelik, ada ané malodlod ulian mapalu paturu timpalné, ulian matumpuk saling teteh di wadah béné kosek.

Sakabesik timpal i bendéga teka, maid jukungné ka pesisi, mantokang jukungné apang tusing saup lan plaibang ombak, ngasisiang bé uli wadah kotaké, sada gupuh nyagjagin tengkulak ané suba ngantosang uli tuni daslemahé, nyerahang asil luasné ibi lemeng, apang payu malebengan, apang payu ngasukang pianak, apang payu mayadnya lan di ageté ada anggon sesepelan.

I bendéga nolih timpal-timpalné, ada adasa bendéga ané enu ka pasih di sisin pasihé ené, ané makejang ngelah umah marupa pondok-pondokan sadarana, matémbok batako, maraab genténg, tusing misi kaca, tusing misi panyengker, tusing misi keramik, apabuin misi gebyog aji kayu jati coklat maukir.

Uli asia timpal-timpalné, tuah I Blauk ané tusing ada luas ibi lemeng, timpal-timpalné ngorahang I Blauk gelem, kena panes uli semengan, tusing nyidaang kija-kija, sejabaning mamules di pasaréan, lan masaput tebel, padidiana ia ditu, wiréh tondén ngelah kurenan.

I bendéga mara mungkah jelanan, tondén maan mabersih, tondén maan maganti penganggo, kurenané suba némbét, maid déwékné, kurenané suba nungkayak, jelanané sépanan kasépak, apang tusing maampakang, cara biasané, ia lakar ningehang kurenané magimeh, ia nyambatang: Bli bendéga siteng, bendéga kuat, muani andel, muani pasih, ngalahang ombak, ngalahang pasih, cakcak angin, uyak ujan, nglintangin lancut, ngalahang idup, kurenané suba magimeh, patuh cara dugas satondén ia luas ibi lemeng, i bendéga tusing las lakar nyuudang, payu milu magimeh, bon pasihé karasa ngebekin umahé ento, ombaké karasa milu ka tengah umahé, isin pasihé karasa maluncaban, pakecoscos, lancuté karasa mauseran di pasaréané, pagrudug, ngléncok, muncrat!

***

Dugas jukung i bendéga mara ngliwatin ombaké di pasisi, mara nyemunin ngungsi tengah pasihé, nglangkungin lancuté ngléncok kerug kerug, kracak krécék, di betén bulané galang nérdér, kurenané masé mara sajan mungkah lawangan, ngelélésang rok, nyerahang awak, nyerahang susu, nyerahang pupu, pasaréané pakréot, munyin bibihé paling mapalu cara kricikan ombak.

Dugas mara ngelésang pantokan jukungné, satondén ngidupang mesinné, i bendéga cara biasané tolah tolih, masé tuah ajaka sia ané majalan luas, jukungné I Jeek jani enu tileh mapantokang, tusing ngenah masé ané ngelahang ada di sisin pasihé, kanti timpalné suba sakabesik majalan, jukung-jukunge ngliwatin ombaké, nuluh tengah pasihé.

I Jeek koné gelem, masuk angin.

Di daslemahé, i bendéga cara ibi puané maid jukungné, ngasisiang bé uli wadahné, nuluh i tengkulak, maekin umahné, i kurenan suba nyagjag uli panguyahané, limané enu kaput uyah, mabo pakeh, dugas déwékné katuludang, laut sauliring isin pasih, krébékan lancut, kerugan ombak, makejang nugtug ka tengah umahé, satondén déwékné mangapung-ngapung, cara ngambang di duur yéhé, di subané maan muncrat.

***

Dugas jukung i bendéga mara ngliwatin ombaké di pasisi, mara nyemunin ngungsi tengah pasihé, nglangkungin lancuté ngléncok kerug kerug, kracak krécék, di betén bulané ané suba ngigisang galangné, kurenané masé mara sajan mungkah lawangan, ngalélésang panganggo, nyerahang awak, nyerahang susu, nyerahang pupu, pasaréané pakréot, munyin bibihé paling mapalu cara kricikan ombak.

I bendéga matolihan kuri, sig ririg-ririgan punyan nyuhé di pasisi, tuah ajaka sia ané luas, jukungné I Batur enu mapantokang, ngenah masé umah-umah bendégané marérod, umahné ané paling tanggu kangin, masundih remrem, lan sayan nyenikang, di subané ia sayan ka tengah, marawat muan kurenané ané bunter putih, bibihné ané tipis, lan bangkiangné ané lantang, pastika kaliput dingin ia padidina, ulian tondén masé ada pianak.

***

Dugas jukung i bendéga mara ngliwatin ombaké di pasisi, mara nyemunin ngungsi tengah pasihé, nglangkungin lancuté ngléncok kerug kerug, kracak krécék, di betén bulané ané suba ngigisang galangné, kurenané masé mara sajan mungkah lawangan, ngalélésang daster, nyerahang awak, nyerahang susu, nyerahang pupu, pasaréané pakréot, munyin bibihé paling mapalu cara kricikan ombak.

I bendéga suba di tengah, mara ia inget, dugas maid jukungé ngliwatin ombaké, ia ajin, jukungné I Madé enu mapantokang, tusing masé ngenah I Madé, tuah ajaka sia ané luas, cara di dina-dina ané malunan, setata tusing jangkep, tusing nyidaang mapunduh makejang, kéto masé di subané di tengah, makejang ngungsi genahné soang-soang, mapan kéweh mencar bé mapunduh, sinah tusing ada bé nyak nongos mapunduh.

Di daslemahé, di buin maniné, ia ningeh, I Madé gelem, asam uratné kambuh.

***

Ia mara inget, jani masé tusing makejang timpal-timpalné luas, jukungné I Wayan enu mapantokang, dugas ia maid jukungné ka tengah, sada ada ané ngorahang, I Wayan nyakitang awak, tunduné bulenan, mirib ulian képék nguyeng pencar, nyorog jukung, uyak angin, lan maan hujanan dugas ngajang yéh pasih ka tongos panguyahané.

***

I bendéga ngedeng pencarné, sagét suba karasayang ada ané nglawan, ada kléjat kléjat di tengah pencarné, ngadéngang ia ngedeng, apang tusing déwékné ané ulung macebur, jukungé enu marérén, di yéh pasihé degdeg, munyin mesiné adéng madingehan, dugas ia nolih isin pencarné, kasiab ia, sayan dina sayan ngeliuang bé-béné nyangkét sig pencarné, soroh séket ukud, klijak klijuk, kanti gupuh ia maid pencarné, nekekenang gisiané, menahin tongos batisné napak, satondén bé-béné katuruhang ka wadahé gedé.

Sedek marérén, ngenjitin roko, ngangsehang apang rokoné ngendih, ulian anginé daret, ia inget, jukungné I Mokoh enu mapantokang dugas makejang timpal-timpalné majalan luas ka pasih, miribang I Mokoh jani gelem, gelem apa mirib, ia patitaton, sakabesik asané timpal-timpalné gelem, mirib ulian guminé suba sinur, mirib ulian bendégané suba sesai tamplak ombak, cakcak angin, uyak matanai, matimpal peteng.

I bendéga meték-metékin, suba ada duang bulan, karasa kena gilir timpal-timpalné gelem, jani I Mokoh, i puan I Wayan, i telun I Batur, i petang dina I Jeek, i limang dina I Blauk, i pitung dina I Gedur, i nem dina I Patra, i pitung dina i Lagas, i kutus dina I Landung, i sia dina I Raka, sakabesik timpal-timpalné gelem, ada sakit basang, sakit sirah, masuk angin, tuju, bulenan, kohkohan, karasayang suba sayan ngenduk-ngendukang bayun bendégané, lan guminé sayan ngwayahang.

***

I bendéga marérén akejep, paliatné joh karep, nepukin endihan sundih bendéga-bendégané ané lénan, ané majohan uli tongosné mencar, ané patuh masé paturu mencar cara déwékné, di betén bulané ané sayan ngendukang cahyané, manuju tilem, cara sundih blanclong remrem, kadampeh angin peteng, di durin keliré, lan déwékné tuah wayang ané kaigelang olih i dalang, diastun tusing seken ia nawang, dija dalangné nongos?

Wadah béné mara misi atenga, dugas ia makita sajan mabalik ka pasisi, tusing cara biasa-biasané, ia makita mabalik, cutetné mabalik, tusing masé ulian inget tekén kurenané, ané suba angsekanga lan kecrotina pang telu satondéné majalan luas, kéwala ia marasa jeg kenehné kedeh makita mabalik, apanga mulih, apanga ka pasisi.

Sambilanga nungkulang kenehné, majlawatan jukungné I Raka ané enu mapantokang, dugas ia nuju tengahing pasih, ada dogén ané gelem, ada dogén ané ngaénang tusing jangkep bendégané luas di petengé jani, laut i bendéga nuding jukung-jukung bendégané ané lénan, di tongosé lénan, cara meték timpal-timpalné makejang.

Di subané tusing nyidaang nungkulang kenehné, payu masé ia ngulah pasisi, jukungé jani suba nuju pasisi, ngliwatin lancuté, ngliwatin ombaké magebyur, awak i bendéga kena tempias, belus, lan muané kena kaprétan ombak, marasa pakeh di bibihné, marasa ngeres di pipiné, biasé neket, ia ngéncolang maid jukungné, sakuat-sakuatné negul jukungné di pantokané, apang tusing maserét kedeng ombak, plaibang lancut tanpa ada ané negakin.

Adéng-adéng i bendéga majalan, batisné nyekjek biasé, mabo pakeh uyahé mapunduh madérét-dérét, matekep upih, di kubu-kubuné cenik maraab ambengan, bulané ngintip baduur, tokéné mamunyi di punyan nyuhé ligir, lan pindekané mapiteh di samping punyan waruné.

I bendéga majadengan, di subané ada nyang dasa méter uli umahné, ané masundih remrem, matolihan ia kauh, enu ngenah jukungne I Raka mapantokang, lan muncuk ombaké kaplés-kaplés nyilapin.

I bendéga nugtugang pajalané, dugas ningeh munyin isin pasihé sagét suba sépanan neked di tengah umahné, cara biasa-biasane di nuju daslemahé ia mulih uli luas, magimeh ajak kurenané, lantas ngéncolang pajalané, duaning grudugan lan kerugan munyin pasihé, ané biasa nugtug déwékné, dingeha sayan-sayan ngilis, diapin déwékné enu ada di sisi.

Dugas i bendéga nendang kuriné, kanti mamunyi magedebuag, sépanan suba ada ané makecos magényolan gangsuh nglépat ngliwatin déwékné, mabo pasih, mabo pakeh, majejeleg cara bé gedé, tur nglélam masisik.

I Raka nengok uli umahné ané duang selat uli umahné, katugtug baan kurenané, ané enu nyangkil pianak cerik, sambilanga tengas-tengés, bangkes-bangkes, mula saja mirib ia gelem.

“Nak ada apa né Ngah, adi ada munyi uyut dingeh,” I Raka nakonin.

I bendéga tondén nawang kénkén carané ngorahang unduk apa ané tepukina i busan, lan kurenané ane enu nungkayak, nyelepetég, di duur pasaréané, awakné malalung kaliput bias, kaliput sisik, daas-doos.

Ponjok Batu, 2020

Komang Adnyana
Lekad di Gunaksa, Klungkung. Kedaut tekéning carita, lan di kénkéné makarya cerpén mabasa Bali wiadin Indonesia. Pupulan cerpénnyané kapertama, Meték Bintang, ngamolihang hadiah Sastera Rancage 2012.