Ukuran Anak Muani

Olih: I Gusti Lanang Suteja Narendra

Sumber Gagambaran: firenzelai.tumblr.com

“Mék, kénkén sih sujatiné ukuran anak muani ané luung?” I Kadék pianak tiangé ané mara menék bajang matakon tekén méméné. Sambilanga nulungin nyait porosan, di ampiké ajaka dadua mareremihan. Tiang mirengang sambilang ngecelin siapé sangkur. Pih, demen tiang mirengang raraosané ento, wiréh adung pesaja mémé kalawan pianakné cara matimpal. Sakéwala ber soléh tingalin tiang panampén méméné. Ngarépé limané,cereka pahan pianakné kanti makiud. I Kadék ngatijang.

“Nak éngkén sih ené? Dadi Émék ber nyerek?” Usuh-usuhina pahané balan. Méméné ngaraos bangras, kéwala kisi-kisi.

“Nyai, enu mapecéh suba nakonang ukuran nak muani. Suba taén Nyai ngasanin?” Piiih... nagih makeplos paningalan méméné nengéng. I Kadék masaut.

“Iiih... Dadi kemu lakuna raosé? Buang makenta Émék nénénan! Maksudné kritéria anak muani ané luung anggo kurenan, kéto!”

Méméné ngalingus, lek kabilbil. Mapi ngalanyingin semat, sambilanga ma "o" lantang pesaja.

“Yén dadi pilih, alih apang pada nak Bali. Yén dadi lobaang, alih apang nyama, apang paek umahné. Apang élah Nyai nelokin mémé bapa buin pidan. Kéto masi di lacur Nyainé makurenan, élah reramané ngejotin Nyai bantas aru agemel.” Méméné mapitutur, jani sérius pesaja kanti ngandegang magaé. I Kadék anggut-anggut.

“Apa buin, Mék?”

Méméné buin nutur, “Pilihin ané suba magaé. Yén dadi lobaang, alih ané suba ngelah sekaya. Boya ja matré cara raos janiné. Sakéwala yén suba ada cagerang, élahan Nyai makeneh.”

Buin I Kadék anggut-anggut.

“Apa buin, Mék?”

Méméné nyelekitang semat, lantas nyautin.

“Pilih ané solahné luung. Nyak bertanggung jawab tekén kurenan pianak. Sayang tekén matua lan kadang wargi. Apang tusing Nyai dogén jangkutina, mémé bapané kiladina... Ih... Sing Émék setuju!”

I Luh sayan keras anggut-anggut. Ia ngarenggeng, “kéweh masi, o? Terus, apa buin Mék?”

Méméné Nyautin kisi-kisi. Kanti sérius pesaja tiang mirengang, apang seken dingeh.

“Pilih ané majenengan gigis. Yén dadi lobaang, ané bagus alih. Masak Nyai lakar iklas jangkutin anak muani bocok aidupan? Ish... Ish... Apang dohanga tekén widiné! Buin besik....”

Méméné majadengan, makipekan sik tiangé, buka anaké takut pireng tutur rahasiané. I Kadék sayan penasaran, paekanga tegakné sik méméné. Tawanga tiang iteh magecel, ia ngalanturang raos tetep kisi-kisi. “Yén dadi pilihin, alih ané siteng. Kuat bantat cara kunali. Apang nyidang ngaé Nyai klisah-klisah malisah!”

I Kadék sing resep, ah... mirib ia mapi sing ngerti, lantas matakon mamelog, “maksudné éngkén to, Mék?”

Méméné neketang jeriji tujuhné di bibih laut ngupin, “ssssstttttt.... Buin pidan Nyai pasti ngerti!”

Piiih... celekotokané... Kanti nyéjé kéto ukuran anaké muani ané demenina tekén anaké luh. Béh... Tiang mireng sambilang kenyem-kenyem.

Buin pireng tiang I Luh ngaraos, misi kedék cekikikan makejit karep tiangé.

“Piiih... Saseliran Émék ngalih kurenan. Berarti Bapak masuk kritéria, o?”

Tiang ngajengit, kimud kabilbil. Saja sasenggaké, makejang anaké demen ajumang. Ber prajani kembang tangkahé, legan kenehé tan kadi-kadi.

Sagét méméné ngaraos sinted pesaja, “dugas milihin Bapan Nyainé, Émék lepet!” Kéto pasautné ngantrog, bibihné munju cara ngalonod mako agemel.

Mbééé... Makesiab tiang ningeh raosné ento. Ulian kabilbil, nyaruang tiang ngeleg pikang siap kurungané. Siapé bungker, lantas pesu uli jitné... Crit... Crit... Crit...

I Luh ngaraos tekén I Kadék pianakné, sada keras pesaja.

“To...cara siap kurungané Dek. Kujang laut??!!”

Mbééé... potokan Dji Sam Soé né enu mabaa bakat gelekang... 

(Macang Rumah Cinta Seribu Jendela)

I Gusti Lanang Sutéja Naréndra 
magenah ring Karangasem tur makarya dados guru.

No comments