Nyepi Segara, Bakti Nelayan tekén Déwa Bayu

Olih: Ni Nyoman Ayu Suciartini

Sumber: pixabay.com

Bayu pramana minakadi téma ring Pésta Kesenian Bali (PKB) warsa 2019. Bayu punika ngartosang “kekuatan” utawi gagemelan Bali anggén mapidabdab ring éra révolusi industri sekadi sané sampun bobot kebaosang ring sajebag média online utawi média cetak. Bali sané sampun kaloktah antuk julukan “Pulau Seribu Pura, “Pulau Déwata”, lan pulau pariwisata sané pinih becik lan utama nénten ja usan asapunika. Bali mangda terus mapineh mangda julukan punika nénten nungkalik utawi doh saking kenyataanné. Bali ring kapemimpinan Gubernur Bali, I Wayan Koster, sampun becik pisan. Malih ngangkat lan ngelestariang basa miwah sastra Bali mangda nénten punah utawi ical, utaminnyané ring génerasi milénial. 

Ring PKB 2019 manten kacingakin makudang-kudang stand, pangumuman, miwah arah-arahan sané sampun nganggé basa Bali. Niki sinalih tunggil cara anggén ngajégang basa miwah sastra Bali. Yéning basa miwah sastra Bali sampun kagemel, sampun kapiara becik ring gumi Bali, sinah Bali nénten ja pacang kilangan “ruh”. Sané lianan sané patut kalestariang inggih punika adat, seni, miwah budaya Bali. Sampun kaloktah embas ring Bali pasti dueg ngigel, dueg nopeng, utawi kesenian sané lianan, kénten kocap sesenggakan anaké ring gumi selat pasih. 

Makéh kesenian, adat, utawi budaya sané sampun kalimbakang ring Bali. Mapecingak ring Bali sané makeh madué pasih, bek anaké milih dados nelayan. Akéh isin pasih sané sampun kaloktah, minakadi bé pasih, uyah, udang, miwah sané lianan asil pasih Baliné sampun kajulukin becik. Milih profési dados nelayan ring Bali wénten awig-awigné utawi adat sané kapercayain pacang ngamargiang pejalan sané becik tur rahayu. Sakadi sakancan nelayan ring Nusa Penida, Klungkung nglaksanayang ritual mawasta “Nyepi Segara”. Boya ja patuh tekén nyepi sané kamargiang umat sareng sami pinaka patinget warsa anyar. Nyepi segara puniki suksman ipun nénten nglaksanayang pakaryan ring pasihé. Nelayan, pangendara kapal boat, miwah sané ngrereh pangupa jiwa ring sejeroning pasih, makejang ngentenang awak mangda nénten nglaksanayang pakaryan awaian. Sané kalaksanayang inggih punika mabakti tekéning madué idup, sané ngicénin rahayu, ngicénin rezeki ring pasihé, inggih punika Déwa Bayu miwah Déwa Baruna. Dados nelayan nika mapaiketan ring bayu utawi angin. Angin minakadi penanda pajalané pacang becik utawi pocol napi buin ngranayang piduka. Warga nelayan ring Klungkung puniki sanget percaya yéning Déwa Bayu sampun mapaicén penanda. 

Wénten denda utawi sangsi sané kaicénin ring warga sané piwal ring aturan puniki. Dendané marupa baas utawi jinah. Nanging, nénten ja denda sané katakutin wargané. Biuta utawi duka Déwa Bayu miwah Déwa Baruna sané paling kedohin. 

Nuju nyepi segara kelaksanayang, samian warga nelayan miwah sané lianan magotong royong midabdabin upakarané. Wénten sané ngalungsur tirta, panglukatan, miwah banten sané pacang kaunggahang. Krama ngaturangayah mangda Déwa Bayu lan Déwa Baruna ngerestuin pajalan upakara lan ngarereh pengupa jiwa mangda becik lan mamargi antar. Niki sané dados pemandangan lian ring segara sané ngawinang turis lokal utawi turis dura negara kadaut. Parikrama nyepi segara niki kalaksanayang nyabran sasih. Driki krama Bali makejang manyama. Dikalané tusing adung, tetep ngédéngang rasa hormat lan bakti tekén Déwa Bayu lan Déwa Baruna. Bayu pramana, ngamolihang angkihan anggén ngajalanin idup lan pangidupan. 

Nyepi segara puniki sampun kalestariang uli makudang-kudang warsa sané sampun lintang. Sinalih tunggil “kearifan lokal” sané lestari lan tekek ngamel pasawitran nelayan ring Klungkung. 


Ni Nyoman Ayu Suciartini
Ayusha utawi Ni Nyoman Ayu Suciartini meneng ring Jalan Sedap Malam Dénpasar. Nyurat makudang-kudang kakawian minakadi ésay, puisi, cerpén, lan novél nganggé bahasa Indonésia wiadin basa Bali. Novélnyané sané sampun terbit inggih punika Mimpi Itu Gratis (BIP, 2016), Jejak Ingatan (2015), Bersinar di Timur Pulau Bali, miwah san Jejak Ingatan lianan. Email: uci_geg@yahoo.com.

No comments