Puisi-puisi Rambut Kristinta; Tresna Abias Pasih

Sumber Gagambaran: https://id.pinterest.com

Tresna Abias Pasih

 

Sang surya masunar galang

Nyunarin sakancan manah ring gumi

Masuryak kedis-kedis ring ambara

Nyaksiang pajalan sang guru ngalaksanayang kewajiban

 

Guru,

Tuturnyané alus miwah becik

Tresnannyané abias pasih tur sabar tan kadi-kadi

Nénten pamrih ring sajeroning sisya

Nénten lali ngicénin sakancan ilmu pengetahuan

 

Ampurayang sisya sané bengkung

Sané manying tur nénten mandiri

Sampunang metilar

Icénin galah, sisya-sisya jagi malajahang raga.

 

Singaraja, 2 Oktober 2020

 

 

Suaran Bulan

 

Tiang bulan

Nyunarin isin gumi

Masunar galang ring langité sepi

Mirib tanpa aji tiang mekenyem, nanging

Tetep makenyem, yadiastun gulem ngengkebin jagat sami.

 

Tiang bulan

Peteng dedet tiang dini

Menékin sakancan bukit sané ngejohin matan ai

Mirip tanpa aji tiang dini, ningehang sakancan enek tangkah

Rikala peteng, akéh jatma-jatma makamen di sunduk nuturang sakancan unduk.

 

Singaraja, 2 Oktober 2020

 

Rambut Kristinta
maduwé aran sujati Ni Wayan Kristina. Embas warsa 1991 ring Gianyar, mangkin makarya dados guru Bahasa Inggris sekolah pariwisata ring Singaraja. Seneng malajah nulis puisi anggén nyelimurang manah rikala enek tangkah.