Yén Kopi Aduk Jaen
Olih:
Ida Bagus Pawanasuta
 |
| Sumber Gagambaran; pixabay.com |
Tumbén semengan
ngedas lemah dégdég Pan Putu Aiti suba gelu-gelur. Ia nyeritin kurenanné ané
kondén bangun sawiréh dibi sanja ia megadang nyait lakar anggona kayang
rainané ané lakar teka. Kéwala tusing biasané ia kéto, yén dibi puan mara
bangun ia laut ke paon ngai kopi sawiréh ia dogén ané nawang campuran kopi
ané jaen. Dugasé nu truna ia taén magaé di restoran Eropa di Kuta. Ia mula
barista-tukang campur kopi dueg tur kaloktah ditu. Yén ada pelanggan ané
teka pasti nakonang Putu Aiti. Kéwala atiban ané suba liwat, ia pensiun
dadi barista laut mulih ngaé warung kopi di désané.
“Méméné, ada
nepukin sendok kopi?”
“Adi tumbén
bapané uyut ngalih séndok? Biasané ditu ja jang beli di lemari kacané di
samping dispénser ané baru ento.”
“Yén suba ada
dini, bli sing ja uyut. Nyén ngisidang séndoké, méméné? To séndok spésial. Yén
sing ada séndoké ento sing jaen kopiné, tawang.”
“Adi séndok bisa
ngaé kopi jaen? Kadén bli ngorahang campuran serbuk kopi, gula ajak yéh
panesé ané ngranaang rasan kopiné jaen. Jani adi bisa séndoké orahang bli
ngai kopiné jaen?”
“Béh, méméné
cara sing nawang dogén. Apin melah campurané yén sing ada séndok ané
ngaduk pasti sing jaen, méméné. Ngadukné sing dadi masé ngawag. Yén ngadukné
muter ka kiri, ngisep neket di bongkol layahé jaen kopiné. Yén ngadukné ka
kanan, ngambang di muncuk layahé jaené.”
“Dayanin suba.
Semengan suba nyrémpét. Tidong tua.”
“Ait. Nyrémpét?
Nyambatang tua. Men méméné mrasa suba tua apa sajan suba tua? Bli nak mara
mrasa tua, bli kondén tua ni. Tua dadi kéwala semangaté harus muda.”
“Kénkénang muda?
Bok suba uban, paningalan suba patpat, pipi suba mapipil, entud krapad-kreped.
Kadirasa menék ka sumanggén ngidih tulung ajak batarané. Apa ané muda,
bli?”
“Semangaté
méméné. Semangat idupé pang muda. Ah, tungkulan mejogjag semangat muda,
engsap kanti ajak séndoké. Séndok bliné dija, méméné?”
“Kadén suba
engsap ajak séndokné. Yén sing ada di lemari kacané, ditu mirib di raké,
dibi sanja tiang maan ngumbah prabot.”
“Kénkénang
engsap, méméné. Séndoké ento penting. Penting anggon bli ngaduk pang nyak
jaen raket rasan kopiné.”
Pan Aiti lantas
ngaé kopi dedemenanné. Laut ia negak di arep warungné sambilanga
ngali-alihin berita onliné di tab-né. Sawiréh dibi peteng ia maan mabalih
berita di televisi ané nungkak tusing pragat pabaliha krana listriké
mati. Di désa nak mula kéto, listrik mati kapah-kapah. Yén sing listrik,
yéhé nyat. Aget kondén taén sibarengan, listrik mati ajak yéhé nyat.
“Nah... ni mara
berita. Kadén ja séndok dogén ané melah anggon ngaduk kopi apang jaen, ni
ada jlema tukang aduk. Kéné pelihanga, kéto pelihanga,” grenggeng ia sambilanga
nginem kopi.
“Nyén to
ngaduk-aduk, bapané?” Kurenané matakon.
“Nyén adén?”
sautné cara ngéwérin.
“Dong da
macanda, bapané. Nak seken tiang matakon ni!” Kurenané nyekenang.
“Ni, banjarané
di banjar tengah. Keliané sing baanga beneh. Suba gaénanga jalan apang
lancaran ka kota ngaba hasil carik lan tegal, orahanga mengutamakan infrastruktur.”
“Apa to
infrastruktur, bapané? Da naké basané wayah-wayah. Tiang singja ngerti. Lacuran
tiang sing tamat SD.”
“Infrastruktur
ento cara jalan, jembatan, dermaga, méméné.”
“Oh ento. Men
kliané sing nglawan, bli?”
“Kliané nak
polos sajaan, jemet, sing demen pati mesuang munyi kéwala yén magaé da
suba papasa.”
“Men, sing ada
nak mélanin, bli?”
“Ané mélanin
dong ada, méméné. Kéwala ané demen ngaduk-aduk masé ada. Kadén méméné suba
nawang, banjar tengahé liu témpékané. Yadian abedik ané demen ngaduk-aduk,
kéwala sesai ngenah di tiviné ajak di korané ngranayang madukan masé baana
désané.”
“Celebingkah
batan biu, bli. Nak gumi linggah ajak liu.”
“Mulaké saja
kéto méméné. Yé, adi sing matimpal kopiné, méméné?
“Telah jajané,
bli. Antosang malu, lakar beliang tiang jaja bali di warung dajané.”
Sambilanga
ngantosang timpal kopi, ia nglantur maca berita online. Guminé suba sayan
tengai. Kanti makiré telah kopiné, kurenané tusing masé teka ngabaang
jaja. Uli tuni kurenané ngorahang ke warung meli jaja, nganti suba makiré
telah kopiné ia kondén teka.
“Buin tukang
aduké ni ngenah di beritané. Apa ya buin ané prakaraina,” ngrimik sambilanga
nginem kopiné ané nu tanekané dogen. “Kanti telah kopiné, jajané tusing
masé teka.”
Buin kejepné,
kurenané teka ngaba jaja bali. Laklak a bungkus, lempog a bungkus, jaja
kukus duang bungkus, muah ongol-ongol sagu abungkus.
“Ané demenin bli
maan meli, méméné?”
“Sing maan bli.
Suba telah. Telat tiang ka warung.”
“Béh, dong sing
maan meli giling-giling batun salak magulaganting, méméné? Ni suba ngetél
paes beliné ngantosang.”
“Nah, kanggoang
taenang, bli. Bin mani kal pasemengin ke warung.”
“Dadi ja
taenang. Nak jani dot kén giling-giling batun salak. Patuh ajak hashtag
ganti klian. Nak jani ya dot nganti klian, uli kénkén ja baana pang
jeg maganti kliané. Yadian ngaduk-aduk bedik.”
“Maan dogén bli
nyrémpét.”
“Sing ja
nyrémpét, méméné. Ni kenyataan.”
“Ah, bli sing
mula kéto. Pang maan dogén.”
Adung pesan ia
ajaka dadua saling timpalin mareraosan. Buin kejepné teka timpalné Pan
Putu Aiti ka warung. Kondén Pan Aiti maan matakon, ia suba nyroscos
mamunyi.
“Bli Paya. Adi
jeg ngrépéd cara danyuh semengan. Nak kénkén ni?”
“Bli sing habis
pikir. Yén monto luwungné klian banjar tengahé, jeg uyaka ia tekén tukang
aduké. Ada né nagih nyuudang klian di tengah jalan. Ada ngaé hashtag
#buinmanigantiklian.”
“Ah. Nak ajak
liu, Bli. Sing makejang patuh paminehné.”
“Suba ja ajak
liu. Kéwala bes nyajaang. Nyacad tan pabukti. Jeg ngulah pesu munyiné cara
sampi luh. Yén bliké uli bajar tengah, jeg kel alih to seka ukud ané demen
ngai uyut.”
“Eda kéto bli.
To main hakim sendiri adané. Hukum ané melihang bli.”
“Jeg grimutan
bli nepukin unduk buka kéto. Adung pesan masé Pan Putu Aiti ngajak Pan
Madé Paya mareraosan. Méh ada tengah jam ia suba ngorta saling timpalin,
mara Mén Putu Aiti ngabaang Pan Madé Paya kopi.
“Kadén engsap
Mén Putu ngaénang kopi. Suba kanti ilang meledé kén kopi mara abanga
kopi.”
“Sing ja engsap
bli. Tiang nu nganti gas mara. Jeg nyak mara kletékang lakar ngrodokang
yéh, sing nyak idup komporé. Gasné telah.”
“Kayang kompor
bénjul masé kén bli.” saut Pan Madé Paya
“Tusingja
komporé dogen bli, séndoké masé ménjulin bli.”
“Adi kéto, Mén
Putu?”
“Disubané yéhé
panes, tiang paling ngalih sendok kopi.”
“Nak uli semengan
tiang dini nguyutang séndok, Bli Madé.” Pan Putu nimpalin mesaut
sambilanga iteh maca berita online di tab-né.
“Sajaan Bli
Madé. Uli tuni tiang ngrebutin séndok. To somah tiangé ngorahang sendoké koné
ané ngai kopiné jaen.” Mén Putu buin nyekenang.
Buin ia ajaka
dadua nguyutang séndok ané suba dadi bantang raos uli semengan. Yén tusing
ada Pan Madé Paya ditu, méh buin ia ajaka dadua uyut nguyutang
séndok.
“Men yén cara
Bli Madé, apa ané ngranaang kopiné jaen, sing séndoké ané ngajakang liket jaen
kopiné?” patakon Pan Putu Aiti nyesedang. “Cara tiang, yén sing ada séndok
ané anggon ngaduk kopiné, kénkénang ja melah jaen rasan kopiné?”
“Yén ento setuju
bli. Kéwala jani liu anaké ané demen ngaduk-aduk. Ada masé ané blog polos
nyak anggona body guard tundéna ngaduk-aduk. Yén kopiné aduk baan séndok
nyak melah jaen rasan kopiné. Sakéwala yén guminé aduk, nyak uyut
mebayayuhan.”
Klungkung, 21/12/2019
Ida Bagus Pawanasutaembas ring Gianyar warsa 1966. Rariptan ida minakadi puisi, gancaran, artikel, miwah novelét. Kakawian ida sampun kaunggahang ring Majalah Buratwangi, Canang Sari, lan Koran Bali Post. Ida ngawiwilin embasnyané Sanggar Tutur warsa 1999 miwah Komunitas Sastra Lentéra warsa 2008 ring Klungkung. Sasuratan idané sané sampun kamedalang sekadi Pangasih Paméro (2005), Antologi Bersama Naskah Monolog (2008), Antologi Bersama Puisi Klungkung: Tanah Tua Tanah Cinta (2016), Antologi Bersama Puisi Saron (2019), miwah Tresna Tuara Teked (2019). Ring warsa 2020 puniki, ida taler polih penghargaan Hadiah Sastera Rancagé warsa 2020 saking Yayasan Kebudayaan Rancagé Bandung antuk novelét Tresna Tuara Teked. Punika taler, pupulan puisi dané dados jayanti Gerip Maurip warsa 2019 sané kalaksanayang olih Pustaka Ékspresi.
No comments