Puisi-puisi Ni Wayan Adnyani; Giri Tohlangkir
 |
| Sumber Gagambaran: pinterest.com |
Kocap matangi
Ngiring mamargi
Kocap mesawang kala
Raris angkara
Rasa atma mamanda
Ulian ketug tan uning rupa
Sarag-sorog makta raga
Ngupapira mangda prasida mayasa
Malih pidan Ida tedun
Sampunang pisan ngeruruh pangiring
Mamargi raris mamargi
Sampunang lali manyurat pertiwi
#Séptémber 2017
Sugra
Ampura Ratu,
manahé sayan ngandang, tindakané
setata ngambang
minab sang Suratma sampun
ngerambang
Pakulun Ratu,
Solahé sampun mangmung, lakuné
setata suwung,
Kabawos sampun jatma bingung
Icénin tityang pamargi luwung
Sugra Ratu,
Ragan tityangé mawali, mapinunas
mangda matangi,
Nagingin manah suci
Gumanti tityang jagi ngaturang
bakti,
Nunas sugra ring Ida Bhatara Sakti
Titiyang ngaruruh santi
#Maret 2019
Satya
Napi mawasta satya
Yéning manahé kantun malila cita
Akéh pamarginé dados pilihin
Nanging asiki né patut marginin
Wénten carita ngundukang satya
Nanging dados gatra amatra
Becikang ngemanahain
Raris selehin
Satyané boya ja setata satua
#Désémber 2018
Timpal
Yén sampun manahé ngambang
I timpal makuikin uyang
Ajak matatimbang kanti matané
galang
Yén sampun legané matangi
I timpal maajak sesai
Uli ngelidin matan ai kanti
ngalihin ajumput sari
Yén jro mawasta timpal
Sanpunang gelis budal
Patuéling tityang nyabaran
pinanggal
Ritatkala manah tyangé nganjal
#Januari 2019, katur ring DP
Giri
Tohlangkir
Minab ring kalér Ida mayoga
Tan dados cingakin apisan
Sayongné masaput putih ring kangin
ring kauh
Madaging toya ngambang acanting
ganting
Bhatara, dados ké tityang mapamit
abosbos
Nyingakin Sang Girisaking selat
margi, selat manah
Mapinunas mangda abuné madegdeg,
gniné mawali, jerihé moksah
Cingakin tityang ring kalér malih
apisan
Ida mayoga, tileh masayong
#Novémber 2017
guru Fisika ring SMAN 1 Bebandem ngawit warsa 2003. Seneng ring sastra lan ngawitin nyurat puisi rikala SMP, alumnus Pasca Sarjana Undiksha Singaraja. Naanin sué vakum nénten ngawedar kakawiannyané, tur mangkin dados pembina nyastra ring acara PKB, Utsawa miwah Porseni.
.jpeg)
No comments