Gitanjali (15)

Olih: Rabindranath Tagore

Sumber Gagambaran; id.pinterest.com

/57/ 

Suar, suar titiangé, suaré sané ngebekin jagat, suar sané ngulanin mata, suar sané nyayubin manah! 

Béh, suaré pumka mesolah, Ratu, ring sarin urip titiangé; suaré punika ngasab, Ratu, talin rebab tresnan titiangé; ambarané mampakan, sayongé mekuus, icané nyelihsih ring jagaté. 

Kekupuné ngebatang kampid ipuné ring segara suaré. Tunjung miwah menuhé nenegeh ring muncuk ombakan suaré. 

Sambeh ring gulemé, Ratu, suaré sané sekadi emas benyah kalih sesocan sané ngulangunin. 

Bungahé tedun ring daun-daun taruné, Ratu, taler lédangé sané nénten metanggu. Tukad ambarané ngembadang pemunduk ipuné raris gentuh lédangé meliah. 

/58/ 

Sané mangkin tetabuhané sané bingar awor ring sarin kidung titiangé sané pinih ungkur bingaré sané ngawinang tanahé nénten medeepan entikin padang sané samah pisan, bingaré sané ngawinang semeton kembaré, murip miwah pademé, milehan mesolah ring jagaté sané jimbar, bingaré sané ngauk nelasang tutug gentuh, ngocokang tur nundunin sekancan sané murip antuk kedék, bingaré sané kantun negak mepangenan ngetélang toyan mata ring tunjung bang sedihé sané kembang, miwah bingaré sané ngulesang sarwa praniné mekasami sané sampun kaput buk, durung polih mebebaosan. 

/59/ 

Inggih, uning titiang, puniki wantah sih I Ratuné, inggih Ratu daging manah titiangé sunar kencanané sané mesolah ring daun taruné, gulemé sané mélan-élanan nyelihsih ring ambarané, sayongé sané mekesir mekecagan sayub ring gidat titiangé. Terang semengé meliah ring matan titiangé puniki sampun gatran I Ratuné ring manah titiangé. I Ratu meseeban saking luhur, I Ratu nyuryanin matan titiangé, raris manah titiangé ngembanin cokor I Ratuné. 

/60/ 

Ring pesisi, jagaté nénten metanggu, rauh sampun mecepuk alit-alité. Ambarané nénten metanggu, jegjeg kekeh, raris toyané sané nénten guan megenah, ngangsan gemulak. 

Ring pesisi, jagaté nénten metanggu, rauh sampun mecepuk alit-alité, ipun ngigel tur mesuryak. Ipun mekarya kubu-kubuan antuk bias miwah mepelalian keréng puyung. Ipun mekarya jukung antuk daun taru sané tuh, raris sambilang ipun kedék, kanyudang ring toyané sané dalem, sané nénten kemanah antuk dalem ipuné. Alit-alité melegéndahang pelalian ipuné ring pesisi. Ipun nénten midep ngelangi, ipun nénten mampuh mulang pencar. Juru silem mirahé nyilem ngerereh keréng, tendakané negakin jukung ipuné, sekéwanten alit-alité munduhang batu raris kutang ipun. Ipun nénten ngeruruh brana tetamian, ipun nénten midep mulang pencar. 

Segarané medungkunan sambilang ipun kedék, kecud ngelélam kenyem pesisiné. Ombaké makta baya padem, ngaturang sarin kidung sané nénten kerenga antuk alit-alité, mesaih sekadi istri-istriné sané nganyun-anyunang anyunan anak alit ipuné. Segarané megerudugan sareng alit-alité, raris kecud-ngelélam kenyung pesisiné. 

Ring pesisi, jagaté nénten metanggu, rauh sampun mecepuk alit-alité. Gentuhé nyelebseb ring ambarané, jukungé kelem ring toyané sané nénten mekecagan tampak. Baya pademé memargi milehan, raris alit-alité mepelalian.

Ring pesisi, jagaté nénten metanggu, i rika sampun alit-alité mecepuk. (masambung...)

Catetan: Kabasabaliang olih Komang Berata lan kawedar antuk Sanggar Buratwangi warsa 2002