Bobot Kasujatian

Olih: Ida Bagus Gdé Parwita

Sumber Gagambaran; https://id.pinterest.com

Kasujatian mawit saking kruna “sujati” sané taler mateges murni utawi seken. Kruna murni maartos tan wénten  sané ngadukin utawi nyarengin, tur seken mateges nénten guyu-guyu. Dados kasukseman sujati punika wantah murni, tur seken tan wénten  manah lian sané ngadukin. Yan ruruh ring sang kantun maurip, kasujatian punika élah yan bawosang, sakéwanten sukil prasida kamargiang, duaning tan wénten kahuripan tan pamerih, mawinan kabawos ngaruruh pangupa jiwa.

Pradé wénten sang lanang istri mawosang tresna sujati, kudang masa minab kasujatian punika lulus saking panuréksan kahuripan, bilih-bilih sang kantun maurip kabawos sida ngamargiang pangabdian sujati, tan pamerih angan akidik saking pabuat kahuripan. Puniki dahat méweh ring jagaté sané abot antuk tuntutan lan tantangan, minab  nungkalik panadosné parajanané tan ngega anak séos sané mawosang ngamargiang pangabdian sujati.

Kasujatian punika wiakti marupa kajujuran, minab wantah kaonengan sang nelebang daging kadiatmikan, miwah kasuniatan. Pangabdian sujati wantah kauningin saking kajujuran ngaraga, boya saking panuréksan anak séos, yadiastun tan sida kalidang wantah anak séos sané nyingak, mireng, tur nuréksa asing-asing sané kamargiang. Anak séos taler sané mawosang patut lan tan patut sahananing babawos, lan parilaksana sané kamargiang. Duaning sané kabawos patut, prasida katerima sareng sami, boyaja néwék,  utawi sekaan lan sorohé kéwanten.

Sané kapatutang pinih riin, nénten ja pramangkin prasida katerima olih anak séos. Kapatutan anak asiki kasaring dados kapatutan seka, kapatutan seka pradé sida katerima, kaanggé pinaka kapatutan désa, raris kaanggé kapatutan  wawidangan jagat, pinaka dresta sané kamargiang  maka uger-uger.

Kasujatian punika ngebek ring genah lan galah. Asing-asing sané sujati tan sida katulak olih sapasira ugi ring jagaté, mahawinan anaké mawosang: “Ngaruruh kanti ri sedek kasukan élah, nanging ngaruruh kanti ri sedek kaméwehan sukil” duaning  dahat arang  sang  sida tur lédang mapitulung ring sang sedek nandang pakéwuh, janten anaké kadi puniki kabawos kanti sujati.

Yan ring Pawayangan, sané sarat ngemban sastra pinaka sasuluh, i manusa maduwé kawenangan mikayunin pidabdab lan parilaksanan sang masolah, duaning sujatinnyané wayang punika marupa lawat pidabdab i manusa, lawat kawéntenan, sané patut kapikayunin pinaka tatuwek kahuripan. Éling tan éling iraga sampun nuwut pidabdab sang masolah, maka cihna solah sané kaincepang ring kahuripan.

Sangkaning sasolahan wayang taler kacihnayang bobot kasujatian i manusa, sané macihna metu agengnyané iloba angkara, kapetengan, bingung ngawinang yuda tan sida kakelidin. Yan ring Bharata Yuda, Ida Bagawan Bhisma ngutsahayang mangdené nénten dados awanan kasédan sang Abimanyu, sakéwanten ri sedekan yuda akéhan sang ksatria mabuat dados awanan kasédan sang ksatria séosan, yadiastun sangkaning pangindrajala. Sakéwanten yan ruruh daging Niti Sastra, kabawos anak istri maka jalaran yuda: “Rikala Kreta Yuga Déwi Rénuka pinaka awanan wénten Yuda, ring Tréta Yuga Déwi Sita maka awanan Sri Rama mayuda lawan sang Rawana, Rikala Dwapara Yuga Déwi Drupadi maka awanan yuda, tur rikala Kali Yuga asing-asing anak istri mabuat dados awanan yuda sané ageng.”  Pabuat seloka punika janten nénten ja ngiwangang anak isteri, napi malih sané pinaka niyasa utawi lambang punika wantah istri utama. Maka sami sang inucap sida nyihnayang kautamannyané yadiastun sedek kaméwehan keni pangindrajala olih anak séos. Déwi Sita prasida ngajegang kasuciannyané yadiastun doh saking Sang Ramadéwa, suamin ida. Déwi Drupadi pinaka lambang sané sida nyikiang kautaman sané lalima sané kaniasayang pinaka Panca Pandawa, kapanditaan, kakukuhan, kamenangan, kapekikan, lan kawicaksanaan. Sangkaning kautaman punika ngawinang sang sapasira ugi kadaut manahnyané lascarya ngetohang jagat, tur déwéknyané sangkaning mapakardi ring tresna asih.

Ring kawéntenan jagat sekadi mangkin, arta brana pinaka ciri kautaman kahuripan. Sané kabawos sujati rinasa sekadi babawos tan wénten, kasujatian wantah metu saking ucapan anak sungkan kateteh antuk kaabotan arta brana, kakuasaan, maka miwah kaméwehan séosan. Kasujatian punika wantah anggé ubad bengong  antuk tan sida nahan kaméwehané. Yan pradé puniki marupa pikayun para manggalané ring jagaté, janten sumeken sampun tan wénten kayunnyané pacang rungu ring anak téos, parajana sané setata kateteh kaméwehan. Mabinayan ring sané riin duk sedek ngutsahayang mangdené polih ring tatujon. Sakadi main catur asing-asing alitan dados anggén pinaka panebus kamolihan.

Rerednyané kasujatian punika ngawinang metu pikenoh i manusa narka kahuripané. Yan riin kawicaksanaan, kasucian, kakasatriaan, bawos sané nyunyur manis, kaajap-ajap olih ida-danéné. Mangkin kakuasaan tur arta brana sané dados pangapti, sané kaender selamin uripé. Yadiastun maka imba, Sang Yudistira sangkaning ajeg ngambel kasujatian kayun mawinan prasida nincap jagaté séosan rawuh angga sariran ida, tur sida macentok babawos ring para déwa indikan kadarman lan kautaman sané kabawos patut lan tan patut ring jagaté.

Ring jagat puniki, sangkaning i manusa tan sida maurip néwék, mawinan Ida Sang Hyang Kawi nagingin antuk i manusa séos pinaka sarana nyelehin kaajegan manahnyané. Kawéntenan anak séos puniki prasida ngawetuang tresna asih ring sasamen, taler midep ngawetuang ripu ring déwéknyané bangun. Punika sami kasukserah ring sang maurip, duaning punika daging kasujatiannyane soang-soang.

Ida Bagus Gdé Parwita
émbas ring désa Tihingan, Klungkung, tanggal 19 Nopémber 1960. Képala Sékolah ring SMA Pariwisata – PGRI Dawan, Klungkung. Ngawit nyurat sasuratan budaya kawédar ring Nusa Tenggara warsa 1983, Mingguan Prima, Bali Post, Majalah Burat Wangi, Canang Sari, Bali Orti, lan Majalah Online Suara Saking Bali. Ngamolihang Juara 1 ésai berbahasa Bali warsa 2001, kawénténang olih Balai Bahasa Bali, Juara 1 pénulisan témbang Puputan Klungkung warsa 2002.