Kakawin Purwaning Gunung Agung: Pangéling-éling Yasa Kérthin Kawi-Wiku Ida Padanda Madé Sidemen

Olih: Putu Éka Guna Yasa
Gagambaran Paul Husner, Sumber; http://www.artnet.com

Tuuhé tan dados tawah. Endag tur surup suryané tan wénten sané prasida mialangin. Wantah paica marupa yusané anggén galah mayasa. Ngyasaang urip malarapan antuk nandurin karang awak mangda prasida anggén jatu laksana ring désa-pradésa. Sadanané punika raris anggén ngeséhin yoni pinaka sangu palekadané saking bhuta-pisaca-raksasa nuju déwa paraga
[kasuksmayang saking Geguritan Salampah Laku, kakawian Ida Padanda Madé Sidemen]


I
Purwaka

Nepék ring rahina Soma, tanggal 10 Séptémber warsa 1984, kawi-wiku Ida Padanda Madé Sidemen nugtugang samayan Idané amor ring Sang Hyang Sangkan Paran. IBG Agastia [2007: 1] sané polih maseseleh sadurung Ida lebar maosang Ida Padanda sané kasengguh wreddha pandita inucap sampun nyiagayang makudang-kudang sarana upacara pitra yadnyan Idané ngraga. Lianan ring sarana upacara, Ida Padanda taler sampun nyudi brahmana sané pacang muput upacaran Idané. Utsahané nyiagayang makudang-kudang sarana pitra yadnya punika nyihnayang Ida uning pangatag Sang Hyang Kala sané pacang mendak Ida ngungsi ka genahé sunya.    
Yukti, pinceran Kalané tan wénten sané prasida nawengin. Yéning wilangin saking warsan idané lepas, Ida Padanda Madé Sidemen sampun nilar jagat mayané puniki 35 warsa. Yadiastun kadi asapunika, yasa kértin Idané pinaka pandita sané nénten surud-surud maprawreti ngaloka pala sraya tan obah ring pikayunan para janané. Wargi saking Pedungan sané naenin paicain ida ajah-ajah indik tata cara nibakang padéwasan kantun ngamanggehang sakancan sarining tutur idané kantos mangkin. Asapunika taler, upacara Ngabén Mitra Yadnya sané kaloktah kidik nelasang prabéya sakéwanten ageng pikenohnyané kari kalaksanayang olih wargi ring wawidangan jagat Tegal Tamu, Batu Bulan, Gianyar.  Lianan ring punika, sikut-sukat sané naenin picayang ida kasarengin antuk I Tekek ring wawidangan jagat Poh Manis kantun karajegang olih warginé i rika.
Ring baga walatanda, kria rupa sané karyanin Ida sadawegé nyeneng kantun akéh sane kaanggén sungsungan olih para janané. Indiké puniki satmaka cihna, lakar kayu sané kaanggén yukti-yukti kaselehin tur akas. Makudang-kudang tapel rangda miwah rarung sané kari kasungsung inucap wénten ring wawidangan jagat Panjer, Seminyak, Legian, Lantang Bejuh, Batan Kendal, Ceramcam-Kesiman, Intaran-Sanur, Tohpati, Kaba-Kaba, Poh Manis, miwah sané lianan. Tios ring tapel rangda, Ida taler ngaryanin prarai barong landung sané wénten ring wawidangan jagat Lantang Bejuh, Keren-Kesiman, Pagambangan-Batubulan. Tapel wayang wong marupa Kumbakarna, Méganada, miwah Hanoman taler picayang Ida ring wargi Delod Peken-Bualu, Nusa Dua. Togog-togog marupa Kala-Nukala, Singa, miwah Wang Cina, kari becik kawéntenannyané ring wawidangan jagat Penopengan-Sanur.
Nénten wantah ring baga walatanda, Ida Padanda Madé Sidemen taler kajanaloka ngawi makudang-kudang kria sastra sakadi Kidung Tantri Pisacarana, Kidung Rangsang Pelog, Kakawin Cayadijaya, Kakawin Candra Bhairawa, Kakawin Singhalanggyala, Kakawin Kalpa Sanghara, Geguritan Salampah Laku, miwah milpilang Purwagama Sasana.  Akéh susastra kakawian idané punika sampun kaselehin olih sujana Baliné tatkala ngruruh gelar kesarjanaan. Kidung Tantri Pisacarana sampun kaanggén disertasi olih I Nyoman Suarka [warsa 2007], Kakawin Singhalanggyala sampun kaanggén tésis olih I Komang Paramarta [warsa 1994], miwah IBG Agastia sampun nyurat saseleh ngeninin indik kria sastran Idané ring buku Ida Padanda Madé Sidemen Pengarang Besar Bali Abad 20 [warsa 1994]; Pertemuan Ida Padanda Mades Sidemen dan Cokorda Mantuk ring Rana [warsa 2012]; taler IBP Suamba nyurat buku Biografi Ida Padanda Madé Sidemen [warsa 2017]. 
Lianan ring makudang-kudang kakawiané ring ajeng, silih tunggil kria sastra reriptan Ida Padanda Madé Sidemen sané durung pisan naenin kaselehin inggih punika Kakawin Purwaning Gunung Agung. Salinan kakawiné puniki wénten ring Pusat Kajian Lontar, Fakultas Ilmu Budaya, Universitas Udayana pamekas antuk nomor krop 8 tur nomor lontar 1. Panjang lontar sané kaanggen nyurat wantah 49,5 x 3,5 cm antuk katah 33 lempir. Sang sané nedun kakawiané puniki ngamanggehang parab Sang Brahmaṇa Kadi Paksi Huru Huru. Ida mawit saking Gria Tegeh Bindu Kasiman saha muputang sasuratan kakawiané puniki ring rahina Radité, Pon, Dukut, warsa 1964 Masehi. Ida sang sané nyurat kakawiané puniki nénten ngamanggehang wit utawi babon lontar sané katedun, pateh sakadi lontar tiosan sané wénten ring Pusat Kajian Lontar Universitas Udayana.


II
Si Panggulu Si Tan Pakarsa

Mangdané prasida mastikayang Kakawin Purwaning Gunung Agung pinaka silih tunggil rariptan Ida Padanda Made Sidemen, ngiring turéksain kawéntenan baga panguntat kria sastrané puniki:

Krĕteṅ surati leṅāmārggani gajah rusa [rupa?] kakiku kaāmpunang katha,
purna kasurat ring bolong marginé sangkaning gajah rusa [rupa?], dumugi ida danén titiang ngampurayang caritannyané,

ĩkiṅ kawi si wahwa wanwani karas tamanira ng ari tan wruhing wkas,
[duaning] pangawi puniki wantah wawu matetegar makta karas, nénten naenin mararian, santukan tan uning ring kasuksman panguntat,

si paṅgulu si tan pakārṣa paṅaranya akukuwu kidul nikaṅ pkĕn,
Si Panggulu Si Tanpakarsa parabnyané magria ring sisi kelod pasar,

ri wimba nagare ṅaranya kahanan mami lngĕ lngĕ mangdaning kawi.
ring wawidangan jagat Wimba wastan kawéntenan titiangé, satata kalangen sané ngawinang mamanah dados pangawi.

Punggelan panguntat Kakawin Purwaning Gunung Agung ring ajeng jenar ngamanggehang kawéntenan sang kawi sané maparab Si Panggulu Si Tan Pakarsa. Yéning rereh suksmannyané, kruna panggulu maartos putra kaping kalih sané ketah kabaos Madé, Nengah, utawi Kadék ring Bali. Kruna Si Tan Pakarsa maderbé kasuksman sané pateh ring kruna Sing Demen utawi yéning cendekang dados Sidemen. Dadosnyané, pangawi kakawin puniki nénten lian ring Ida Padanda Madé Sidemen. Indiké punika prasida kapastikayang santukan Ida taler nganggén parab masaih ring kakawian sané lianan sakadi Tan Maha, Tan Arsa, Hina Arsa, Taman Sukeng Hati, miwah Tan Tusta. Makasami pupulan krunané punika mateges Sing Demen utawi Sidemen [Agastia, 2007: 77].
Parab Si Panggulu Si Tan Pakarsa inucap kajangkepin raris wit Sang Kawi sané magenah ring Delod Peken utawi Delod Pasar wawidangan jagat Wimba utawi Intaran. Ring kakawian sané tiosan, Ida Padanda Madé Sidemen taler nganggén kruna daksinékana pasara miwah kidul i pasar sané mateges Delod Pasar ring basa Bali. Kawéntenan wit Idané puniki mastikayang pangawi Kakawin Purwaning Gunung Agung wantah Ida Padanda Madé Sidemen. Kahanan Kakawin Purwaning Gunung Agung puniki prasida ngwewehin malih siki rariptan kakawian olih Ida Padanda Made Sidemen marupa kakawin sané sadurungnyané katarka wantah lalima inggih punika Kakawin Cayadijaya, Kakawin Candra Bhairawa, Kakawin Singhalangghyala, Kakawin Panglepasan, miwah Kakawin Kalpa Sanghara.
Makasami kakawin inucap prasida kapastikayang warsa duk Ida Padanda Madé Sidemen puput ngawi. Kakawin Cayadijaya puput kasurat warsa 1941, Kakawin Candra Bhairawa warsa 1941, Kakawin Singhalanggyala warsa 1943, Kakawin Kalpa Sanghara warsa 1944. Raris tahun kuda Kakawin Purwaning Gunung Agung puniki puput kasurat? Durung prasida kajantenang. Sakéwanten, yening alon-alonin turéksain saking baga panguntat kakawiné ring ajeng, i rika wénten lengkara krĕteṅ surati leṅāmārggani gajah rusa [rupa?] kakiku kaāmpunang katha. Tiosan ring maartos utsahan Sang Kawi nunas pangampura nganinin indik daging carita, lengkara inucap taler prasida katarka madaging sipta candra sangkala. Pupulan kruna kreteng surati mateges purna kasurat. Sapunika taler kruna leṅ tiosan ring mateges bolong utawi song, sajroning candra sangkala maderbé pawilangan 9; kruna marga maderbé pawilangan 4; kruna gajah maderbé pawilangan 8, tur kruna rusa [rupa] maderbé wilangan 1. Yéning patut kruna rusa punika iwang nyurat, tur sané kapikayunin sujatinnyane rupa, pawilangan tahun puput kasurat Kakawin Purwaning Gunung Agung puniki wantah ring tahun 1849 Saka utawi 1927 Maséhi.
Yéning panarkane punika patut, kakawin puniki kasurat sadurung kakawin lianan. Duk punika Ida Padanda Madé Sidemen wawu mayusa 69 warsa, santukan Ida kocap embas ring rahina Anggara Wagé Dungulan warsa 1858. Napiké indike punika sané ngawinang Ida Padanda Madé Sidemen maosang ida Si wahwa wanwani karas utawi wawu matetegar ngaripta kakawian sajroning karas? Taler durung janten. Santukan lengkara sakadi inucap ketah kaanggén olih para kawiné ngasorang angga. Lianan ring punika, Sang Kawi taler sering nartayang anggan idané durung asihing kalangwan, kasyasih, lintang dusun, wong kasési, tan ulihni sang kawi [tan pakaryan sang kawi], miwah sané lianan. Sangkaning ngandapang angga kadi punika, i raga prasida mastikayang sang kawi uning ring uger-uger sajroning nyurat kakawin. Ring pangawi sané ngangken kakawiannyané becik, i raga patut sumandeya ring bobot daging kakawinnyané. 


III
Yoga Sastra ring Candi Bhāṣa:
Ngarcana Ida Hyang Siwa-Buddha
           
Pinaka pamahbah sajroning Kakawin Purwaning Gunung Agung, Ida Padanda Madé Sidemen ngelarang yoga sastra ngarcana linggih Ida Sang Hyang Siwa Buddha. Pamarginé punika wantah pinaka silih tunggil sadanan sang kawi ngradana Ida Sang Hyang Siwa Buddha mangdane ledang tedun malinggastana ring candi basa sané sampun kaadegang.

Candrāditya mahātmane pranathaniṅ bhakti swapākşādika,
Ring candra-aditya pinaka paramajiwa, sembah pangubaktin titiang pageh tan obah,
                       
yan riṅ brāhmaņa śewa sogata maran maṅgĕh paliṅgih nira,
 yéning ring brahmana, Siwa-Buddha kaadegang pinaka linggih Ida, 

kyātiṅ rāt catur aśrame kalinewih mwaṅ śāstra kawyañjana,
kasub ring jagaté sakadi ajah-ajah catur asramané sane kautamayang miwah sastra wianjana 

riṅ saptā swara wĕtwaning guru laghū lāwan swacanda prihĕn.
sajroning uger-uger sapta suara kawéntenan guru lagu tur swacanda sané patut utsahayang.   

Sapunika Ida Padanda Madé Sidemen ngalem ngaturang sembah ring ajeng Candra-Aditya pinaka niasa kawéntenan Ida Hyang Siwa Buddha. Panunggilan Siwa-Buddhané kabaosang antuk makudang-kudang imba olih Ida sakadi (1) yéning ring brahmana pasatmian punika pateh ring brahmana Siwa-Sogata; (2) yéning indik kakasuban ring jagaté tan lian ring ajah-ajah catur asrama sané kajangkepin antuk sastra kawyanjana; miwah (3) yéning ring sapta suara tunggal sakadi pamilijan guru-lagu miwah swacanda. Sané mabuat taler kaanggén pinaka bantang paguneman inggih punika tatkala Ida Padanda Made Sidemen ngimbayang paleburan Siwa-Buddha antuk swadharman ksatria wangsa miwah brahmana wangsa, kadi puniki:  

Tuṅgal pākşani saṅ kşinatriya tumut brāhmāṅśa tatwā ajĕng,
pateh amongan sang sané kamanggehang ksatria miwah brahmanané, yéning selehin saking unteng katattwannyané,

hyaṅ niṅ hyaṅ sira mūrtti saṅ rwa winuwus denyān sinaṅguh guru,
Ida Hyang Ning Hyang [Siwa-Buddha] sané mamurti ring sang kalih, raris kabaos pinaka guru,

ndyānung mangkana yan sirā wnang asung lāwan wnang wigrahan,
napi sané ngawinang sapunika? Santukan yéning Ida wenang ngicén tur wenang merangin,     

mangkā ṅ wiryyani saṅ rwa yan wruha ya ta n bhaghāṅ wimukeṅ prajā. 
kadi asapunika kawisésan sang kalih, yan sampun uning pastika pacang mangguhang kawibuhan ring jagaté.

Ring punggelan Kakawin Purwaning Gunung Agung punika Ida Padanda Madé Sidemen maosang yéning kawéntenan panunggalan Siwa-Buddhané pateh sakadi sang sané mawangsa ksatria miwah sang sané mawangsa brahmana. Sang mawangsa brahmana kabaos wenang asung [mapica] tur sang mawangsa ksatria wnang wigrahan [maperang]. Yéning sampun uning ring kawisésan sang kalih punika, pastika pacang mangguhang kawibuhan ring jagaté. 
Ucap kria sastrané punika anut ring panampén IGB Sugriwa [2002] ngeninin paleburan Siwa Buddhané ring Nusantara riin. IGB Sugirwa [2002: 45-46] maosang, yéning pét prade makasami para janané ring jagate yukti-yukti ngamanggehang Buddhapaksa, majanten nénten wenten perang, nénten wénten duratmaka, jagaté kerta raharja. Sakéwanten, para ksatriané abot pacang nganggén Buddhapaksa sajangkepnyané santukan nénten sami para janané pateh ngamanggehang Buddha Paksa. Punika mawinan, kawéntenan katreptian panegarané kirang becik, santukan tan wénten sané pacang maperang yéning wénten musuh sané nglurug. Tios ring kawéntenan Siwapaksa sané nadosang ngamargiang Panca Nreta miwah Dharma Yuddha [mamati-mati sajroning perang]. Siwapaksa nadosang para janané maperang tanding yéning sangkaning ngetohin kapatutan. Sangkaning indike punika raris Siwapaksa miwah Buddhapaksané katunggilang mangdané prasida ngruruh kasukertan miwah kawibuhan wahya dhiatmika [lahir-batin]. 
Sapunika Ida Padanda Madé Sidemen ngamargiang yoga sastra nunas kalédangan Ida Hyang Siwa Buddha mangda maparahyangan ring kakawian idané. Sujatinnyané nénten wantah ring Kakawin Purwaning Gunung Agung Ida ngadegang Ida Hyang Siwa-Buddha pinaka manggala ista déwata kalaning makakawian. Makudang-kudang kakawian Idané tiosan sakadi Singhalangghyala miwah Candra Bhairawa taler ngamanggehang Siwa-Buddha. Silih tunggilnyane ring kakawin Singhalangghyala Ida maosang Panghyang i ngwang i jöṅ Bhaṭāra Śiwa Budddha sira maka jiwaniṅ praja ‘sembah baktin titiang ring cokor Batara Siwa Buddha, ida pinaka jiwaning praja’.
Sembah bakti sané ayunulus punika sané kaaturang olih Ida Padanda Madé Sidemen mangdané asung Ida Hyang Siwa Buddha malingga ring candi basa sané sampun siagayang Ida. Ring pikayunan sang kawi, kakawian sané karipta antuk pupulan kruna masaih ring candi sané kawangun antuk pupulan batu. Yéning candi batu prasida kawangun sareng akeh, candi basa taler prasida karipta makembul [Kakawin Bharata Yuddha umpami karipta olih Mpu Sedah sareng Mpu Panuluh] yadiastun ketahnyané kawangun ngraga utawi sareng kalih. Yéning candi batu kawangun anut ring sukat-sikut palemahan, candi basa kawangun anut ring uger-uger pasang sastra, guru-lagu miwah wretta-matra.Yéning candi batu ri sampuné puput prasida kaanggén linggih Ida Batara, candi basa taler kaanggén nglinggastanayang ista déwatan Sang Kawi. Sasampun Ista Dewatané kalinggihang, kakawiané punika saksat paragayan sakala saking Ida Hyang Ista Dewata. Indiké punika sane ngawinang kakawian utawi sastra taler kabaos Sang Hyang Sastra [Sang Hyang Sastra makadipanikang tri bhuwana sumĕnö nikaṅ prabhaswara]. 
Pabinayan candi basa miwah candi batuné taler wénten. Candi batu ri sampuné puput tan prasida kabakta olih sang sané ngwangun, sakéwanten candi basa prasida kabakta ngider bhuwana olih sang sané ngawi sangkaning kasurat sajroning lontar. Pangawi sakadi Mpu Tanakung maosang kakawian Idané pacang kaanggén sangu [silunglung] ngruruh sarining kapatian. Pabinayannyane sané lianan, tepengané mangkin akéh para janané nyraya nunas sakancan paica ring candi-candi utawi ring pura-pura, sakéwanten arang sané nunas galang pikayunan maduluran antuk ajah-ajah sastra.


IV
PURWANING [SEJARAH] GUNUNG AGUNG

Sasampuné ngalem Ida Hyang Siwa-Buddha saha nunas pangampura buat katambetan Idané ngawi, Ida Padanda Madé Sidemen raris mahbahang indik kawéntenan purwaning Gunung Agungé. Kruna purwa ring basa Jawa Kuno mateges wit, riin, masané sané sampun lintang, kangin, miwah sané lianan. Tepengané puniki, pupulan kruna Purwaning Gunung Agung mateges pateh ring kawéntenan Gunung Agunge riin, utawi kawéntenan Gunung Agunge ring masané sané sampun lintang, utawi sejarah kawéntenan Gunung Agung.
Duke riin kocap ri sampuné Ida Batara Siwa puput ngelarang yoga, nadaksara medal anda bhuwana [jagat sané bunter sakadi taluh] saking tengah sagarané. Anda bhuwanané punika ngamijilang geni murub, makudus tur panes tan sipi. Kala punika kawéntenan jagaté sakadi magénjongan sangkaning angin nglinus tur linuhé ngider jagat. Ring akasa langité peteng dedet. Kadirasa bulan miwah bintangé sané sarahina nyunarin jagat ical téjannyane. Tios punika, ombak sapta sagarané nglancah tegeh, muntab, tur maliah rauhing pasisi.
Batu-batu alit tur ageng saking anda bhuwana punika leketik rauh ring langité tumuli runtuh ring pratiwiné. Wénten taler minyak sané mili tur ngentel ring tanahé. Sawatara tigang warsa kawéntenan jagaté sakadi katiben kali sanghara. Nehdehang raris, batu-batuné matumpuk. Endut geniné sane membah tur alon-alon nglekas matunggilan dados batu tur pulo-pulo sane kambang ring sagarané. Sakakidik langité galang maglandaran. Ring genahé sané doh prasida kapiarsaang wénten gereh masuara alon, sakadi suaran anak istri kasmaran. Hujané sane ngetel saking akasa sakadi pusungan rambut anaké istri sané kalukar. Barak ngatirah téjan suryané sané endag ring sisi kangin sakadi warnan paningalan ipuné tatkala wawu kapertama kairing masanggama ka pasirepané.
Yadiastun sampun marupa pulo-pulo, pretiwiné kantun ngamedalang andus. Geniné saking sapta patala taler kantun mletik ka ambara saksat pedau api [palwa agni] sané kambang ring sagarané. Pedaune waluya sakadi ayad-oyod kala kaampehang angin baret tur pacang surup ka dasar sagara. Indiké punika sami sangkaning nénten wenten gunung pinaka pancer sané prasida ngawinang pulo-pulo inucap enteg tur pageh [māwāng rāt maktĕr angan ri garigū norang titiņḍih wukir]. 
Uning ring kawentenané punika, Ida Sri Hara Nilakanta ngamargiang paruman ring Kailasa Parwata kairing oleh para Déwa, Resi, Gana, miwah Raksasané sami. Ring parumané punika, Ida nganikain mangda mupak/munggel puncak gunung Mahameruné kandugi raris prasida magehin nusa-nusané sané magenah ring sisi kelod jagat Bharata Warsane [ling sang hyang ya kinon palaywana rumañcana ri pucaki meru parwwata, donyan manggĕhi bhūmi bhārata kidul mapagĕh uwusa piņḍa manglayang]. Maduluran antuk pancer sané mawit saking pucak Mahameruné punika kahanan pulo-puloné prasida wusan manglayang ring tengah sagarané.
Polih titahé puniki watek Dewa, Resi, Gana, miwah Raksasané sami angayubagia kandugi raris mamargi nuju Gunung Mahameru. Maduluran antuk makudang-kudang sanjata, puncak Gunung Mahameruné prasida kapunggel. Sakéwanten sangkaning kalintang tegeh tur ageng, para dewatané sami tan prasida ngingsirang gunung punika. Makasami sasocan, mirah, rajata, miwah emas sané wénten i rika pinaka daging gunungé mabrarakan runtuh ka pratiwi saha ka sagarané. Duaning asapunika, digelis para déwatané matur ring anggan Ida Batara Siwa. Ida Batara Siwa raris nganikaang panangkan para Dewatané tan prasida munggel pucak Mahameruné sangkaning nénten wénten mudra miwah kuta mantra sané katur ring anggan Ida Hyang-Hyanging Ukir. Masangu antuk pawarah-warah Ida Hyang Nilakanta, para dewata miwah raksasané sida munggel puncak Gunung Mahameruné. Duk punika sami buron agungé maluaran. I Macan, I Singa, I Baruang, mengkeb ka genah-genahé sané madurgama tur sripit.
Yéning akudang rahina sampun lintang, para dewata saha raksasané prasida ngingsirang puncak Gunung Mahamerune magehin nusa-nusané anyar. Jangkep antuk anak-anak gunung saha jurang pangkung pinaka margin toyané mili saking gunung rauhing sagara. Gunung sané katahnyané pitu punika prasida nudut kayun sang sané ngatonang.
1. Pinih utama wénten gunung agung sané nyabran rahina ngamedalang andus nyujur akasa. Ring madian gunungé punika wénten margin pawaka utawi lahar sané mili ka tanahé. Marginé punika taler pinaka margin Ida Hyang Basuki sané marupa Raja Naga tatkala Ida mijil saking dasar sagarané. Punika mawinan gunung punika maparab Gunung Wasuki pinaka lingga mani ring jagate. [liṅga maņi man(ĕ)ṅahiṅ nabhastala]
2. Magenah ring dangin Gunung Agung punika wénten taler gunung majajar makembaran sané maparab Si Lampuyang [Gunung Lampuyang].
3. Magenah ring dauh Gunung Agungé punika wénten gunung sané maparab Si Bukit Abang. Ring sornyané wénten tirta mahotama mahamreta saking Batur pinaka Gunung Api  [Ri sornya hana tirtha mottama mahā mrĕta ri batur ikā gunuṅ apuy].
4. Magenah ri dauhan malih wénten gunung maparab Bharata sané kasandingin antuk Danu Bharata pinaka pacatuning jagat.
5. Malih ngauhang saking gunungé punika wénten gunung ageng pinaka puspaning jagat inggih punika Batukaru.
6. Ngelodang ring genahé punika wénten gunung asah sané magenah ring wawidangan jagat Pecatu. Gunungé punika taler kaparabin Gunung Pecatu. Kaparabin pacatu sangkaning tan wénten toya ring genahé punika, nyabran rahina satata nyaratang toya saking langit. Mawinan kabaos pacatu. [apan tan hana toya mukya ri lĕbaknya satata umadang sakeng langit,]
7. Ring sisi kangin, pamekas majajar ring sisi kaja kantos kelod wénten gunung sané kabaos Diwangga Parwata? Tur delod gunungé punika wénten anak gunung sané kabaos Gunung Andakasa.
Yadiastun sampun puput kadagingin pancer pulone punika antuk makudang-kudang gunung, Ida Batara Siwa tan ledang kayun idané nyuryanin kawéntenan gunungé sakadi pedau ocak ring tengahing sagara. Punika mawinan, Ida Batara Siwa malih munggel puncak gunung sané kabakta antuk kakalih tangan Idané. Puncak Gunung Wasukihé katumpukin malih ring sisi kelod miwah kauhnyané sané ngawinang kakantenang sakadi macarang. 
Ri sampuné kreta gunung-gununge ring Bali, Ida Batara Brahma miwah Wisnu raris ngréka jadma-manusa, satwa, naga, kremi, miwah sané lianan. Jadmané sané sampun karéka punika durung uning ring tata cara ngruruh pangan kinum tur pangupa jiwa. Indiké punika raris sané ngawinang Ida Batara Tri Murti tedun ka jagaté gumanti jagi ngajah-ajahin jadma manusané mabaos, ngaryanin pomahan, tur ngolah sawah. Salami awarsa Ida Batara Tri Murti ngurukang para janane tata cara namtamin kauripan.
Sasampun solas warsa, Ida Hyang Isa mawali ngutus Brahma Resi maparab Śrĩ Gārggha Atri sané pascat ring katattwaning jagat mangda tedun ka jagaté. Mungguing ajah-ajah idané ngeninin indik pangalikan yuga. Pangalikan yuga sané prasida ngawinang jagaté katibén pralaya patut karadana antuk upacara sakadi Eka Dasa Ludra. Ri sampuné mapica ajah-ajah indik upacara ngirtiang jagat, Ida Sri Garggha Atri mawali ka kahyangan Idané.
Sasampun jagaté kerta, Ida Batara Siwa mawali ngamargiang sad angga yoga. Sangkaning pageh yogan Idané, nénten kayun Ida Batara Siwa ngamargiang sanggama rahasya ring Ida Déwi parwati. Duk punika taler, para dewatané katiben aro-ara sangkaning wénten raksasa maparab Nila Rudraka sané pacang mencanéng jagat. Sané prasida ngasorang Nila Rudraka wantah putran Ida Batara Siwa. Duaning asapunika, Ida Batara Indra ngrincikang naya ngutus Ida Hyang Manmatha mangdané sida ngamedalang panah kalulut smara. Panah panca wisayané mandi. Nadaksara Ida Batara Siwa nulamé rabin Idane Déwi Parwati runtuh ring pabinan. Sakéwanten Ida éling ring kawéntenan Idané ngamargiang tapa brata. Indik lulut kasmaran ring kahyun Idané tan lian wantah sangkaning nayan Ida Hyang Smara. Punika mawinan Ida Hyang Smara raris kageseng antuk Ida Batara Siwa. Rabin Ida Hyang Smara sané tan lian wantah Dewi Ratih ngetutwuri salampah laku rabinné kageseng. Ri sampune sang kalih kageseng, Ida raris matunggilan smara maduluran antuk kayun Ida Batara Siwa kasarengin antuk Ida Batari Parwati *). Malarapan antuk putran Idane sané maparab Gana, sakancan aro-hara sané kamanggalain antuk Nila Rudraka prasida katepasin.
Kacritayang tatkala Ida Batara Siwa miwah Ida Batari Parwati ring paturuan, tan dumadé Ida Déwi Parwati mikayunan uning ring kaluihan jagat Baliné. Kancit duk punika Ida Batara Siwa miwah Déwi parwati masasanjan ring Nusa Bali. Kaasrian jagat Baliné ngawinang metu pikayunan lulut asmara Ida Bhatara Siwa miwah Ida Dewi Parwati. Tan karasa raris metu sukla swanitan Idané ring tengahing sagara. Patemoné puniki ngawinang embas raksasa Maya Bahni. Duaning Ida Batara Siwa miwah Bhatari Parwati ngamargiang sanggama rahasia ring genah miwah galah sané nénten patut, mawinan patemon sukla swanitané punika ngembasang raksasa.
Raksasa Maya Bahni puniki nadaksara sakti mandra guna tur misadya jagi ngrusak jagat. Para Déwata Nawa Sangha, Brahma, Wisnu, Indra, Baruna, miwah sané lian-lianan mautsaha maperang tanding ring raksasa Maya Bahni. Sakéwanten sangkaning raksasané puniki kalintang sakti, para dewatané sami tan prasida molih ring payuddhan. Uning ring kawéntenané sapunika, Ida Batara Siwa tedun tur ngruwat Sang Maya Bahni. Sang Maya Bahni kaangkenin pinaka putran Idane tur kaicen parab Hyang Kalamretyu. Hyang Kalamretyu taler kaicén waranugraha mangda ngungsi jagat Bali tur ngamargiang sarwa baksa, pamekas ring para jana sané nyalah masa. Umpami, para jana sané arip tur sirep ring sandya kala wenang katadah antuk Ida Sang Kala Mretyu. Lianan ring punika, para jana sané mamargi tengai tepet taler prasida katadah antuk Ida.
Polih waranugrahane punika, Ida Hyang Kalamretyu satata mamati-mati ring Bali Pulina. Kantos raris Ida Batara Siwa tedun malih ke jagat Bali ngicén pangentos ring Ida Hyang Kala Mretyu. Pangentosé punika marupa upacara Eka Dasa Rudra sané kamargiang nyabran satus warsa. Asapunika taler Panca Wikrama sané kamargiang nyabran séket warsa. [Hana gantinanya sapawehku ri kita suka yan  tkang tkan, satata n pamakṣa kita mānuṣa kari kakaton nikang jagat, hana kāryya ngeka daśa rudra saratusi tahun ta ya kwarĕg, wara pañca wikrama ngaranya lima puluhing warṣa yan gnĕp].
Lianan ring waranugrahané inucap, kantun wénten waranugraha sané picayang Ida Batara Siwa sareng Ida Bhatari Parwati ring Hyang Kalamretyu sakadi: (1) para jana sane nenten ngamargiang parilaksana tan rahayu ring jagaté (hana len muwah wwang ika tan rahayu tan awidāna ring prajā); (2) alpaka guru, nénten bakti ring baba-bibi sakantuné urip (guru-guru tālpake katana bhakti mabapa bibi yawating urip); (3) nénten madéwa bakti ring kawitan, lipya ring kawitan (tan adewa bhakti kawitanya katka ri kamūlaning dadi); (4) paumahan sané salah ukur (hana len muwah wara kitānaku nata ring umah salah wukūr); (5) palemahan parhyangan salah sikut (salmah ni pāryyangan ikā katkani yaśa yan salah sikut) ; (6) nyacad kayu lakar paumahan utawi parhyangan (cinacad-cacad taru lakārnya ya di sala arĕp tikang butul); miwah sané lianan prasida katadah olih Hyang Kala Mretyu [kita mākṣa yan hana samangkana]. Sakéwanten yéning wenten para jana sané pageh ngamargiang kadharman, Ida Hyang Kala Mretyu paragayan Pasupati sané ngwawa ala ayu pacang ngicénin waranugraha [Paśūpati pāwakanta dadining ala lawan ayu, asing apagĕh magugwana kitā sihana wwang ika].
Sapunika gagiing carita Kakawin Purwaning Gunung Agung. Ring panguntat Ida Padanda Made Sidemen mahbahang indik raja-raja sané naénin madeg nata ring Bali ngawit saking Sri Indra Cakru rauhing Masula-Masuli.
 

V
Wasana Wakya

Kakawin Purwaning Gunung Agung prasida kapastikayang karipta olih Ida Padanda Madé Sidemen. Parab Idané sajroning kakawiné puniki wantah Si Panggulu Si Tan Pakarsa tur Ida nugesang wit Idané saking wawidangan jagat Intaran. Kakawin puniki madaging sari-sarin pikayunan Idané ngeninin indik kapurwan Gunung Agungé sané kaangkenin olih Badan Pusat Vulkanologi dan Mitigasi Bencana Géologi pinaka silih tunggil gunung sripit, santukan méweh pisan katarka. Maduluran antuk kria sastrane puniki, i raga prasida uning sujatinnyané Gunung Agung punika wantah lingga mani sané patut satata kaupipira karesikan miwah kesuciannyané.   


Pustaka
Agastia, IBG. 1994. Ida Padanda Made Sidemen: Pengarang Besar Bali Abad ke-20. Denpasar: Yayasan Dharma Sastra.
Agastia, IBG. 2007. Memberi Arti Kehidupan: Membaca “Salampah Laku Ida Padanda Made Sidemen”. Denpasar: Yayasan Dharma Sastra.
Agastia, IBG. 2012. Pertemuan Ida Padanda Made Sidemen dan Cokorda Denpasar. Denpasar: Yayasan Dharma Sastra.
Suarka, I Nyoman. 2007. Kidung Tantri Pisacarana. Denpasar: Pustaka Larasan.

Lontar
Kakawin Purwaning Gunung Agung koleksi Pusat Kajian Lontar Universitas Udayana.  

*) Salanturnyané kantun wénten carita indik Déwi Gangga, sakéwanten nénten katlatarang ring kria patrané puniki santukan gegiing ceritané panjang



Putu Éka Guna Yasa
embas ring Banjar Selat Tengah, Bangli, 6 Januari 1990. Mangkin dados dosén ring Jurusan Bahasa Bali Unud. Nerjemahang makudang-kudang lontar, pemenang Pemuda Pegiat Literasi widang jasa saking Paguyuban Duta Bahasa Provinsi Bali 2018. Kakawiannyané kawedar ring makudang-kudang média masa, wiadin ring cakepan luiré Bali Post, Pos Bali, Prabhajnana (I, II, III), Angripta Rum.

No comments