Puisi-puisi I Kadék Darsika Aryanta; Ngerug Bencana

Potrekan Supartika

Kacunduk di Lovina

Semilir angin dingin nyusup ring angga
Kembang sandat miik ngalub
Rikala peteng katimpalin bintang di langit
Suaran alus ombak satmaka saksi memadu tresna
Punyan ketapang setata neduhin karma iraga

Kacunduk di lovina
Tresna intan lan soca
Tan bina sekadi sang hyang semara
Ngiket janji tanpa lara

Kacunduk di lovina
Ngiringang manah metemu ring ati
Tresna sujati tanpa ganti
Mamucuk ring manah matemu ring lovina.

Nanging mangkin
Ombak sayu tan paangin
Angin kalu tanpa matan ai
Matan ai remrem nuju ngilang tanpa daya adi tuah selat bukit

Love-ina, 2018



Ngerug Bencana

Sayaga rikala wengi
Sadia rikala galang
Gerudug bencana, pabriak panjak mesuryak
Pajerit jerit ngalih selamat

Para jana, praja miwah rupaka makasami mamesik
Ngewangun tudung guleman
Ngewangun paon anggo nyakan
Ngewangun sami mangda rahayu

Kibaran kuning mesliweran
Nunas ica ring Hyang Widhi
Anggo majalaran
Selamat makasami

Dénpasar, 2019



Dini Ditu

Bangun ditu
Manjus ditu
Megaé ditu melali ditu
Pules ditu
Nguél ditu
Nanging....
Sakit dini
Pengeng dini
Kiap dini


Dumogi
Liang ditu
Nau ditu
Bagia ditu
Pabriak ditu

Astungkara
Rahayu lan kerta raharja dini

Dénpasar, 2019



Wayang Gadang

Suaran yéh ngelincik jangih ring telaga asri
Nundunin arsa mangda nemu bagia
Sawah lintang nundunin liang nemu semara
Nunas ica ring ida sanghyang widhi

Sang surya kailidin tudung manah kelangen ati
Misadya mejanji sareng adi
Dini negak di bataran sepi
Metimpal téh sané panes gati

Sliab slieb wong jalaran dauh jalan
Kangin kauh ki gundul melingseb nyungseb
Roko sik luh.....
apang anget tangkah beliné

Ngantosang adi apang metalin radio
Nyuratang jeriji kelik-kelik ningalin kopi
Luh... antosang beli
Lakar misadya nyujuh atin tresnan beli

Kecicang, 2019


I Kadek Darsika Aryanta
Embas warsa 1987 lan maasal saking Karangasem. Seneng magegonjakan, maliang-liangan lan melelanguan. Seneng melajah Fisika lan komputer sareng sisya ring Kubutambahan, Buleleng, dados guru Fisika SMAN Bali Mandara.”

No comments