Puisi-Puisi Ni Komang Aryani; I Bangkén Peteng
 |
| Potrekan Supartika |
I
Bangkén Peteng
Cecingaké
doh ka ajeng
Uripé
patut wawanin malih
Mamargi
ring lawat-lawat sané ilu
Sampunang
lampahé kapademang
Sané ilu patut tandur
lan kutang
Sampunang
icén I Bangkén peteng
Ngamademang
sunaré sané wawu ngendih
Mangda
nénten malih ngamedalang bon pengit
Wusan
sampun I Bangkén peteng
Ngosekin
manah metengin margi
Ngucurang
toya panyingakan
Ngantos
nyegal tindakan cokor
I Bangkén peteng sampun
dados bangké
Lemahé sané anggén
ngurip
Mangda setata galang lan
liang
Mamargi antar nyujur
sunaran lemah
Bungan
Jinah
Dina
magentos dina
Redité
magentos Redité
Wulan
magentos wulan
Tan
karenga sampun awarsa
Mangkin kacunduk dina i
bungan jinah
Bungan jinah wénten sané
mawarna-warni
Setata
liang sané ngatonang
Puniki
wantah medal saking purining jinah
Wénten
malih i bungan jinah
Mawarna
nanging ngranayang sepet sané nyingak
Bilang
éling dados kosek
Yéning
nénten karenga setata nyesek
Sayan
sué ngagengin punya
Puniki
wantah bungan sané patut mawali kagenah jinahé
Déwa Ratu, yéning dados
tunas
Mangda titiang nénten
kacunduk sareng i bungan jinah
Sané
ngosekin manah
Mangda
titiang kacunduk sareng i bungan jinah
Sané
nyalimurin manah
Layah
Tanpa Tulang
Anak
ia mula jelé
Anak
ia mula beler
Anak
mula ten ngerti tata titi
Anak
mule tusing ngelah keneh
Saja buka kéto?
Saja!
Tusing tolih uling dija ia lekad?
Kija
lakuna yéhé membah?
Uling
ba duur suba jelé
Kayang
ka betén pasti jelé!
Manis
kemikan bibihné
Tusing ajerih makemikan
Laguté
layah tanpa tulang
Jeg
aluh pesan baan ngilukang
Tusing makeneh ring sang
sané karaosang
Tusing ngalih kasujatian
tuturé
Tusing marasa pelih yén
tusing manut patut
Tusing marasa pedih
yéning ngrusak idup anak
Raos
ulung tusing sida ambil malih
Plaib
raos éncol buka plaibang sepur
Raos
besik dadi siu
Sané
siu mabungah-bungah
Cening
Bagus
Cening
bagus sané banget sayang
Saking
tengahing weteng
Mémé
setata ngiasayang
Mangda
cening setata kenak lan liang
Nepuk
sané mawasta bagia
Cening bagus...
Élingang pitutur mémé
Saenun ceningé maurip
Sampunang
pisan lali ring kawitan
Sampunang
pisan lali ring rerama
Sampunang
pisan lali ring sibakan
Sampunang
lémpas ring suluh urip
Kaon-becik
cening sané madué
Rah
tunggal nénten prasida pacang katilas
Cening
bagus...
Élingang
pitutur mémé
Saenun
ceningé ngelarang brahmacari
Élingang
pesan swadarmaning dados sisya
Antengé
tekekang
Jemetang
ngrereh kaweruhan
Sampunang
surud-surud malajahang raga
Dinané
dibi nénten sida pateh sakadi dinané mangkin
Sampunang
kantos nyelsel déwék
Mangda
sida dados anak maguna
Cening
bagus...
élingang
pitutur mémé
ring
kahuripan
suka,
duka, lara, pati
setata
madampingan
mangkin
cening rumasa kasukan
benjang
sida kacunduk duka
sida
malih kacunduk lara
miwah
sané kabaos pati
‘nika
wantah paileh gumi
sampunang
banget kapedihang
Cening
bagus...
‘napi
sané kacunduk ring tengahing margi
sampunang
pesan dados pialang
sané
makarana Cening jerih lan wusan antuk mamargi
‘nika
anggen pelajahan
mangda
pamarginé ngancan sampurna
kaoné
kutang beciké upapira
Cening bagus...
sampunang
ajerih
sampunang
banget pedih
sampunang
surud-surud malajahang raga
yéning
sampun mamargi antuk dasar dharma agama
setata
éling ring raga
pastika
nemu karahayuan.
Dosén ring Program Studi Pendidikan Bahasa Bali, STKIP Agama Hindu Amlapura.
.jpeg)
No comments