Bongkling (XLIX-LIV)

Potrekan IGA Darma Putra

Kaketus saking manuskrip duén Ida I Déwa Gdé Catra, Karangasem

/49/

Pan Bongkling sumangkin bétak,

twara nyangka-nyangka munyi,

mangaku twah awak iyos,

ngalahang Dé Senggu Pangi,

tuwi manabeng mati,

kablet twara nggelah sahut,

Parandha Ganggasura,

némbok béngkot bucu mati,

sok ban bendhu,

kuciwa mameswang peta.

/50/

Dadi kasub ka nagara,

karirihané Pan Bongkling,

ada Dukuh Selam mangko,

mahadan ya Pan Dhurahim,

ndingeh Dé Senggu Pangi,

kuciwa dané pasawut,

yén awaké lawanya,

gudug lamun manyirikin,

kaling mbucu,

anyari masa mahimpas.

/51/

Buka ada hanang domas,

soroh selamé sisyanin,

tong honya bahanya nyéndok,

mingkin anaké adiri,

honya banya nakonin,

samannya njugjugin dhanu,

bhagya apanga teka,

dini té apanga ririh,

lamun ditu,

yén jumaha twah ririhan.

/52/

Mahi apang édénganga,

né nganemin dong ké jerih,

sinya anak soroh klutok,

né lawanya ban Pan Bongkling,

krana ya manguberin,

akéto munyi Dé Dukuh,

tan ucapen Dukuh Selam,

hana kacritayang malih,

Gusti Agung,

mapuri ring Pamamoran.

/53/

Anak mula mula suka,

nggelah panjak dwang tali,

babikasan sada jégo,

selid sanja ya katangkil,

goba twara nandingin,

kumisé inggel apujut,

cunguhé sada dawa,

matané mamatan sampi,

bawu pesu,

manehen tendas parekan.

/54/

Lengaré barak nambaga,

heboké henu di duri,

ya inggel samahan grobrob,

basang gedé tangkah beris,

hulaté kenying-kenying,

tuwi pantes anak agung,

negakin lungkalungka,

kaparek ban soroh warggi,

ada satus,

ramé ya magagonjakan.

(pacang kalanturang…)