Puisi-puisi IBW Widiasa Kenitén; Polisi

Pinterest.com

Pipis

ngelah pipis ngelah utang

basang bentang ngaruntang

pipis aluh sing mapeluh

pipis élah sing melah

ngelah pipis liang

ngelah utang uyang

peteng lemah kuang

Polisi

nangkep polisi

katangkep polisi

kanti mabui

ulian saksi

sing nyak padidi.

Hakim

maling daki

mamodal bani

maling madasi

mamodal kuintasi

maling daki

mapalu besi

maling madasi

mapalu lidi

Jaksa

maling matimpuh

makantong tebel

mamodal andel

antes kendel

pasal mael dadi mudah

kantong tipis

pasal mudah dadi mael

Maya

maya maya

jagat maya

mayaning maya siluman

maya

maya maya jagat maya

mayaning di pileman

somah uyang

ngembangang bikang

Tanah Bali

tanah anget

tenget

tusing inget

amah ngetnget

aluh nguluh

nyangluh

cara waluh

Catetan: Kaambil saking cakepan Sabdaning Sepi kakawian IBW Widiasa Kenitén