Puisi-puisi I Putu Supartika; Carita Lumur Puyung

Pinterest.com

Carita Lumur Puyung

Lumur-lumur puyung pacacar 

di kenehé

dabdabang

kén temborin

kén tempuhin

kén imbuhin

da kanti dadi tukad

da kanti dadi alas

manis batu

Kuskusin kuskusin

apang lebeng

apang kalis

yén kangelan, kéweh ngilag

torékin adeng, colékin madu

apang putihé majatu

Lumur-lumur puyung pacacar

di kenehé

sarin toyan klebutan kecorin

apang mangan

apang sidhi mandi

Silib di betén saputé

kebitang

kebatang tur kebérang

tinglis

Lumur-lumur puyung pacacar

di kenehé

papag toya kumkuman

ri kala ainé masriyak

kedisé macakli di punyan croringé

apang lemahé macihna

2026

Satuan I Bulan

Bulané nyongkok ngintip

di selagan alisé

punyan dapdapé kalilit bun klidungan 

kepik a katih, 

di gidaté saputang

ngejer ngetor 

capuh

2026

Peteng-peteng

Peteng-peteng putih, i kaki magegitan di muncuk don dapdapé

nembangang gendingan i crukcuk

sléyag-sléyog srara-sréré

élogané rejang purnama kadasa

clekutak ketungan macandetan

Peteng-peteng bang, i dadong nampih kapkap, 

maunti jebug gambir 

ngutah-utah 

poos gedubang 

barak-barak getih di tlajakané

Peteng-peteng pelung, i kaki lan i dadong ngetogang munyi

Krunané paketéltél

ulung di pabaané i cucu

malingkuh di pabinan

legu nyinyik itep mangintip

2026

Sasapan Idup

Sepih-sepih gampilang

Ipil-ipil pilpilang

Gantus-gantusin gantung

Kebit-kebitin gelekang

Ungkab-ungkabang ketogang

Seleh-selehin suluh

Kecap-kecapang pait pakehé

2026