Nyakan Diwang, Nyakan rikala Ngembak Geni

Foto Gede Gandi

Nyepi sampun usan, mangkin Ngembak Geni. Ring Kecamatan Banjar, Buléléng, wénten tradisi unik rikala Ngembak Geni. Tradisi punika mawasta Nyakan Diwang, nyakan utawi maratengan rikala Ngembak Geni. Kalaksanayang ring sisin margin désané. Rikala punika kramané sampun metangi dauh 02.00 semeng. Samian mataki-taki pacang ngalaksanayang Nyakan Diwang.

Yén biasané kramané nyakan utawi maratengan ring paon, dinané mangkin ring sisin margin désané, ring ajeng embak-embakan pamesun umahnyané. Panci, dangdang, jalikan tanah, saang, térmos, samian kabakta ka sisin marginé. Punika taler beras, toya, miwah sané lianan. Marérod saking tanggu kantos ka muncuk désané kramané maratengan.

Foto Gede Gandi

Rikala sami sampun tegep, kramané ngawit Nyakan Diwang. Saangé ring tengah jalikané kaancungin api, dangdangé sané sampun madaging toya kagenahang ring duur jalikané. Sapunapi ja anaké maratengan, asapunika unduk sané pacang kapanggihin.

Pakedék pakenyung sareng sandingan, saling capatin, saling dengokin, saling paakin, punika taler pacang kapanggih rikala radisi puniki kamargiang. Panyamabrayaané sayan nyangket kadi engket, raket, punika wantah tatujon tradisi puniki.

Nyakan diwang puniki sampun katami saking para leluhurnyané, lan kantun lestari kantos mangkin. Kramané percaya, yéning ngalaksanayang Nyakan Diwang puniki, leteh ring angga sang sané ngalaksanayang pacang ical.

Usan Nyakan Diwang, kalanturang antuk majengan sareng kulawarga utawi krama lianan. Napi sané kalebengin rikala maratengan, nika kapuponin rikala majengan. (sup)