Krama Kedonganan Nguapin Padéwékannyané antuk Endut

Foto Widiartha Suryawan

Penyatusan lan minab kantos penyiuan krama Désa Adat Kedonganan, Kuta, Badung nguapin utawi ngurab padéwekannyané antuk endut. Kelih, tua, cerik, sareng maendut-endut. Niki wantah tradisi sané kamargiang nyabran awarsa, rikala ngembak geni. Tradisiné puniki mawasta mabuug-buugan. Yéning rereh tegesipun mabuug-buugan wantah nguapin awak utawi padéwékan antuk endut lan kalaksanayang ring gombangan enduté sané magenah ring tengah entikan mangrove sané wénten ring sisi kangin Désa Kedonganan.
Sadurung tradisi puniki kakawitin, pinih ajeng kalaksanayang matur piuning nganggén banten pejati ring Pura Balé Agung, Catus Pata, Pura Dalem, miwah Pura Segara. Risampuné sami mapupul ring balé désané, krama sané ngamiletin tradisi puniki nuju genah sané sampun kacumawisang. Irika kramané maclempung ka tengah gombangané (rawa) raris nguap padéwékannyané antuk endut.
Risampuné ‘kakaput’ endut, samian mamargi nuju Pesisi Pemelisan sané wénten ring sisi kauh desané. Ring pesisi punika, ogoh-ogoh sané durung kaprelina rikala pangerupukané raris kapralina utawi katunjel. Usan punika kramané sané sareng mabuug-buugan masiram ring Pesisi Pamelisan.
Manut Bendésa Kedonganan, I Wayan Mertha, para tetuané irika nugesang, mabuug-buugan wantah pinaka cihna kalegaan alit-alité ngalaksanayang penyepian. Kawewehin malih, tradisi puniki sampun kalaksanayang sadurungé wénten ogoh-ogoh.
Lianan ring punika, wénten taler sané nganikaang mabuug-buugan punika wantah pinaka cihna ngaturang parama suksma majeng ring Sang Hyang Parama Kawi duaning kramané polih ulam akéh ring Pesisi Kedonganan. Mertha nganikaang yéning ulam punika sujatiné wantah wénten ring sisi kauh Kedonganan. Nanging, dumun ulam punika wénten kantos ka sisi kangin. Sangkaning punika, pinaka rasa suksma para bendégané irika, kalaksayang tradisi mabuug-buugan punika.
“Dumun naanin tradisi puniki nénten kalaksanayang, nanging mangkin jagi netep kalaksanayang lan antuk teknisnyane kasukserahang majeng ring para yowana miwah prajuru désa adat ring bhaga pawongan,” ucap Mertha. Lan ngawit petang tiban sané sampun lintang, tradisi puniki netep kalaksanayang kantos mangkin. (*)

1 comment:


  1. Kelinci99.org Situs Agen Judi Togel Online dan Live Game Terpercaya

    - Bonus Deposit 5rb Setiap Hari
    - Minimal Deposit Rp 20.000
    - Diskon Togel Terbesar Sampai 66%
    - Bonus Cashback 5% (Khusus Live Game)
    - Bonus Referral 1% ( Tanpa Batas )
    - Berapapun Kemenangan Anda Pasti Kami Bayarkan 100%
    - Anda Akan diLayani Selama 24 Jam Non Stop

    Kenyamanan dan Kepuasan Anda Menjadi Prioritas Utama Kami, Semoga Beruntung Bermain Bersama Kami di Kelinci99.org

    ReplyDelete