Puisi-puisi Budi Santosa; Katuturan I Tadah Asih Matemu Gagélan

Kolase Sisia SD Saraswati 6 Denpasar

Kunang-kunang

Titiang i kunang-kunang

Kaempu baan sastra

Mentik saking gending sunia

Saking landuh téja paryangko

Tumuli sumikeping raga

Silib ilang saking ujwalaning geni urip

Kantun alit prakanggé tuah ring ratri

Tan paguna nyilibang lawat

Tuna luwih tan pakebang angga

Pascat kasor mangutang-ngutang awak

Katuturan I Tadah Asih Matemu Gagélan

Kik...kik...ngkirr

I Tadah Asih kundang asih

Sampun rauh Tadah Asih wadon

Mangkin mulih kasebun sunia

Gunung sampun rebah

Segara sampun asat

Sané nandang lara semara 

Sampun nemu maha usada

Dalang sampun katon

Kelir sampun kaungkab

Wayang mulih ring gedong

Mangkin wantah anyepi tutur

Nidra

Mawit lungsir rumning i sekar gadung 

Kumanyar rijasa abang 

Mrik i pudak tanpa tungtunging rasa

Mugpug rasa ngogah hredaya

Munggel giri ngungsi pada

Prana adi tan kalulutan

Rempak méru ring pupuning sutra

Mawit nidra tan pawali swapna

Budal ring kadatuan téja santa

Tan pawali lara

Suka tanpa tepi

Nidra

Budi Santosa
mahasiswa Sastra Bali Unud.