Puisi-puisi Jayanti Pacentokan Nyurat Puisi Téma Nasionalisme

Gagambaran I Nyoman Buda Arimbawa

Putu Ardana Bukian
Pasupati Jagaraga1
(ngaskara kayun ring leluhur I Gusti Ketut Jelantik)

 nyirsir anginé tipis, misbis tanah sané kantun belus gigis,
sasedon toyané pakrimik pagrépé ngusudin jlingjingan ngupak-ngupak don lalang ,
ganjung-ganjung ngambuhang mangan medang sakadi nyiup-nyiup carita nguni
sané kagitayang batu ring usehan tembuku
pirengang, kantun mangkin
akah-akah lalang tan rered-rered magegitayan tembang sepi mawirama mandamalon ,
ngusudin, nyisir leplep pitutur sedurung sirep pertiwi

“ngurah… élingang, mangkin rahina becik sayaga raga
rahina becik nuncebang raga, nyiramang getih
ngrupak  prasasti agung ring pertiwi jagaraga”
nyujatiang kayun, meneng suksma ring angga
pikayun  kantun maseselet ring saung keris watugunung tindih, nindihin jagat, jengah nanging banban
kagibrasang
kapacek lan kapacal magaang nyusup ring usehan bun ukiran dalem segara madu

carita kalanturang, ngetél
mausehan ring tengahing tembuku
lantur maura, ngericik ngalangkahin karang-karang paras sané mogol ring bongkol tukad aya

“ngurah, élingan
kulkul bulusang,
sekayang-kayang urip, sampunang lémpas
adegin pertiwiné, raungan caritané kadi samong ngadeg ring duur bukit nyuryakin langit,
jagaraga  pinaka mandara giri kaagungan jagat bali
tan parisel-sel yéning getih maura ring petiwiné
tan paramaduka yéning layon kagempur, kabésbés kala gumi lampus ring laga ngametuang paramasuka
suksma sarira kaembas ring titik titik damuh padang kasna diastun kabor-bor suryané nyentak
suksma, nyangkepin ngaskara kayun ring hyang batara segara madu”

“ ngurah, kabarin semetoné sami
sampunang lipia, sampunang lali
ngiring lanturang pamargi , jagra ring jagaraga
gibrasang taksu keris lan tombak sané sampun kepancang pilpilang malih angkihan sané kakutang-kutang gamel
pecut, gejorang ringkik jaran putihé
suryakang ,…suryakang..suryakang..
sambehang sekarura bala bélapati ring langit ibu pertiwiné

tuding langit
gamel surya ngadegin jagaraga

Bénténg Jagaraga, 2017




I Nym Cara Mustika
I Gusti Ngurah Rai2

Ajeg lajer tan obah

Kukuh puguh tan ibah

Teguh bakuh ring abah

Rumakseng kertaning Bhuh.
Siu sangangatus petang dasa  nem, Sasih ping solas ring Maséhi
Pinanggal ping kalih dasa nepék 

Senopatining Nusa Bali  makerti yasa.
Sang puputing kapurusan

Tan makirig yadyan a tapak

Nangsek ngantos kapruputan

Ngawé resres I satru corah
I Londo Nica dursila corah
Maenyet mabalik majejarah

Ngusak asik Nuswantara

Magandong nyilib nyaru sekutu,
Sang Prawira ring laga
Parama lédang matanding wirang

Ngemit ngemban Ibu Pertiwi 

Antuk gagelaran yuda yadnya.
Nyusup Alas Udaya Giri
Boya sangkaning Ida wedi

Mangda tan kabaya pati

Watek warga ring Nagari
Tan éman ring Angga 
Asih ring wadwa

Subakti ring panagara

Ninggal Rabi miwah Oka
Embas ring Carang Sari
Kaalem sawengkon Nagari

Mayadnya Angga Pati

Ngarajegang Proklamasi,
Ida Sang maraga Purusa.... 
Ida Sang luihing Ambek

Ida Sang wibuhing yasa

Ida Sang mapasadnya I Gusti Ngurah Rai



Luh Éka Wahyuni
Tutur Leluhur
Uli Kacang Saur ka Warisan Leluhur3

Wénten tutur
Tutur saking leluhur
Unduk imaluan dugasé lacur
Madaar madarang kacang saur
Guminé yakti subur
Nanging kramané pada lacur
Uli betén kanti baduur
Makejang suba kagebur
Sané ngawinang lacur
Ulian duratmaka tanpa ukur
Nyagur taler nundén nandur
Pala bungkah pala gantung, betén lan baduur
Apang ia sing naar kacang saur
Ngalantur,
Makejang pada sadulur
Mangda duratmaka kalebur
Dini ditu saling jagur
Pacedar – pacedur
Makasami gelar – gelur
Liu ane babak belur
Tur, duratmaka yakti mundur
Nanging pejuang, wenten sane gugur
Malih kramane gelar – gelur
Boya ja saling jagur
Nénten kadagingin cedar – cedur
Pagelur ulian pacang nandur
Pejuang, sané sampun gugur
Jani cening becikang ningeh tutur
Becikang ngajegang warisan leluhur
Corahé lebur, melahé tandur
Apang tusing sengsaya para leluhur
Ngalebur lacur
Nyagur duratmaka kanti mundur



I W. Wikana-Seraya
Tresna Ring Panegara4

Sutindih ring genah pamijilan
tuna ajerih
nandur tresna
ngulati tindakan ngetohang angga
mabéla pati nyujur darma jati

Tan wénten nyaman pada
Pancasila tindihang
mautama
Bhinéka Tunggal Ika raketang
nyujur galah nuju Sang surya

Indonésia
mabinasampunang tuna
Sabang Mérauké tan mapalasan
raketang
iket tali sesana
sesana
manusa nganutin laksana

Tresna dasarin manah
manahsujati
makatiti lampah
lampah
nyujur babaktané nulus
nulus
lascarya sujati kaupapira.


___________________________
1) Puisi terbaik
2) Jayanti 1
3) Jayanti 2
4) Jayanti 3


No comments