Tutur I Nanang: Djelantik Santha

Olih: Déwa Ayu Carma Citrawati

IGG Djelantik Santha

“Yéning jagi nulis, ampunang misi takut-takut. Yén nyak cacada kan becik nika. Anggén motivasi, ampunang med-med maca buku.”

Nénten prasida titiang nyihnayang rasa seneng titiangé daweg miragi baos Ida sakadi punika. Daweg punika ujané ngribis nedunang merta, Ida taler nedunang piteket-piteket ring padéwékan titiang. Tan wenang malih titiang nyambatang indik sepak terjang idané ring panglimbak sastra Bali modéren. Samian sampun uning makasami kakawian idané lengut ring basa miwah akéh madaging piteket-piteket sané mabuat. Yéning kamanah antuk titiang, Ida pinaka mahaguru ring kawéntenan anak muda sané wawu mlajah ngawi. Mahaguru sané setata seneng yéning maosang sastra Bali modéren. 

Mahaguru Djelantik Santha, ratu aji sané setata makenyem girang yéning wénten anak mlancaran ring jeronidané. Ida setata seneng matemu wirasa, mirengang keluh kesah para pangawi, minab nénten ja titiang kémanten, pangawi lianan taler. Makasami indik sastra Bali modéren. Ida sané nureksain cerpén-cerpén titiangé sané munggah ring Bali Post. Yéning wénten basa sané tan becik, kruna sané tan patut pastika sampun titiang kaicén ajah-ajahan. Lianan punika, ida taler aktif ring media sosial inggih punika facebook. Nyurat puisi-puisi sané lengut pisan miwah setata ngicénin semangat ring para pangawi sané ngunggahang kakawian ring média sosial.

“Ragané kari siteng, kari nyidaang negak makelo. Semangatang naké nika ngawi, pangawi perempuan apang sayan liu, apang sayan akéh bunga ring tetamanan sastra Bali modéren.”

Baos idané kantun leket ring manah titiang. Dawegé puniki titiang maosang indik pangawi wadon ring sastra Bali modéren. Ida ngicén titiang pamargi mangda setata ngawi nyadiastun nénten prasida sering munggah ring koran. “Yéning wénten galah, mriki manten.”  Kénten ida maosang. Yéning tan sida munggah ring koran, titiang kanikain mangda tangkil makta kakawian, ida sané jagi ngwacén. Titiang kanikain mupulang kakawian mangda prasida dados buku.  Ida taler sané ngawinang titiang jengah riantukan pangawi wadon kanikaang “mati suri”, kantun mengkeb, tan juari mabunga ring taman sané linggah.

“Bah..ragané tan bisa masiat di kalangané ané linggah. Yén tiang baanga masiat di kalangané ané cupit singkuh. Surat manten dumun, kondén napi-napi ampun ngorahang ten bisa.”

 Ida sané ngawinang titiang jengah. Dawegé punika titiang kanikain makarya novel. Titiang langsung nyaurin “tan bisa tiang yening makarya novel”, ngawinang ida ica. Titiang kabaos nénten bisa masiat di kalangané sané linggah (novel) durung mapineh sampun digelis nyaurin tan bisa. Punika kabaos digelis “putus asa” kénten ida maosang,  ngawinang titiang lek tur jengah.

Mangkin ida sampun masikian sareng Sang Hyang Tunggal. Tan wénten sané jagi ngicénin titiang paplajahan indik nganggén pangiring-ang miwah –in sané patut, tan wénten sané ngicénin titiang miwah semeton pangawi lianan motivasi mangda terus ngawi, tan wénten malih kenyem miwah gegonjakan idané sané khas Karangasem. Suksma Mahaguru Djelantik Santha.. antuk sami sané sampun kicén ring padéwékan titiang. Amor ring Acintya…

Galah bes banget tenget

Ajah-ajah kapuputang putus

Durung waneh nandur napi malih mupu

Aksi kembang tetamané sayan bungah saking genah galang apadang, Guru…

Tibakang toya pawijilan kakawian mangda sida embas saking garba, Guru…

Tutur katuturang malih

Tutur katuturang malih, malih iriki

Ring tetamananné sané sayan bungah

Déwa Ayu Carma Citrawati
embas ring Getakan, Banjarangkan, Klungkung, 24 Fébruari 1990. Sané mangkin dados guru ring SMP Negeri 3 Dénpasar. Cakepan sané sampun kamedalang inggih punika pupulan satua cutet “Smara Réka” (2014) lan “Kutang Sayang Gemel Madui” (2016). Ngamolihang Hadiah Rancagé 2017 antuk cakepan “Kutang Sayang Gemel Madui.